ശബരിമല: (KVARTHA) ശബരിമലയിൽ പൈങ്കുനി ഉത്ര മഹോത്സവത്തിന് സമാപനം കുറിച്ച് വെള്ളിയാഴ്ച പകൽ 11ന് പമ്പയിൽ ആറാട്ട് നടന്നു. ആറാട്ടിനായുള്ള ഘോഷയാത്ര രാവിലെ 9ന് സന്നിധാനത്തുനിന്ന് പമ്പയിലേക്ക് പുറപ്പെട്ടു. ഘോഷയാത്ര 11 മണിയോടെ പമ്പ ഗണപതി കോവിലിൽ എത്തിച്ചേർന്നു. തുടർന്ന് തിടമ്പ് ആനപ്പുറത്തുനിന്ന് ഇറക്കി ആറാട്ടുകടവിലേക്ക് എഴുന്നള്ളിച്ചു.

തന്ത്രി കണ്ഠര് ബ്രഹ്മദത്തൻ്റെ മുഖ്യകാർമികത്വത്തിലാണ് ആറാട്ട് ചടങ്ങുകൾ നടന്നത്. ആറാട്ടിന് ശേഷം ദേവനെ പമ്പാ ഗണപതി കോവിലിൽ എഴുന്നള്ളിച്ചിരുത്തി. വൈകീട്ട് നാല് മണിക്കാണ് പമ്പയിൽ നിന്ന് സന്നിധാനത്തേക്ക് ആറാട്ട് മടക്കഘോഷയാത്ര ആരംഭിച്ചത്. സന്നിധാനത്ത് എത്തിയ ശേഷം തന്ത്രിയുടെ നേതൃത്വത്തിൽ ഉത്സവത്തിന് സമാപനം കുറിച്ച് കൊടിയിറക്കി. പിന്നീട് ദേവനെ അകത്തേക്ക് എഴുന്നള്ളിച്ചു. അതിനുശേഷമാണ് ഭക്തർക്ക് ദർശനത്തിനായി നട തുറന്നത്.

അതേസമയം, ആയിരക്കണക്കിന് ഭക്തരെ സാക്ഷിയാക്കി ശബരിമലയിൽ അയ്യപ്പസ്വാമിയുടെ പള്ളിവേട്ട ചടങ്ങ് ഭക്തിസാന്ദ്രമായ അന്തരീക്ഷത്തിൽ വ്യാഴാഴ്ച (ഏപ്രിൽ 10) നടന്നു. ശ്രീഭൂതബലി വിളക്കെഴുന്നള്ളിപ്പ് പൂർത്തിയാക്കിയതിന് ശേഷമാണ് പള്ളിവേട്ടയ്ക്കായി ദേവനെ പതിനെട്ടാംപടിയിറക്കിയത്. ശരംകുത്തിയിൽ പ്രത്യേകം തയ്യാറാക്കിയ 'കുട്ടി വന'ത്തിൽ വെച്ചായിരുന്നു പള്ളിവേട്ട ചടങ്ങ് നടന്നത്. വാളും പരിചയുമേന്തി കുറുപ്പും, അമ്പും വില്ലുമേന്തി വേട്ടക്കുറുപ്പും ദേവനോടൊപ്പം നീങ്ങി.

തന്ത്രി കണ്ഠര് ബ്രഹ്മദത്തൻ്റെ കാർമികത്വത്തിലായിരുന്നു പള്ളിവേട്ട ചടങ്ങുകൾ നടന്നത്. വാദ്യമേളങ്ങളുടെ അകമ്പടിയോടെ ആഘോഷമായിട്ടായിരുന്നു മടക്കയാത്ര. പള്ളിവേട്ട കഴിഞ്ഞതിനാൽ അശുദ്ധമായി എന്ന സങ്കൽപ്പത്തിൽ വ്യാഴാഴ്ച രാത്രി ശ്രീകോവിലിന് പുറത്താണ് ദേവനെ പള്ളിയുറക്കിയത്.

ഈ പുണ്യവാർത്ത മറ്റുള്ളവരിലേക്ക് എത്തിക്കൂ, നിങ്ങളുടെ അഭിപ്രായങ്ങൾ പങ്കുവെക്കൂ!

The Painguni Uthra Mahotsavam at Sabarimala concluded with the Arattu ceremony at Pampa, officiated by the Thanthri. The Pallivetta ritual, witnessed by thousands of devotees, was also held with traditional fervor, symbolizing Lord Ayyappa's hunt.

#Sabarimala, #PainguniUthra, #Arattu, #Pallivetta, #KeralaTemples, #HinduFestival