ജൂലൈ 15: ലോക സർപ്പദിനം: പാമ്പുകളെ ഭയക്കേണ്ട; 'സർപ്പ' കൂടെയുണ്ട്!
● ലോകത്ത് 3500-ലധികം പാമ്പിനങ്ങളിൽ 200 ഇനങ്ങൾ മാത്രമാണ് മനുഷ്യന് ഭീഷണി.
● കേരളത്തിൽ 100-ൽ അധികം പാമ്പിനങ്ങളിൽ 10 എണ്ണം മാത്രമാണ് അപകടകാരികൾ.
● പാമ്പുകടി ഒഴിവാക്കാൻ പരിസരം വൃത്തിയായി സൂക്ഷിക്കുകയും മുൻകരുതലുകൾ എടുക്കുകയും ചെയ്യുക.
● കാസർകോട് ജില്ലയിൽ 32 അംഗീകൃത 'സർപ്പ' രക്ഷാപ്രവർത്തകരുണ്ട്.
(KVARTHA) പാമ്പുകൾ എന്ന് കേട്ടാൽ ഉടൻ വടിയെടുക്കാൻ വരട്ടെ! ആവാസവ്യവസ്ഥയുടെ സന്തുലിതാവസ്ഥയ്ക്ക് സസ്യങ്ങൾക്കും ജീവജാലങ്ങൾക്കും സൂക്ഷ്മജീവികൾക്കുമുള്ള പ്രാധാന്യം പോലെതന്നെ പാമ്പുകൾക്കും പരമപ്രധാനമായ പങ്കുണ്ട്.
രോഗവാഹികളായ പ്രാണികളെയും എലികൾ ഉൾപ്പെടെയുള്ള അപകടകാരികളായ ജീവികളെയും തിന്നു ജീവിക്കുന്ന ചേരയ്ക്കുപോലുമുണ്ട് മനുഷ്യർക്കിടയിൽ ശത്രുക്കൾ എന്നത് ദൗർഭാഗ്യകരമാണ്.
ലോകത്താകമാനം മൂവായിരത്തിയഞ്ഞൂറിലധികം പാമ്പിനങ്ങൾ നിലവിലുണ്ടെന്നാണ് അനൗദ്യോഗിക കണക്കുകൾ. ഇതിൽ അറുനൂറോളം പാമ്പിനങ്ങളാണ് വിഷമുള്ളവ. അതിൽത്തന്നെ കേവലം ഇരുനൂറോളം ഇനങ്ങളിൽപ്പെട്ട പാമ്പുകൾക്ക് മാത്രമാണ് മനുഷ്യജീവന് ഭീഷണിയാകുന്നത്.
കേരളത്തിലെ കണക്കെടുത്താൽ, കണ്ടുവരുന്ന നൂറിലേറെ പാമ്പിനങ്ങളിൽ പത്തെണ്ണം മാത്രമാണ് അപകടകാരികളായവ. ജില്ലയിൽ മൂർഖൻ, വെള്ളിക്കെട്ടൻ, ചേനത്തണ്ടൻ, ചുരുട്ട മണ്ഡലി, രാജവെമ്പാല എന്നിവയാണ് പ്രധാനമായും കാണപ്പെടുന്ന അപകടകാരിയായ പാമ്പിനങ്ങൾ.
ഇവയെല്ലാംതന്നെ മനുഷ്യരെ ഉപദ്രവിക്കുന്നത് മറ്റു മാർഗങ്ങളില്ലാതെ വരുമ്പോഴാണ്. അതായത്, മനുഷ്യൻ ഉപദ്രവിക്കുമെന്ന് ഭയമാണ് വിഷപ്പാമ്പുകളെ തിരിച്ചു കടിക്കാൻ പ്രേരിപ്പിക്കുന്നത് എന്ന് ചുരുക്കം.
പാമ്പുകടി ഏൽക്കാതിരിക്കാൻ ശ്രദ്ധിക്കേണ്ട കാര്യങ്ങൾ
പാമ്പുകടി ഏൽക്കുന്നത് തടയാൻ സ്വീകരിക്കേണ്ട പൊതുവായ മുൻകരുതലുകൾ പ്രധാനമായും വീടിന്റെ പരിസരത്തും പറമ്പിലും കാടും പടർപ്പും വെട്ടിമാറ്റി വൃത്തിയായി സൂക്ഷിക്കുക എന്നതാണ്. ഇതിലൂടെ പാമ്പുകൾക്ക് ഒളിച്ചിരിക്കാൻ പറ്റിയ സ്ഥലങ്ങൾ ഒഴിവാക്കാം.
കൂടാതെ, വീടിന് ചുറ്റുമുള്ള എലിമാളങ്ങൾ, വിള്ളലുകൾ എന്നിവ അടയ്ക്കുന്നത് പാമ്പുകൾ വീടിനുള്ളിൽ പ്രവേശിക്കുന്നത് തടയാൻ സഹായിക്കും. വിറകും കല്ലുകളും അടുക്കി വെക്കുമ്പോൾ അവയ്ക്കിടയിൽ പാമ്പുകൾക്ക് കയറിയിരിക്കാൻ സാധ്യതയുള്ളതിനാൽ ഇവ കൈകാര്യം ചെയ്യുമ്പോൾ ശ്രദ്ധിക്കുക.
രാത്രികാലങ്ങളിൽ പുറത്തിറങ്ങുമ്പോൾ ടോർച്ച് ഉപയോഗിക്കുക. നടക്കുമ്പോൾ, പ്രത്യേകിച്ച് കാടുകളിലോ പുൽമേടുകളിലോ പോകുമ്പോൾ, പാമ്പുകൾ ഇല്ലാത്ത സ്ഥലങ്ങളിലൂടെ നടക്കാൻ ശ്രമിക്കുക. അഥവാ, പാമ്പുകൾ ഉള്ള സ്ഥലങ്ങളിൽ പോകുമ്പോൾ കട്ടിയുള്ള ഷൂസുകളും നീളമുള്ള പാന്റുകളും ധരിക്കുന്നത് നല്ലതാണ്. കൈകൾ ഉപയോഗിച്ച് കുറ്റിക്കാടുകളിലോ കല്ലുകൾക്കിടയിലോ പരതുന്നത് ഒഴിവാക്കുക.
പാമ്പിനെ കണ്ടാൽ പരിഭ്രമിക്കാതെ ദൂരം പാലിക്കുക. പാമ്പുകൾ സാധാരണയായി പ്രകോപിപ്പിച്ചാൽ മാത്രമേ കടിക്കുകയുള്ളൂ. തറയിൽ കിടക്കുന്നത് പരമാവധി ഒഴിവാക്കുക. കട്ടിലിലോ ഉയരമുള്ള സ്ഥലത്തോ കിടക്കാൻ ശ്രമിക്കുക. ഷൂസും ചെരിപ്പുമൊക്കെ ഉപയോഗിക്കുന്നതിന് മുൻപ് ഉള്ളിൽ പാമ്പുകളോ മറ്റ് ജീവികളോ ഇല്ലെന്ന് ഉറപ്പുവരുത്തുക.
ഈ മുൻകരുതലുകളെല്ലാം സ്വീകരിച്ചിട്ടും പാമ്പുകടി ഏൽക്കുകയാണെങ്കിൽ, എത്രയും പെട്ടെന്ന് വൈദ്യസഹായം തേടേണ്ടത് അത്യാവശ്യമാണ്. കാസർകോട് ഇ.കെ. നായനാർ മെമ്മോറിയൽ സഹകരണ ആശുപത്രിയിലും പാമ്പുകടിയേറ്റാൽ നൽകേണ്ട ആൻ്റിവെനം ലഭ്യമാണ്. ശാസ്ത്രീയമല്ലാത്ത പച്ചമരുന്ന് വിഷചികിത്സ പാമ്പുകടിയേറ്റ ശേഷമുള്ള മരണസാധ്യത കൂട്ടുന്ന സാഹചര്യവും നിലവിലുണ്ട്. കഴിഞ്ഞവർഷം ജില്ലയിൽ അഞ്ചുപേരാണ് പാമ്പുകടിയേറ്റ് മരിച്ചത്.
എന്താണ് 'സർപ്പ' ആപ്പ്?
മനുഷ്യനും പാമ്പുകളും തമ്മിലുള്ള സമ്പർക്കങ്ങൾ റിപ്പോർട്ട് ചെയ്യുന്നതിനും മനുഷ്യജീവനുകൾ പാമ്പുകൾ അപഹരിക്കുന്നത് തടയുന്നതിനും വേണ്ടി 2020 ഓഗസ്റ്റിൽ വനംവകുപ്പ് ആവിഷ്കരിച്ച മൊബൈൽ ആപ്ലിക്കേഷനാണ് 'സർപ്പ' (Snake Awareness Rescue and Protection App).
കേരളത്തിലെ പാമ്പുകളെക്കുറിച്ചുള്ള പൊതുവിവരങ്ങൾ, ചികിത്സ, ആൻ്റിവെനം ലഭ്യമായ ആശുപത്രികൾ, ഫോൺ നമ്പറുകൾ തുടങ്ങിയവയും ആപ്പിലുണ്ട്. പാമ്പുകളെ പിടിക്കാൻ ലൈസൻസുള്ള മൂവായിരത്തോളം വോളണ്ടിയർമാരും 'സർപ്പ'ക്ക് കീഴിൽ പരിശീലനം നേടിയിട്ടുണ്ട്.
ഈ ആപ്പ് നിലവിൽ വന്നതിനുശേഷം ഇതുവരെയായി പാമ്പുകടിയേറ്റുള്ള മരണങ്ങൾ നാലിലൊന്നായി കുറയ്ക്കാൻ സാധിച്ചതായി വനംവകുപ്പ് അധികൃതർ പറയുന്നു. സംസ്ഥാനത്ത് 2019-ൽ 130 പേർ പാമ്പുകടിയേറ്റ് മരിച്ചപ്പോൾ 2023-ൽ 40 ആയി ചുരുങ്ങി. 2024-ൽ ഇത് 30-ൽ താഴെയാണ്.
'സർപ്പ' ആപ്പ് ജില്ലയിൽ
'സർപ്പ'യുടെ കീഴിൽ ജില്ലയിൽ അംഗീകാരമുള്ള 32 ഓളം രക്ഷാപ്രവർത്തകർ മനുഷ്യവാസ സ്ഥലത്ത് ഭീഷണിയായി കാണപ്പെടുന്ന പാമ്പുകളെ സുരക്ഷിതമായി പിടികൂടി മാറ്റിപ്പാർപ്പിക്കുന്ന പ്രവർത്തനങ്ങൾ ചെയ്തുവരുന്നു. രക്ഷാപ്രവർത്തനങ്ങൾക്ക് ആവശ്യമായ ഉപകരണങ്ങളടങ്ങിയ 15 സമ്പൂർണ്ണ കിറ്റുകളും 34 സ്റ്റിക്കുകളും ഫ്രെയിമുകളും ബാഗുകളും അടങ്ങിയ കിറ്റുകളും ഇതിനകം രക്ഷാപ്രവർത്തകർക്ക് വിതരണം ചെയ്തിട്ടുണ്ട്.
'സർപ്പ'യുടെ മൊബൈൽ ആപ്പ്, വാട്ട്സ്ആപ്പ് ഗ്രൂപ്പ്, ഫോൺ കോൾ/സന്ദേശം മുതലായവ ലഭിക്കുന്ന വിവരങ്ങൾ അനുസരിച്ച് വേഗത്തിൽ രക്ഷാപ്രവർത്തകർ കാര്യക്ഷമമായി പ്രവർത്തിച്ചുവരുന്നുണ്ട്. ജില്ലയിൽ മാസത്തിൽ ഏകദേശം 200-ഓളം പാമ്പുകളെ വരെ രക്ഷപ്പെടുത്താറുണ്ട്.
ഇവരുടെ കാര്യക്ഷമമായ പ്രവർത്തനം മൂലം ജനങ്ങളുടെ അനാവശ്യമായ പാമ്പ് ഭയം ഒരു പരിധി വരെ ഒഴിവാക്കുന്നതിനും വനംവകുപ്പിന്റെ ഒരു രക്ഷാപ്രവർത്തന സംവിധാനം നിലനിൽക്കുന്നുണ്ടെന്ന ആത്മധൈര്യം സൃഷ്ടിക്കുന്നതിനും സാധിക്കുന്നു. ഈ സംവിധാനത്തെ ജനങ്ങൾ ഫലപ്രദമായി ഉപയോഗിക്കുന്നത് വഴി പാമ്പുകടിയേൽക്കുന്ന അപകടങ്ങൾ ഗണ്യമായി കുറയ്ക്കാൻ സാധിക്കുന്നു.
'സർപ്പ' രക്ഷാപ്രവർത്തകർ
ജില്ലയിലെ മൊത്തം സർട്ടിഫൈഡ് രക്ഷാപ്രവർത്തകരുടെ എണ്ണം 133 ആണ്. ഇതിൽ സജീവമായി ജില്ലയിലെ എല്ലാ പഞ്ചായത്തുകളിലും രക്ഷാപ്രവർത്തനത്തിൽ ഏർപ്പെടുന്നവർ 32 പേരാണ്. 'സർപ്പ' വാട്ട്സ്ആപ്പ് ഗ്രൂപ്പിൽ സജീവമായ 32 പേരുമുണ്ട്.
ഈ സുപ്രധാന വിവരങ്ങൾ നിങ്ങളുടെ സുഹൃത്തുക്കളുമായും കുടുംബവുമായും പങ്കുവെക്കുക.
Article Summary: World Snake Day emphasizes understanding snakes and the 'Sarpa' app's role.
#WorldSnakeDay #SarpaApp #SnakeSafety #KeralaForestDepartment #SnakeAwareness #Kasaragod
