'നമ്മള്‍ സ്വര്‍ഗത്തില്‍ കണ്ടുമുട്ടും, ഒരു നല്ല പെണ്‍കുട്ടിയാകാന്‍ ഞാന്‍ പരമാവധി ശ്രമിക്കും'; യുദ്ധത്തില്‍ കൊല്ലപ്പെട്ട അമ്മയ്ക്ക് യുക്രൈനിലെ ബാലിക എഴുതിയ ഹൃദയഭേദകമായ കത്ത് വൈറല്‍

കൈവ്: (www.kvartha.com 10.04.2022) യുദ്ധത്തില്‍ കൊല്ലപ്പെട്ട തന്റെ അമ്മയ്ക്ക് യുക്രൈനിലെ ഒരു ബാലിക എഴുതിയ ഹൃദയഭേദകമായ കത്ത് ലോകജനതയെ ആകെ നൊമ്പരപ്പെടുത്തുകയാണ്. 'ഒരു നല്ല പെണ്‍കുട്ടിയാകാന്‍ ഞാന്‍ പരമാവധി ശ്രമിക്കുമെന്നും ഞങ്ങള്‍ക്ക് സ്വര്‍ഗത്തില്‍ വീണ്ടും കണ്ടുമുട്ടാന്‍ കഴിയുമെന്നുമാണ്' ഒമ്പത് വയസ്സുള്ള പെണ്‍കുട്ടി എഴുതിയിരിക്കുന്നത്.

യുക്രൈന്‍ ആഭ്യന്തര മന്ത്രിയുടെ ഉപദേഷ്ടാവ് ആന്റന്‍ ഗെരാഷ് ചെങ്കോയാണ് കത്തിന്റെ ഫോടോ ട്വിറ്ററില്‍ പങ്കുവച്ചത്. 'ബോറോഡിയങ്കയില്‍ മരിച്ച അമ്മയ്ക്ക് ഒമ്പതു വയസ്സുള്ള മകളെഴുതിയ കത്ത്' എന്നാണ് മന്ത്രി തന്റെ ട്വിറ്ററില്‍ കുറിച്ചത്. കാറിന് നേരെ റഷ്യ നടത്തിയ ആക്രമണത്തിലാണ് പെണ്‍കുട്ടിയുടെ അമ്മ മരിച്ചതെന്ന് അപകട സ്ഥലത്തുനിന്നും ദ ന്യൂയോര്‍ക് പോസ്റ്റ് റിപോര്‍ട് ചെയ്തിരുന്നു.

കത്തിന്റെ പൂര്‍ണരൂപം

'അമ്മേ, ഈ കത്ത് നിങ്ങള്‍ക്ക് മാര്‍ച് എട്ടിനുള്ള ഒരു സമ്മാനമാണ്. എന്റെ ജീവിതത്തിലെ ഏറ്റവും മികച്ച ഒമ്പത് വര്‍ഷത്തിന് നന്ദി. എന്റെ കുട്ടിക്കാലത്തിന് ഞാന്‍ അമ്മയോട് വളരെ നന്ദിയുള്ളവളാണ്, നിങ്ങള്‍ ലോകത്തിലെ ഏറ്റവും മികച്ച അമ്മയാണ്, ഞാന്‍ നിങ്ങളെ ഒരിക്കലും മറക്കില്ല.

നിങ്ങള്‍ ആകാശത്ത് സന്തോഷമായിരിക്കണമെന്ന് ഞാന്‍ ആഗ്രഹിക്കുന്നു, നിങ്ങള്‍ സ്വര്‍ഗത്തില്‍ പോകണമെന്ന് ഞാന്‍ ആഗ്രഹിക്കുന്നു, നമുക്ക് സ്വര്‍ഗത്തില്‍ കണ്ടുമുട്ടാം. സ്വര്‍ഗത്തില്‍ പോകാനും ഒരു നല്ല പെണ്‍കുട്ടിയാകാനും ഞാന്‍ പരമാവധി ശ്രമിക്കും,'

ഗലിയ, നിന്നെ ചുംബിക്കുന്നു.