രാമായണ മാസം; കണ്ണൂരിൽ നാലമ്പല ദർശനത്തിന് വിപുലമായ ഒരുക്കങ്ങൾ പൂർത്തിയായെന്ന് ക്ഷേത്ര ഭാരവാഹികൾ

കണ്ണൂർ: (KVARTHA) രാമായണ മാസാചരണത്തിൻ്റെ ഭാഗമായി കണ്ണൂർ ജില്ലയിലെ നീർവ്വേലി ശ്രീരാമസ്വാമി ക്ഷേത്രം, എളയാവൂർ ഭരത ക്ഷേത്രം, പെരിഞ്ചേരി ലക്ഷ്മണ ക്ഷേത്രം, പായം ശത്രുഘ്‌ന ക്ഷേത്രം എന്നിവിടങ്ങളിലുള്ള നാലമ്പല ദർശനത്തിന് വിപുലമായ ഒരുക്കങ്ങൾ നടത്തിയതായി ക്ഷേത്രം ഭാരവാഹികൾ വാർത്താസമ്മേളനത്തിൽ അറിയിച്ചു. ജൂലൈ 17 മുതൽ ആഗസ്റ്റ് 17 വരെയാണ് നാലമ്പല ദർശനം നടക്കുക. എല്ലാ ക്ഷേത്രങ്ങളിലും ഭക്തർക്ക് പ്രഭാത ഭക്ഷണം ഒരുക്കിയതായും ഭാരവാഹികൾ അറിയിച്ചു.

ക്ഷേത്രങ്ങളിലെത്താനുള്ള വഴികൾ

കൂത്തുപറമ്പ് മട്ടന്നൂർ റോഡിൽ അളകാപുരിയിൽ നിന്ന് ഒരു കിലോമീറ്റർ ദൂരെയാണ് നീർവ്വേലി ശ്രീരാമസ്വാമി ക്ഷേത്രം സ്ഥിതിചെയ്യുന്നത്. കണ്ണൂർ മട്ടന്നൂർ റോഡിൽ മുണ്ടയാട് ജേണലിസ്റ്റ് നഗർ കോളനി വഴി ഒന്നര കിലോമീറ്റർ ദൂരവും താഴെ ചൊവ്വയിൽ നിന്ന് എളയാവൂർ അമ്പലം റോഡിൽ മൂന്ന് കിലോമീറ്ററും സഞ്ചരിച്ചാൽ എളയാവൂർ ഭരത ക്ഷേത്രത്തിലെത്തിച്ചേരാം. 

മട്ടന്നൂർ കൂത്തുപറമ്പ് റോഡിൽ ഉരുവച്ചാലിൽ നിന്ന് മണക്കായി റോഡിൽ ഒന്നര കിലോമീറ്റർ സഞ്ചരിച്ചാൽ പെരിഞ്ചേരി ലക്ഷ്മണ ക്ഷേത്രത്തിലെത്താം. ഇരിട്ടി പേരാവൂർ റോഡിൽ ജബ്ബാർ കടവ് പാലം കടന്ന് കരിയാൽ വഴി പായം ശത്രുഘ്‌ന ക്ഷേത്രത്തിലെത്തിച്ചേരാം. ജബ്ബാർ കടവ് പാലത്തിൽ നിന്ന് ക്ഷേത്രത്തിലേക്ക് നാല് കിലോമീറ്റർ ദൂരമുണ്ട്.

വിശ്വാസവും വഴിപാടുകളും

ത്രേതായുഗത്തിൽ രാമലക്ഷ്മണന്മാരുടെ വനവാസകാലത്ത് മാരീചനെ തേടിപ്പോയ ശ്രീരാമൻ നീർവ്വേലിയിലും, സീതയ്ക്ക് കാവൽ നിൽക്കുന്ന രൗദ്രമൂർത്തിയായ ലക്ഷ്മണൻ പെരിഞ്ചേരിയിലുമാണെന്നാണ് വിശ്വാസം. ഭഗവാൻ ശ്രീമഹാവിഷ്ണുവിൻ്റെ സുദർശന ചക്രത്തിൻ്റെ അംശാവതാരമാണ് ശത്രുഘ്‌ന ഭഗവാൻ. 

അതുകൊണ്ടുതന്നെ പായം ശത്രുഘ്‌ന ക്ഷേത്രത്തിൽ ചക്രസമർപ്പണം പ്രധാന വഴിപാടാണ്. ഭഗവാന് താമരമാലയും താമര സമർപ്പണവുമാണ് എളയാവൂർ ഭരത ക്ഷേത്രത്തിലെ പ്രധാന വഴിപാട്. വാർത്താസമ്മേളനത്തിൽ വി.വി. ഭാസ്കരൻ, ജി. രാജൻ, പി. പ്രദീപൻ, പി. കുഞ്ഞിരാമൻ, എം. ഭാസ്കരൻ എന്നിവർ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Temple authorities in Kannur have announced elaborate arrangements for the 'Nalambala Darshan' from July 17 to August 17 as part of the Ramayana month observance. 

#NalambalaDarshan #RamayanaMasam #KannurTemples #KeralaTempleNews #Spirituality #RamayanaMonth #KannurTourism #AmmuNews