Keir Starmer | ആരാണ് പുതിയ ബ്രിട്ടീഷ് പ്രധാനമന്ത്രി കെയർ സ്റ്റാർമർ?

 
Keir Starmer


മനുഷ്യാവകാശ നിയമത്തിൽ പ്രാവീണ്യം നേടിയിട്ടുണ്ട്

 

ലണ്ടൻ: (KVARTHA) യുകെയിലെ പൊതുതിരഞ്ഞെടുപ്പിൽ ലേബർ പാർട്ടി വൻ വിജയം നേടിയതോടെ പ്രതിപക്ഷ നേതാവ് കെയർ സ്റ്റാർമർ അടുത്ത പ്രധാനമന്ത്രിയാകും. യുകെയിലെ ഹൗസ് ഓഫ് കോമൺസിലെ ആകെയുള്ള 650 സീറ്റുകളിൽ 410 സീറ്റുകളും ലേബർ പാർട്ടി നേടിയിട്ടുണ്ട്. നിലവിലെ പ്രധാനമന്ത്രി ഋഷി സുനക്കിൻ്റെ കൺസർവേറ്റീവ് പാർട്ടിക്ക് 119 സീറ്റുകൾ മാത്രമാണ് ലഭിച്ചത്. കേവല ഭൂരിപക്ഷത്തിന് 326 സീറ്റുകളാണ് വേണ്ടത്.

കെയർ സ്റ്റാർമർ ആരാണ്?

61 കാരനായ കെയർ സ്റ്റാർമർ 1967 ൽ ലണ്ടനിലെ ഓക്‌സ്റ്റഡിലാണ് ജനിച്ചത്. തൊഴിലാളിവർഗ കുടുംബമായിരുന്നു അദ്ദേഹത്തിന്റേത്. അച്ഛൻ യന്ത്രഭാഗങ്ങൾ നിർമിക്കുന്ന ജോലിക്കാരനായിരുന്നു. അമ്മ ബ്രിട്ടനിലെ സൗജന്യ പൊതുജനാരോഗ്യ സംരക്ഷണ സംവിധാനമായ നാഷണൽ ഹെൽത്ത് സർവീസിൽ നഴ്‌സായി ജോലി ചെയ്തിരുന്നു. 

രോഗിയായ അമ്മയോടൊപ്പം നാല് സഹോദരങ്ങളിൽ ഒരാളായി അദ്ദേഹം ദാരിദ്ര്യത്തിലാണ് സറേയിലെ ഒരു ചെറിയ പട്ടണത്തിൽ സ്റ്റാർമർ വളർന്നത്. 2015-ൽ അദ്ദേഹം ആദ്യമായി ബ്രിട്ടീഷ് പാർലമെൻ്റിലേക്ക് തിരഞ്ഞെടുക്കപ്പെട്ട് ഏതാനും ആഴ്ചകൾക്കുശേഷം അമ്മ മരിച്ചു. മൂന്നു വർഷത്തിനുശേഷം പിതാവും വിടവാങ്ങി. ഭാര്യ വിക്ടോറിയ നാഷണൽ ഹെൽത്ത് സർവീസിൽ ജീവനക്കാരിയാണ്. ദമ്പതികൾക്ക് രണ്ട് കുട്ടികളുണ്ട്.

Politics

ജീവിത ചരിത്രം 

ലണ്ടൻ സ്കൂൾ ഓഫ് ഇക്കണോമിക്സിൽ നിന്ന് നിയമം പഠിച്ച ശേഷം പിന്നീട് ഓക്സ്ഫോർഡ് യൂണിവേഴ്സിറ്റിയിലും ചേർന്നു. 1990 ൽ അഭിഭാഷകനായി യോഗ്യത നേടി. കോളേജിൽ ബിരുദം നേടിയ കുടുംബത്തിലെ ആദ്യത്തെ വ്യക്തിയായും അദ്ദേഹം മാറി. മനുഷ്യാവകാശ നിയമത്തിൽ പ്രാവീണ്യം നേടിയിട്ടുണ്ട്. തൻ്റെ ജോലിയുമായി ബന്ധപ്പെട്ട്, കരീബിയൻ, ആഫ്രിക്ക എന്നിവിടങ്ങളിൽ താമസിച്ചു, അവിടെ വധശിക്ഷ നേരിടുന്ന തടവുകാരുടെ കേസുകളിൽ അദ്ദേഹം പോരാടി.

1998 ൽ ലേബർ പാർട്ടിയിൽ ചേർന്ന സ്റ്റാർമർ 2001 ൽ ഹൗസ് ഓഫ് കോമൺസിലേക്ക് തിരഞ്ഞെടുക്കപ്പെട്ടു. 2007 ൽ ഗോർഡൻ ബ്രൗൺ സർക്കാരിൽ അറ്റോർണി ജനറലായി നിയമിക്കപ്പെട്ടു. 2008 മുതൽ 2013 വരെ പബ്ലിക് പ്രോസിക്യൂഷൻസ് ഡയറക്ടറായിരുന്നു. ഇംഗ്ലണ്ടിലെയും വെയിൽസിലെയും ഏറ്റവും മുതിർന്ന, ക്രിമിനൽ പ്രോസിക്യൂട്ടറുടെ തസ്തികയാണിത്.

പബ്ലിക് പ്രോസിക്യൂഷൻസ് ഡയറക്ടറായിരുന്ന കാലത്ത്, സ്റ്റീഫൻ ലോറൻസ് വധക്കേസ് ഉൾപ്പെടെ നിരവധി പ്രധാന കേസുകൾ അദ്ദേഹം കൈകാര്യം ചെയ്തിട്ടുണ്ട്. 2015ൽ നോർത്ത് ലണ്ടനിലെ ഹോൾബോൺ സെൻ്റ് പാൻക്രാസിൽ നിന്നുള്ള എംപിയായി. 2016 ൽ അദ്ദേഹം ബ്രെക്സിറ്റ് റെഫറൻഡത്തിൽ യൂറോപ്യൻ യൂണിയനിൽ തുടരാൻ വാദിച്ചു. 2019 ലെ പൊതുതെരഞ്ഞെടുപ്പിൽ പാർട്ടിയുടെ വൻ പരാജയത്തിന് ശേഷം, കെയർ സ്റ്റാർമർ ലേബർ നേതാവ് സ്ഥാനത്തേക്ക് മത്സരിക്കുകയും 2020 ൽ പാർട്ടി നേതാവാകുകയും ചെയ്തു.

രാഷ്ട്രീയത്തിലെത്തിയത് അൻപതാം വയസിൽ 

അൻപതാം വയസിലാണ് അദ്ദേഹം തിരഞ്ഞെടുപ്പ് രാഷ്ട്രീയത്തിലെത്തിയതെന്നത് ശ്രദ്ധേയമാണ്. ഫുട്ബോളിൽ ആഴ്സണൽ ക്ലബിനെ പിന്തുണയ്ക്കുന്ന കെയർ, ജനങ്ങൾക്ക് മാറ്റം വേണമെങ്കിൽ ലേബർ പാർട്ടിക്ക് വോട്ട് ചെയ്യണമെന്ന് തിരഞ്ഞെടുപ്പിന് മുമ്പ് വ്യക്തമായി പറഞ്ഞിരുന്നു. തൻ്റെ സർക്കാരിൻ്റെ മുഴുവൻ ശ്രദ്ധയും രാജ്യത്തിൻ്റെ സമ്പദ്‌വ്യവസ്ഥയും ദേശീയ ആരോഗ്യ സേവനവും മെച്ചപ്പെടുത്തുന്നതിലായിരിക്കുമെന്നും അദ്ദേഹം വ്യക്തമാക്കിയിരുന്നു.

സ്റ്റാർമർ ഒരു മിതവാദിയായ സോഷ്യലിസ്റ്റായി കണക്കാക്കപ്പെടുന്നു. സാമൂഹിക നീതി, സാമ്പത്തിക സമത്വം, പരിസ്ഥിതി സംരക്ഷണം എന്നിവയ്ക്ക് വേണ്ടി വാദിക്കുന്നു. ബ്രെക്സിറ്റിന് ശേഷം യൂറോപ്യൻ യൂണിയനുമായി അടുത്ത ബന്ധം നിലനിർത്താൻ അദ്ദേഹം ആഗ്രഹിക്കുന്നു.

ഇവിടെ വായനക്കാർക്ക് അഭിപ്രായങ്ങൾ രേഖപ്പെടുത്താം. സ്വതന്ത്രമായ ചിന്തയും അഭിപ്രായ പ്രകടനവും പ്രോത്സാഹിപ്പിക്കുന്നു. എന്നാൽ ഇവ കെവാർത്തയുടെ അഭിപ്രായങ്ങളായി കണക്കാക്കരുത്. അധിക്ഷേപങ്ങളും വിദ്വേഷ - അശ്ലീല പരാമർശങ്ങളും പാടുള്ളതല്ല. ലംഘിക്കുന്നവർക്ക് ശക്തമായ നിയമനടപടി നേരിടേണ്ടി വന്നേക്കാം.

Tags

Share this story

wellfitindia