വാഷിംഗ്ടൺ: (KVARTHA) യുഎസ് പ്രസിഡന്റായി തിരഞ്ഞെടുക്കപ്പെട്ട ഡൊണാൾഡ് ട്രംപ്, റഷ്യൻ പ്രസിഡന്റ് വ്ലാഡിമിർ പുട്ടിനുമായി സംസാരിച്ചു. യുക്രൈനിലെ യുദ്ധം അവസാനിപ്പിക്കുന്നതിനുള്ള സമാധാന നീക്കങ്ങളുടെ ഭാഗമായാണ് ഈ സംഭാഷണം നടന്നതെന്നാണ് റിപ്പോർട്ടുകൾ. തിരഞ്ഞെടുപ്പില്‍ വിജയിച്ചതിന് പിന്നാലെ വിവിധ രാഷ്‌ട്രത്തലവന്മാരുമായി ട്രംപ് സംസാരിച്ചിരുന്നു.

യുക്രൈൻ യുദ്ധം വ്യാപിക്കാതിരിക്കാൻ എല്ലാ നടപടികളും സ്വീകരിക്കണമെന്ന് ട്രംപ് പുട്ടിനോട് ആവശ്യപ്പെട്ടു. യുദ്ധം അവസാനിപ്പിക്കുക എന്നത് ട്രംപിന്റെ പ്രധാന തിരഞ്ഞെടുപ്പ് വാഗ്ദാനങ്ങളിലൊന്നായിരുന്നു.

യുക്രൈൻ യുദ്ധം അവസാനിപ്പിക്കാനുള്ള സമാധാന ഉടമ്പടി ഒരുങ്ങുകയാണെന്ന വാർത്തകൾ ഇതിനു മുൻപും പുറത്തുവന്നിരുന്നു. ട്രംപ് ഈ ചർച്ചകളിൽ താല്പര്യം പ്രകടിപ്പിച്ചതോടെ യൂറോപ്പിൽ സമാധാനം ഉറപ്പാക്കുന്നതിന് ഊന്നൽ നൽകുകയാണ് ട്രംപിന്റെ പ്രാഥമിക ലക്ഷ്യമെന്നാണ് അടുത്ത വൃത്തങ്ങളെ ഉദ്ധരിച്ച്‌ അന്താരാഷ്‌ട്ര മാധ്യമങ്ങൾ റിപ്പോർട്ട് ചെയ്യുന്നത്.

തിരഞ്ഞെടുപ്പിൽ വിജയിച്ചതിന് പിന്നാലെ ഇന്ത്യൻ പ്രധാനമന്ത്രി നരേന്ദ്ര മോദി, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു എന്നിവരടക്കം 70-ഓളം ലോക നേതാക്കളുമായി ട്രംപ് ഫോൺ സംഭാഷണം നടത്തിയിരുന്നു.

#Trump, #Putin, #RussiaUkraineWar, #PeaceTalks, #USPresidentialElection, #Diplomacy