കണ്ണൂർ ദസറ മതകീയ ആഘോഷത്തെ മതേതരമാക്കി: റാം മോഹൻ പാലിയത്ത്

കണ്ണൂർ: (KVARTHA) തികച്ചും മതകീയമായ നവരാത്രി ആഘോഷത്തെ ഒരു മതേതര ആഘോഷമാക്കി മാറ്റിയത് കണ്ണൂരിന്റെ മാജിക്കാണെന്ന് പ്രശസ്ത എഴുത്തുകാരനും കോളമിസ്റ്റുമായ റാം മോഹൻ പാലിയത്ത് അഭിപ്രായപ്പെട്ടു. ഇതിന് മുൻകൈയെടുത്ത കണ്ണൂർ കോർപ്പറേഷനെ അദ്ദേഹം പ്രത്യേകം അഭിനന്ദിച്ചു. കണ്ണൂർ ദസറയുടെ എട്ടാം ദിവസത്തെ സാംസ്കാരിക സമ്മേളനത്തിൽ വിശിഷ്ടാതിഥിയായി പങ്കെടുത്ത് സംസാരിക്കുകയായിരുന്നു അദ്ദേഹം.

കണ്ണൂരിലേക്ക് വരുന്നവരെ കണ്ണൂരിന്റെ സ്വന്തം ആളുകളാക്കി മാറ്റുന്ന ഒരു പ്രത്യേകതരം മാജിക് കണ്ണൂരിനുണ്ടെന്ന് റാം മോഹൻ പാലിയത്ത് പറഞ്ഞു. കേരളത്തിലെ മതസൗഹാർദ്ദം തകർക്കാൻ ഏതെങ്കിലും രാഷ്ട്രീയ മത ചിദ്രശക്തികളെയും അനുവദിക്കരുതെന്നും അദ്ദേഹം ഓർമ്മിപ്പിച്ചു. സ്വാമി വിവേകാനന്ദൻ ഒരുകാലത്ത് കേരളത്തെ ഭ്രാന്താലയം എന്ന് വിശേഷിപ്പിച്ചിരുന്നെങ്കിൽ, ഇന്ന് കേരളം ബ്രാൻഡ് ആലയമായി മാറിയെന്നും അദ്ദേഹം കൂട്ടിച്ചേർത്തു.

ബ്രാൻഡുകൾ ഉപയോഗിച്ച് അതിൽ ആനന്ദം കണ്ടെത്തുന്നവരായി കേരളീയർ മാറുന്ന കാഴ്ചയാണ് ഇന്ന് കാണാനാകുന്നത്. കേരളത്തിന്റെ നേതൃത്വം വടക്കോട്ടേക്ക് മാറുന്നതായും, അതിൽ കണ്ണൂരിനാണ് കൂടുതൽ പ്രാധാന്യമുള്ളതെന്നും അദ്ദേഹം നിരീക്ഷിച്ചു. കോവിഡ് കാലഘട്ടമാണ് ഉത്സവങ്ങളുടെ യഥാർത്ഥ വിലയെന്താണെന്ന് എല്ലാവർക്കും മനസ്സിലാക്കി തന്നതെന്നും അദ്ദേഹം പറഞ്ഞു. കണ്ണൂർ ദസറ കൂടുതൽ ജനകീയമാകാനും മതേതരമാകാനും കഴിയട്ടെ എന്നും അദ്ദേഹം ആശംസിച്ചു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Author Ram Mohan Paliath says Kannur has turned a religious festival into a secular one.

#Kannur #Dasara #Secularism #Kerala #RamMohanPaliath #Festival