നാലുപേരിൽ ഒരാൾ മാനസികാസ്വാസ്ഥ്യം അനുഭവിക്കുന്നു; സഹകരിക്കേണ്ടത് ചികിത്സയ്ക്ക് പ്രധാനം
 

ഭാമനാവത്ത് 

(KVARTHA) ലോകാരോഗ്യ സംഘടനയുടെ ആഹ്വാനം അനുസരിച്ച് എല്ലാ വർഷവും ഒക്ടോബർ 10, മാനസികാരോഗ്യ പോഷണ പ്രവർത്തനങ്ങൾ ലോകമെമ്പാടും ശക്തിപ്പെടുത്തുന്നതിലേക്കായി നിഷ്കർഷിക്കപ്പെട്ട ദിനമാണ്. 

മാനസിക രോഗങ്ങൾ സർവസാധാരണമാണ്. നാലു പേരിൽ ഒരാൾ ജീവിതത്തിൽ പല അവസരങ്ങളിലും മാനസിക അസ്വാസ്ഥ്യം അനുഭവിക്കുന്നു. അവരോടു പങ്കുചേർന്ന്, അവരെ മനസ്സിലാക്കി സഹകരിക്കുക എന്നത് ചികിത്സയ്ക്കും, സുഖപ്രാപ്തിക്കും, പുനരധിവാസത്തിനും വളരെ പ്രധാനപ്പെട്ട കാര്യങ്ങളാണ്.

മാനസിക പ്രശ്നങ്ങളുടെ മൂലകാരണങ്ങൾ

ആഗോള സമ്പദ്‌വ്യവസ്ഥയിൽ ഉണ്ടായ പുരോഗതി, ഉദാരവൽക്കരണം, ഇൻഫർമേഷൻ ടെക്നോളജിയുടെ വളർച്ച എന്നിവ മൂലമുണ്ടായ നേട്ടങ്ങൾ സാധാരണ ജനങ്ങൾക്ക് പങ്കുവെക്കുന്നതിനുള്ള സംവിധാനങ്ങളുടെ അഭാവം മൂലം ഭൂരിഭാഗം ജനങ്ങളുടെയും കഷ്ടതകൾ വർധിക്കുകയുണ്ടായി. 

ഇത് ലോകത്തിലെ പല വികസിത രാജ്യങ്ങളുടെയും സമ്പദ്‌വ്യവസ്ഥയുടെ തകർച്ചക്ക് വരെ വഴിയൊരുക്കുകയുണ്ടായി. കാലാവസ്ഥാ വ്യതിയാനം കാർഷിക തളർച്ച സൃഷ്ടിച്ചപ്പോൾ കൃഷിക്കാരുടെ ജീവിതം വഴിമുട്ടി. തൊഴിലില്ലായ്മ യുവജനങ്ങളിൽ മാനസിക സംഘർഷം വർധിപ്പിച്ചു. നഗരവൽക്കരണവും കുടിയേറ്റവും കുടുംബ ബന്ധങ്ങളിൽ സാരമായ ഉലച്ചിലുകൾ സൃഷ്ടിച്ചു. 

കൗമാര വിദ്യാഭ്യാസത്തിന്റെയും, ജീവിത നിപുണതാ വിദ്യാഭ്യാസത്തിന്റെയും അഭാവം ഏറെ പ്രത്യാഘാതങ്ങൾ സൃഷ്ടിച്ചിട്ടുണ്ട്. ജനങ്ങളുടെ ഇടയിൽ ആത്മഹത്യ പ്രവണത വർധിച്ചിരിക്കുന്നു. 

മദ്യത്തിനും മയക്കുമരുന്നിനും യുവജനങ്ങൾ അടിമകളായി. മോഷണവും, ഭീകര പ്രവർത്തനങ്ങളും വർധിക്കുന്നു. ഇവയെല്ലാം കൂടുതൽ പേരെ മനോരോഗങ്ങൾക്ക് വിധേയരാക്കുന്നു.

ലക്ഷണങ്ങൾ: തിരിച്ചറിയേണ്ടത് അത്യാവശ്യം

മാനസിക രോഗം കേവലം മറ്റു അസുഖങ്ങൾ പോലെ തന്നെയാണ്. മനുഷ്യത്വത്തിന്റെ ഒരു സ്പർശം, ഒരു തുറന്ന കാഴ്ചപ്പാട് എന്നിവ തങ്ങളിലെ കുഴപ്പങ്ങൾ തിരിച്ചറിഞ്ഞവർക്ക് ഒരു സമ്പൂർണ ജീവിതം ഇനിയൊരു സ്വപ്നമല്ലാതാക്കുന്നു.

മാനസിക രോഗ ലക്ഷണങ്ങൾ പലതുണ്ട്.

● ശീലങ്ങളിലും ശ്രദ്ധയിലും നാടകീയ മാറ്റങ്ങൾ

● സമൂഹത്തിൽ നിന്നും ഒറ്റപ്പെടൽ

● യാഥാർഥ്യമല്ലാത്ത കാര്യങ്ങൾ കാണുകയും കേൾക്കുകയും ചെയ്യുക

● അനുകരിക്കുവാൻ പ്രയാസം തോന്നുക

● ആത്മഹത്യയെക്കുറിച്ചുള്ള ചിന്ത

● അകാരണമായ പേടി

● മദ്യത്തിന്റെയും മയക്കുമരുന്നിന്റെയും ഉപയോഗം

● അമിതമായ ദേഷ്യം

എന്നിവയൊക്കെ ഇതിൽ ചിലതാണ്.

മാനസികാരോഗ്യം സംബന്ധിച്ച ഈ അവബോധം മറ്റുള്ളവരിലേക്ക് എത്തിക്കാൻ നിങ്ങൾ ആഗ്രഹിക്കുന്നുണ്ടോ? ഈ ലേഖനം നിങ്ങളുടെ പ്രിയപ്പെട്ടവരുമായി പങ്കുവെക്കുക. 

Article Summary: World Mental Health Day, October 10, highlights the commonality of mental illness, its socioeconomic causes, and key symptoms.

#WorldMentalHealthDay #MentalHealth #Manasikarogyam #WHO #SupportMentalHealth #October10