ജനത എതിരാകുമെന്ന് അറിഞ്ഞിട്ടും അമേരിക്കൻ തിരഞ്ഞെടുപ്പിന് മണിക്കൂറുകൾക്ക് മുമ്പ് ഇറാന് മേൽ യുഎസ് ആക്രമണം നടത്തിയത് എന്തിന്? ട്രംപും നെതന്യാഹുവും ലക്ഷ്യമിടുന്നത്!

(KVARTHA) അമേരിക്കയിൽ അതീവ നിർണായകമായ ഇടക്കാല തിരഞ്ഞെടുപ്പിന്റെ വോട്ടെടുപ്പിന് തൊട്ടുമുമ്പുള്ള മണിക്കൂറുകളിൽ  യു എസ് നടത്തിയ വ്യോമാക്രമണം പശ്ചിമേഷ്യയെ വീണ്ടും വൻ യുദ്ധഭീതിയിലേക്ക് തള്ളിയിട്ടിരിക്കുകയാണ്. ഹോർമുസ് കടലിടുക്കിലും ഖേഷം ദ്വീപുകളിലുമുള്ള ഇറാനിയൻ സൈനിക കേന്ദ്രങ്ങൾക്ക് നേരെ അമേരിക്കൻ സേന 'പ്രതിരോധ ആക്രമണം' നടത്തിയതായി പെന്റഗണും വൈറ്റ് ഹൗസും സ്ഥിരീകരിച്ചു. 

മാസങ്ങളായി തുടരുന്ന സംഘർഷത്തിൽ ഖത്തറിന്റെയും ഒമാന്റെയും മധ്യസ്ഥതയിൽ സമാധാന ചർച്ചകൾ പുരോഗമിക്കവെയാണ് അപ്രതീക്ഷിതമായി ഡൊണാൾഡ് ട്രംപ് ഭരണകൂടം ബോംബാക്രമണത്തിന് ഉത്തരവിട്ടത്. ഈ സൈനിക നീക്കം വെറുമൊരു പ്രതിരോധ തന്ത്രമാണോ അതോ തിരഞ്ഞെടുപ്പ് വോട്ടുപെട്ടി ലക്ഷ്യമിട്ടുള്ള രാഷ്ട്രീയ ചൂതാട്ടമാണോ എന്ന ചോദ്യമാണ് അന്താരാഷ്ട്ര നിരീക്ഷകർ ഉയർത്തുന്നത്.

രാഷ്ട്രീയ അജണ്ട

അമേരിക്കൻ ആഭ്യന്തര രാഷ്ട്രീയത്തിൽ യുദ്ധങ്ങൾ എപ്പോഴും രാഷ്ട്രീയ ആയുധമാക്കപ്പെട്ടിട്ടുണ്ട്. മിഡ്‌ടേം തിരഞ്ഞെടുപ്പിൽ റിപ്പബ്ലിക്കൻ പാർട്ടി കടുത്ത വെല്ലുവിളി നേരിടുന്ന സമയത്താണ് ഈ സൈനിക നീക്കം ഉണ്ടായിരിക്കുന്നത്. വോട്ടർമാർ വിലക്കയറ്റത്തിലും ഇന്ധനവില വർദ്ധനവിലും വലയുമ്പോൾ ജനശ്രദ്ധ മാറ്റി തിരിക്കാനുള്ള ശ്രമമാണ് നടക്കുന്നത്. 

'ശക്തനായ ഭരണാധികാരി' എന്ന പ്രതിച്ഛായ വീണ്ടെടുക്കാനും ദേശീയ സുരക്ഷ പ്രധാന ചർച്ചാവിഷയമാക്കാനും ട്രംപ് ആഗ്രഹിക്കുന്നുണ്ട്. ആഗോളതലത്തിൽ ഇറാന്റെ ആണവ-സൈനിക ശേഷിയെ തകർക്കുക എന്നതിനേക്കാൾ അമേരിക്കയ്ക്കുള്ളിലെ യാഥാസ്ഥിതിക വോട്ടർമാരെ തൃപ്തിപ്പെടുത്തുകയാണ് ട്രംപിന്റെ ലക്ഷ്യം. 

മുൻപും തിരഞ്ഞെടുപ്പുകൾക്ക് തൊട്ടുമുമ്പ് വിദേശ നയങ്ങളിൽ മാറ്റം വരുത്തുന്നത് ട്രംപിന്റെ രീതിയായിരുന്നു. പശ്ചിമേഷ്യയിലെ സംഘർഷം സ്വന്തം രാഷ്ട്രീയ നേട്ടത്തിനായി ഉപയോഗിക്കുന്നു എന്ന രൂക്ഷമായ വിമർശനമാണ് ഡെമോക്രാറ്റിക് പാർട്ടി കേന്ദ്രങ്ങൾ ഉയർത്തുന്നത്.

നയതന്ത്ര ചർച്ചകളിൽ അമേരിക്കൻ നിബന്ധനകൾ അംഗീകരിക്കാൻ ഇറാന് മേൽ സമ്മർദം ചെലുത്തുക എന്ന തന്ത്രവും ഇതിനു പിന്നിലുണ്ട്. എന്നാൽ ഈ തന്ത്രം തിരിഞ്ഞുകൊത്താനുള്ള സാധ്യതകളാണ് നിലവിലുള്ളത്. വിദേശ യുദ്ധങ്ങളിൽ അമേരിക്കൻ പണം പാഴാക്കുന്നതിനെതിരെ സ്വന്തം അനുഭാവികൾക്കിടയിൽ പോലും അമർഷം പുകയുന്നുണ്ട്. ട്രംപിന്റെ 'അമേരിക്ക ഫസ്റ്റ്' നയത്തിന് തികച്ചും വിരുദ്ധമാണ് ഇത്തരമൊരു ദീർഘകാല സംഘർഷമെന്ന് രാഷ്ട്രീയ വിചക്ഷണർ ചൂണ്ടിക്കാണിക്കുന്നു.

സമ്പദ്‌വ്യവസ്ഥയുടെ പതനം

ഇറാനുമായുള്ള യുദ്ധം ആരംഭിച്ച് എട്ട് മാസത്തോളമാകുമ്പോൾ അമേരിക്കൻ സാമ്പത്തിക രംഗം വൻ പ്രതിസന്ധിയാണ് നേരിടുന്നത്.  റിപ്പോർട്ടുകൾ പ്രകാരം യുദ്ധച്ചിലവ് 47 ശതകോടി ഡോളർ കവിഞ്ഞു കഴിഞ്ഞു. പണപ്പെരുപ്പവും ഇന്ധന വിലവർദ്ധനവും അമേരിക്കയിലെ സാധാരണക്കാരന്റെ ജീവിത ഭാരം ഇരട്ടിയാക്കി. തിരഞ്ഞെടുപ്പ് വോട്ടെടുപ്പുകളിൽ സാമ്പത്തിക പ്രതിസന്ധി തന്നെയാണ് പ്രധാന വിഷയമായി ഉയർന്നുവന്നത്.

ഹോർമുസ് കടലിടുക്കിൽ എണ്ണക്കപ്പലുകൾക്ക് നേരെയുണ്ടാകുന്ന ആക്രമണങ്ങൾ അന്താരാഷ്ട്ര വിപണിയിൽ എണ്ണവില ഗണ്യമായി ഉയർത്തിയിട്ടുണ്ട്. ക്രൂഡ് ഓയിൽ വിതരണം തടസ്സപ്പെട്ടതോടെ ഏഷ്യൻ, യൂറോപ്യൻ രാജ്യങ്ങളും സമാനമായ സാമ്പത്തിക ഞെരുക്കത്തിലാണ്. ഇന്ധന വില ലിറ്ററിന് വലിയ തോതിൽ വർദ്ധിച്ചത് റിപ്പബ്ലിക്കൻ സ്ഥാനാർത്ഥികളുടെ പ്രചാരണത്തെ ദോഷകരമായി ബാധിച്ചിട്ടുണ്ട്. യുദ്ധം ഉടൻ അവസാനിക്കുമെന്ന ട്രംപിന്റെ വാഗ്ദാനങ്ങൾ ജനം വിശ്വസിക്കാത്ത അവസ്ഥയിലെത്തി നിൽക്കുന്നു.

വ്യവസായ ശൃംഖല തകരാറിലായതോടെ ചെറുകിട കച്ചവടക്കാരും കർഷകരും വലിയ ദുരിതത്തിലാണ്. യുദ്ധത്തിന് ഉപയോഗിക്കുന്ന ശതകോടി ഡോളർ ആഭ്യന്തര വികസനത്തിന് ഉപയോഗിക്കണമെന്ന വാദം ജനങ്ങൾക്കിടയിൽ ശക്തമാകുന്നുണ്ട്. അമേരിക്കൻ സാമ്പത്തിക സ്ഥിരതയെ തകർക്കുന്ന ഈ നിലപാട് തിരഞ്ഞെടുപ്പിൽ തിരിച്ചടിയാകുമോ എന്ന ഭയത്തിലാണ് റിപ്പബ്ലിക്കൻ ക്യാമ്പ്.

നെതന്യാഹുവിന്റെ പങ്ക്

ഈ പശ്ചിമേഷ്യൻ സംഘർഷത്തിന് പിന്നിൽ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ വലിയ രാഷ്ട്രീയ അജണ്ട അടങ്ങിയിട്ടുണ്ടെന്ന് അന്താരാഷ്ട്ര മാധ്യമങ്ങൾ സാക്ഷ്യപ്പെടുത്തുന്നു. ഇസ്രായേലിലെ ആഭ്യന്തര രാഷ്ട്രീയ പ്രതിസന്ധികളും തിരഞ്ഞെടുപ്പ് തിരിച്ചടികളും മറികടക്കാൻ നെതന്യാഹുവിന് അമേരിക്കയെ ഇറാനെതിരെ ഉപയോഗിക്കേണ്ടതുണ്ട്.

തിരഞ്ഞെടുപ്പിന് മുമ്പ് തന്നെ ഇറാറാനെതിരെ ശക്തമായ തിരിച്ചടി വേണമെന്ന് നെതന്യാഹു ട്രംപിനോട് ടെലിഫോൺ സംഭാഷണത്തിൽ ആവശ്യപ്പെട്ടതായി റിപ്പോർട്ടുകളുണ്ട്. തന്റെ സഖ്യസർക്കാരിന്റെ നിലനിൽപ്പിനായി പശ്ചിമേഷ്യയിൽ യുദ്ധ അന്തരീക്ഷം നിലനിർത്തുന്നത് നെതന്യാഹുവിന് അത്യാവശ്യമാണ്. 

അമേരിക്കൻ സൈനിക ബലം ഉപയോഗിച്ച് ശത്രുരാജ്യങ്ങളെ തളയ്ക്കുക എന്ന ഇസ്രായേലിന്റെ തന്ത്രത്തിന് ട്രംപ് വീണ്ടും വഴങ്ങിക്കൊടുക്കുകയാണുണ്ടായത്. ഇത് അമേരിക്കയുടെ മാത്രം ആവശ്യമല്ല, മറിച്ച് നെതന്യാഹുവിന്റെ രാഷ്ട്രീയ രക്ഷപ്പെടൽ കൂടിയാണ്.

വാഷിംഗ്ടണും ടെൽ അവീവും തമ്മിലുള്ള ഈ കൂട്ടുകെട്ട് പശ്ചിമേഷ്യയെ കൂടുതൽ നാശത്തിലേക്ക് തള്ളിയിടുന്നു. ഇസ്രായേലിന്റെ ആവശ്യങ്ങൾക്ക് മുൻഗണന നൽകുന്നതിലൂടെ അമേരിക്കൻ ജനതയുടെ താൽപ്പര്യങ്ങളാണ് ട്രംപ് ഭരണകൂടം ബലികഴിക്കുന്നത്. ഈ കൂട്ടുകെട്ടിനെതിരെ അമേരിക്കയിലെ വോട്ടർമാർക്കിടയിലും അന്താരാഷ്ട്ര സമൂഹത്തിലും കടുത്ത അമർഷമുണ്ട്.

ആഗോള പ്രത്യാഘാതങ്ങൾ

അമേരിക്കൻ ആക്രമണത്തിന് പിന്നാലെ ഇറാൻ പാർലമെന്റ് സ്പീക്കർ മുഹമ്മദ് ബാഗർ ഘാലിബാഫ് നൽകിയ മുന്നറിയിപ്പ് സ്ഥിതിഗതികൾ കൂടുതൽ വഷളാക്കുന്നു. 'ഇറാൻ സജ്ജമാണ്' എന്ന അദ്ദേഹത്തിന്റെ പ്രസ്താവന ഏത് നിമിഷവും ഒരു സമ്പൂർണ യുദ്ധത്തിലേക്ക് കാര്യങ്ങൾ എത്തിക്കാം. 

യെമനിലെ ഹൂതി വിമതരും ഇറാഖിലെ ഷിയാ സംഘവും തിരിച്ചടിക്ക് ഒരുങ്ങുന്നത് സൗദി അറേബ്യ ഉൾപ്പെടെയുള്ള മറ്റ് ഗൾഫ് രാജ്യങ്ങളുടെ സുരക്ഷയെയും സാരമായി ബാധിക്കുന്നു.

ചൈനയും പാകിസ്ഥാനും തുർക്കിയും ഉൾപ്പെടെയുള്ള രാജ്യങ്ങൾ സമാധാന ചർച്ചകൾക്ക് മുൻകൈ എടുത്തെങ്കിലും ആക്രമണം കാര്യങ്ങളെ സങ്കീർണമാക്കി. 

ചൈന ഒമാനുമായി ചേർന്ന് ഉച്ചകോടി നടത്തുകയും നയതന്ത്ര ചർച്ചകൾക്ക് ആഹ്വാനം ചെയ്യുകയും ചെയ്തിട്ടുണ്ട്. ഏഷ്യ-പസഫിക് രാജ്യങ്ങൾ അമേരിക്കൻ ഉപരോധങ്ങളിലും യുദ്ധത്തിലും പ്രതിഷേധിച്ച് രംഗത്തെത്തിയിട്ടുണ്ട്.

ഇന്ത്യൻ വാണിജ്യ കപ്പലുകൾക്ക് നേരെ ഒമാൻ തീരത്തുണ്ടായ ആക്രമണവും കപ്പൽ ജീവനക്കാരുടെ മരണവും അന്താരാഷ്ട്ര സമുദ്ര സുരക്ഷയെ ചോദ്യം ചെയ്യുന്നതാണ്. ആഗോള വിതരണ ശൃംഖല പൂർണമായി അടഞ്ഞുകിടക്കാൻ ഇത് കാരണമാകും. സമാധാനപരമായ ചർച്ചകളിലൂടെ പ്രശ്നം പരിഹരിച്ചില്ലെങ്കിൽ ലോകം വൻ സാമ്പത്തിക മാന്ദ്യത്തിലേക്ക് കൂപ്പുകുത്തും എന്നതിൽ സംശയമില്ല.

ട്രംപിന്റെ വിധിദിനം 

മിഡ്‌ടേം തിരഞ്ഞെടുപ്പിന്റെ ഫലം ട്രംപിന്റെ യുദ്ധക്കൊതിക്കുള്ള ജനങ്ങളുടെ മറുപടിയായിരിക്കും. ഒരു വശത്ത് ഇറാന്റെ പരമാധികാരത്തിന്മേലുള്ള കടന്നുകയറ്റവും മറു വശത്ത് സ്വന്തം രാജ്യത്തെ ജനങ്ങളുടെ സാമ്പത്തിക തകർച്ചയും ട്രംപിന് തിരിച്ചടിയാകുമോ എന്ന് ഏതാനും മണിക്കൂറുകൾക്കകം അറിയാം.

വോട്ടർമാർ യുദ്ധത്തോട് 'നോ' പറഞ്ഞാൽ അത് ട്രംപിന്റെ വിദേശനയങ്ങൾക്കുള്ള മരണമണിയാകും. തിരഞ്ഞെടുപ്പ് ജയിക്കാൻ യുദ്ധം ഒരു ആയുധമാക്കുന്ന അപകടകരമായ ട്രെൻഡിനാണ് ട്രംപ് തുടക്കമിട്ടിരിക്കുന്നത്. അധികാരത്തിലെത്താനും നിലനിർത്താനും ലോകസമാധാനം പണയം വെക്കുന്ന ഈ രാഷ്ട്രീയം തികച്ചും അപലപനീയമാണ്.

അമേരിക്കയിലെ വോട്ടർമാർ കൂടുതൽ വിവേകത്തോടെ ചിന്തിക്കുമെന്നും ആഗോള സമാധാനത്തിന് അനുകൂലമായി വിധി എഴുതുമെന്നുമാണ് ലോകം പ്രതീക്ഷിക്കുന്നത്. ഹോർമുസ് കടലിടുക്കിൽ ഉയരുന്ന പുകപടലങ്ങൾ വെറുമൊരു പ്രാദേശിക തർക്കമല്ല, മറിച്ച് ലോകാവസാനത്തിലേക്ക് വഴിതുറക്കുന്ന ഒരു വലിയ മഹാമാരിയുടെ തുടക്കമാകരുത്. 

ട്രംപിന്റെയും നെതന്യാഹുവിന്റെയും മുൻകോപത്തിനും രാഷ്ട്രീയ അജണ്ടകൾക്കും അന്താരാഷ്ട്ര സമൂഹം വില കൊടുക്കേണ്ടി വരുന്നത് അനീതിയാണ്. അമേരിക്കയിൽ നിന്ന് പുറത്തുവരുന്ന ജനവിധി പശ്ചിമേഷ്യയുടെ മാത്രമല്ല, ലോകത്തിന്റെ തന്നെ ഭാവി നിർണയിക്കും.

ഈ അന്താരാഷ്ട്ര വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: US launches airstrikes on Iran hours before midterm elections, raising economic and political concerns.

#Kvartha #USElections2026 #USIranConflict #DonaldTrump #MiddleEastCrisis #InternationalNewsMalayalam #SobhaNews