ഹിജ്‌റ എക്‌സ്‌പെഡിഷൻ: പ്രവാചക പലായനത്തിൻ്റെ ദൃശ്യാവിഷ്കാരം കണ്ണൂരിൽ!

കണ്ണൂർ: (KVARTHA) ചരിത്രത്തിൻ്റെ ഏടുകളിൽ സമാനതകളില്ലാത്ത പ്രവാചക പലായനമായ ഹിജ്‌റയുടെ അന്വേഷണാത്മക പഠനയാത്രയുടെ ദൃശ്യാവിഷ്കാരം 'ഹിജ്‌റ എക്‌സ്‌പെഡിഷൻ' ഞായറാഴ്ച (ജൂലൈ 27) കണ്ണൂർ റബ്കോ ഓഡിറ്റോറിയത്തിൽ നടക്കുമെന്ന് എസ് വൈ എസ് ജില്ലാ ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. 

അറേബ്യൻ പണ്ഡിത ഗവേഷകരോടൊപ്പം ഡോ. മുഹമ്മദ് ഫാറൂഖ് നഈമി അൽ ബുഖാരി നടത്തിയ പഠന സഞ്ചാരത്തിൻ്റെ അനുഭവങ്ങളാണ് ഈ ദൃശ്യാവിഷ്കാരത്തിലൂടെ പൊതുജനങ്ങളിലേക്കെത്തുന്നത്.

നൂറ്റാണ്ടുകൾക്ക് മുമ്പ് തിരുനബി (സ്വ) മക്കയിൽ നിന്ന് മദീനയിലേക്ക് നടത്തിയ ത്യാഗോജ്ജ്വലമായ യാത്രയാണ് ഹിജ്‌റ. ത്യാഗത്തിൻ്റെയും ഉദാത്തമായ മാനുഷിക മൂല്യങ്ങളുടെയും മഹത്തായ ചരിത്രമാണ് ഹിജ്‌റയുടെ ഓരോ നിമിഷവും. 

പ്രസ്തുത യാത്രയുടെ പൊരുളും യഥാർത്ഥ വഴികളും തേടിയുള്ള അന്വേഷണ സംഘത്തോടൊപ്പം ചേർന്ന് അവതാരകൻ നടത്തിയ പഠനങ്ങളുടെ മനോഹരമായ ദൃശ്യാവിഷ്കാരമാണ് 'ഹിജ്‌റ എക്‌സ്‌പെഡിഷൻ' എന്ന് എസ് വൈ എസ് ജില്ലാ ഭാരവാഹികൾ വാർത്താ സമ്മേളനത്തിൽ അറിയിച്ചു.

ഞായറാഴ്ച വൈകുന്നേരം 5:30-ന് ആരംഭിക്കുന്ന പരിപാടിയിൽ മദ്ഹ് പാരായണം, ഖവാലി തുടങ്ങിയ അവതരണങ്ങൾ അരങ്ങേറും. കേരള മുസ്ലിം ജമാഅത്ത് സംസ്ഥാന ഉപാധ്യക്ഷൻ പട്ടുവം കെ പി അബൂബക്കർ മുസ്ലിയാർ പരിപാടി ഉദ്ഘാടനം ചെയ്യും. 

തുടർന്ന് എസ് വൈ എസ് സംസ്ഥാന വൈസ് പ്രസിഡൻ്റ് ഡോ. മുഹമ്മദ് ഫാറൂഖ് നഈമി അൽ ബുഖാരിയുടെ നേതൃത്വത്തിൽ ഹിജ്‌റ എക്‌സ്പെഡിഷൻ ദൃശ്യാവിഷ്കാരം നടക്കും.

സമസ്ത കേന്ദ്ര മുശാവറ അംഗം പരിയാരം അബ്ദുറഹ്‌മാൻ മുസ്ലിയാർ, ഐ സി എഫ് യു എ ഇ നാഷണൽ പ്രസിഡൻ്റ് മുസ്തഫ ദാരിമി കടാങ്കോട്, സമസ്ത ജില്ലാ സെക്രട്ടറി പി പി അബ്ദുൽ ഹകീം സഅദി, കേരളാ മുസ്ലിം ജമാഅത്ത് ജില്ലാ പ്രസിഡൻ്റ് പി കെ അലി കുഞ്ഞി ദാരിമി, എസ് വൈ എസ് ജില്ലാ സെക്രട്ടറി സമീർ ചെറുകുന്ന്, എസ് എസ് എഫ് ജില്ലാ പ്രസിഡൻ്റ് ബി എ അജീർ സഖാഫി, എസ് ജെ എം ജില്ലാ പ്രസിഡൻ്റ് വി വി അബൂബക്കർ സഖാഫി, എസ് എം എ ജില്ലാ സെക്രട്ടറി പി കെ അബ്ദു റഹ്‌മാൻ മാസ്റ്റർ എന്നിവർ ചടങ്ങിൽ സംബന്ധിക്കും. 

മുഹമ്മദ് റഫീഖ് അമാനി തട്ടുമ്മൽ അധ്യക്ഷത വഹിക്കും. കുടുംബസമേതം പരിപാടിയിൽ പങ്കെടുക്കാൻ ഭാരവാഹികൾ ക്ഷണിച്ചു. വാർത്താ സമ്മേളനത്തിൽ ജില്ലാ പ്രസിഡൻ്റ് മുഹമ്മദ് റഫീഖ് അമാനി തട്ടുമ്മൽ, മുസമ്മിൽ ചൊവ്വ, നവാസ് കൂറാറ, ഡി സി യൂനുസ് എന്നിവർ പങ്കെടുത്തു.

ഹിജ്‌റ എക്‌സ്‌പെഡിഷൻ ദൃശ്യാവിഷ്കാരത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: 'Hijra Expedition' visual presentation of Prophet's migration in Kannur.

 #HijraExpedition #Kannur #IslamicHistory #ProphetMigration #SYSKerala #ReligiousEvent