കാബൂളില്‍ യുഎസ് വിമാനത്തിന്റെ ചിറകില്‍ പിടിച്ചുകിടന്നു രക്ഷപ്പെടാന്‍ ശ്രമിക്കുന്നതിനിടെ 2 പേര്‍ താഴേക്ക് വീണ് മരിച്ചു; സംഭവത്തിന്റെ ദയനീയ വിഡിയോ പുറത്ത്

യുഎസ് വിമാനത്തിന്റെ ചിറകില്‍ പിടിച്ചുകിടന്നു രക്ഷപ്പെടാന്‍ ശ്രമിക്കുന്നതിനിടെ രണ്ട്  പേരെങ്കിലും വിമാനം പറന്നുയര്‍ന്നതോടെ നിലത്തേക്കു വീണു മരിക്കുന്നതിന്റെ ദയനീയ വിഡിയോ ദൃശ്യങ്ങളാണ് കാബൂളില്‍ നിന്നും പുറത്തുവന്നത്.

'വിമാനത്തിന്റെ ടയറുകള്‍ക്കു സമീപം ഒളിച്ചിരുന്നോ ചിറകില്‍ പിടിച്ചു കിടന്നോ രക്ഷപ്പെടാന്‍ ശ്രമിച്ച മൂന്നു പേര്‍ വിമാനം പറന്നുയരാന്‍ തുടങ്ങിയതോടെ പിടിവിട്ട് കാബൂളിലെ താമസക്കാരുടെ വീടിനു മുകളിലാണു വന്നു വീണത്. വിമാനത്തിന്റെ ചക്രത്തോട് ചേര്‍ത്ത് ശരീരം കയര്‍കൊണ്ട് കെട്ടിയാണ് ഇവര്‍ അഫ്ഗാന്‍ വിടാന്‍ ശ്രമിച്ചത്. എന്നാല്‍ ശ്രമം വിഫലമാവുകയായിരുന്നു. കാബൂളിലെ ദൗര്‍ഭാഗ്യ സംഭവങ്ങളുടെ തുടര്‍ച്ചയായാണ് അവര്‍ക്കു ജീവന്‍ നഷ്ടമായത്' എന്ന് അഫ്ഗാന്‍ ചാനലായ ടോളോ ന്യൂസിലെ ജിവനക്കാരന്‍ താരിഖ് മജീദി പറഞ്ഞു.

ട്വിറ്ററിലെ കുറിപ്പിനൊപ്പം സംഭവത്തിന്റെ വിഡിയോയും അദ്ദേഹം പങ്കുവച്ചു. റണ്‍വേയില്‍ നൂറുകണക്കിന് ആളുകള്‍ യുഎസ് വ്യോമസേനയുടെ വിമാനത്തിനു പിന്നാലെ ഓടുകയും വിമാനത്തിന്റെ ചിറകില്‍ പിടിച്ചുകയറാന്‍ ശ്രമിക്കുകയും ചെയ്യുന്ന വിഡിയോകളും പുറത്തുവന്നു. കാബൂള്‍ വിമാനത്താവളത്തില്‍ ഉണ്ടായ തിക്കിലും തിരക്കിലും പെട്ടു കുറഞ്ഞത് അഞ്ചു പേരെങ്കിലും മരിച്ചതായാണു പുറത്തുവരുന്ന റിപോര്‍ടുകള്‍.