ഇറാന് മേൽ അമേരിക്കയുടെ മിന്നലാക്രമണം; തിരിച്ചടിച്ച് ഐആർജിസി, കുവൈറ്റിലും ബഹ്റൈനിലും യുഎസ് താവളങ്ങൾക്ക് നേരെ മിസൈൽ മഴ

ടെഹ്റാൻ: (KVARTHA) പശ്ചിമേഷ്യയിൽ വീണ്ടും യുദ്ധഭീതി ഉയർത്തി ഇറാനും അമേരിക്കയും തമ്മിൽ കനത്ത സൈനിക ഏറ്റുമുട്ടൽ. കഴിഞ്ഞ ദിവസം രാത്രി ഇറാനിലെ മൂന്ന് നഗരങ്ങളിലായി നിരവധി ഇടങ്ങളിൽ അമേരിക്കൻ സേന വ്യോമാക്രമണം നടത്തി. ഇതിന് ശക്തമായ മറുപടിയെന്നോണം മേഖലയിലെ എൺപത്തഞ്ച് പ്രധാന അമേരിക്കൻ സൈനിക കേന്ദ്രങ്ങൾക്ക് നേരെ ഇറാൻ്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് (IRGC) മിസൈൽ ആക്രമണം നടത്തി. ഏപ്രിൽ മാസത്തിൽ വെടിനിർത്തൽ പ്രഖ്യാപിച്ചതിന് ശേഷം ഇറാനിയൻ സൈനിക കേന്ദ്രങ്ങൾക്ക് നേരെ അമേരിക്ക നടത്തുന്ന ഏറ്റവും വലിയ ആക്രമണമാണിത്.

ഖേഷ്ം ദ്വീപ്, ഹോർമുസ് കടലിടുക്കിന് അഭിമുഖമായി നിൽക്കുന്ന സിരിക്, ബന്ദർ അബ്ബാസ് എന്നീ നഗരങ്ങളിലാണ് അമേരിക്കൻ സേന പ്രധാനമായും ലക്ഷ്യമിട്ടത്. ഖേഷ്ം ദ്വീപിലെ ഏഴ് കേന്ദ്രങ്ങളിലും സിരികിലെ ആറ് സ്ഥലങ്ങളിലുമാണ് ആക്രമണം നടന്നത്. ബന്ദർ അബ്ബാസിലെ വാർത്താവിനിമയ ടവറുകൾ ഉൾപ്പെടെ 10 കേന്ദ്രങ്ങളിൽ ആക്രമണം നടന്നതായി ഇറാൻ അധികൃതർ സ്ഥിരീകരിച്ചു.

ഇതിന് പിന്നാലെയാണ് ഇറാൻ്റെ തിരിച്ചടിയുണ്ടായത്. ബഹ്റൈനിലെ സൽമാൻ പോർട്ടിലുള്ള യുഎസ് ഫിഫ്ത് ഫ്ലീറ്റ് ആസ്ഥാനം, കുവൈറ്റിലെ അലി അൽ സലീം എയർ ബേസ് എന്നിവയുൾപ്പെടെ 85 അമേരിക്കൻ സൈനിക കേന്ദ്രങ്ങൾക്ക് നേരെ തങ്ങളുടെ നാവിക, വ്യോമ സേനകൾ സംയുക്തമായി ഡ്രോൺ, മിസൈൽ ആക്രമണങ്ങൾ നടത്തിയതായി ഐആർജിസി അവകാശപ്പെട്ടു. ഇറാൻ്റെ തെക്കൻ മേഖലയിൽ വെച്ച് അമേരിക്കയുടെ എംക്യു-9 ഡ്രോൺ വെടിവെച്ചിട്ടതായും ഐആർജിസി വ്യക്തമാക്കി. ആക്രമണങ്ങളുടെ പശ്ചാത്തലത്തിൽ ബഹ്റൈനിൽ ജനങ്ങൾക്ക് മുന്നറിയിപ്പ് നൽകുന്നതിനായി രണ്ട് തവണ സൈറണുകൾ മുഴക്കി. ജനങ്ങളോട് ഏറ്റവും അടുത്തുള്ള സുരക്ഷിത സ്ഥാനത്തേക്ക് മാറാൻ ബഹ്റൈൻ ആഭ്യന്തര മന്ത്രാലയം നിർദേശിച്ചിട്ടുണ്ട്.

കരാർ ലംഘനമെന്ന് ഇറാൻ

വാഷിംഗ്ടണും ടെഹ്റാനും തമ്മിലുള്ള ധാരണാപത്രത്തിൻ്റെ വലിയ ലംഘനമാണ് അമേരിക്കയുടെ ആക്രമണമെന്ന് ഇറാൻ്റെ ചീഫ് നെഗോഷ്യേറ്ററും പാർലമെൻ്റ് സ്പീക്കറുമായ മുഹമ്മദ് ബാഗർ ഗാലിബാഫ് ആരോപിച്ചു. ഹോർമുസ് കടലിടുക്കിലെ ഇറാൻ്റെ ക്രമീകരണങ്ങളിലുള്ള അമേരിക്കൻ ഇടപെടൽ, തുടർച്ചയായ യുഎസ് ആക്രമണ ഭീഷണി, ഇറാൻ്റെ എണ്ണ മേഖലയ്ക്ക് മേലുള്ള ഉപരോധം പുനഃസ്ഥാപിക്കൽ, ലെബനാനിലെ ഇസ്റാഈലിൻ്റെ നിരന്തരമായ കരാർ ലംഘനങ്ങൾ എന്നിവ ഇതിൽ ഉൾപ്പെടുന്നുവെന്ന് അദ്ദേഹം ചൂണ്ടിക്കാട്ടി. 'ഭീഷണിയുടെയും ഭീഷണിപ്പെടുത്തി പണം തട്ടുന്നതിൻ്റെയും കാലം കഴിഞ്ഞു' എന്ന് മുന്നറിയിപ്പ് നൽകിയ അദ്ദേഹം, ഇത്തരം സമ്മർദ്ദങ്ങൾ എങ്ങുമെത്തില്ലെന്നും കൂട്ടിച്ചേർത്തു.

നേരത്തെ ഹോർമുസ്ഗാൻ, മഹ്ശഹർ എന്നിവിടങ്ങളിലെ തീരദേശ താവളങ്ങളിലും സൈനികേതര സ്റ്റേഷനുകളിലും അമേരിക്ക നടത്തിയ വ്യോമാക്രമണങ്ങൾക്കുള്ള പ്രാഥമിക മറുപടിയാണ് തങ്ങളുടെ ഓപ്പറേഷൻ എന്ന് ഐആർജിസി വ്യക്തമാക്കി. അമേരിക്കയുടേത് വെടിനിർത്തലിൻ്റെയും ഇസ്‌ലാമാബാദ് കരാറിൻ്റെയും ലംഘനമാണെന്നും അവർ ആരോപിച്ചു.

അമേരിക്കയുടെ വാദം

ഹോർമുസ് കടലിടുക്കിൽ വാണിജ്യ കപ്പലുകൾക്ക് നേരെ ഇറാൻ നടത്തുന്ന ആക്രമണങ്ങൾക്കുള്ള മറുപടിയാണ് തങ്ങളുടെ നടപടിയെന്ന് അമേരിക്ക പ്രതികരിച്ചു. നാഷണൽ ഡിഫൻസ് യൂണിവേഴ്സിറ്റിയിലെ പ്രൊഫസറും പെൻ്റഗൺ ഗൾഫ് മുൻ ഡയറക്ടറുമായ ഡേവിഡ് ഡെസ് റോച്ചസിൻ്റെ അഭിപ്രായത്തിൽ, ധാരണാപത്രത്തിലെ അഞ്ചാം വകുപ്പ് ഇറാൻ ലംഘിച്ചതാണ് പ്രകോപനത്തിന് കാരണം. നാലാം വകുപ്പ് പ്രകാരം ഇറാൻ്റെ എണ്ണ വിൽക്കാൻ അമേരിക്ക അനുവദിച്ചിരുന്നു. എന്നാൽ വാണിജ്യ കപ്പലുകൾക്ക് തടസ്സമില്ലാതെ സഞ്ചരിക്കാൻ അനുവദിക്കണമെന്ന അഞ്ചാം വകുപ്പിലെ വ്യവസ്ഥ ഇറാൻ ലംഘിച്ചു. ഇതിന് പകരമായാണ് എണ്ണ വിൽപ്പനയ്ക്കുള്ള ഇളവുകൾ എടുത്തുകളഞ്ഞതും കപ്പലുകളെ ആക്രമിക്കാനുള്ള ഇറാൻ്റെ ശേഷിക്ക് നേരെ ആക്രമണം നടത്തിയതെന്നും അദ്ദേഹം പറഞ്ഞതായി അൽ ജസീററിപ്പോർട്ട് ചെയ്തു. എങ്കിലും ഇതിനെ പരിമിതമായ ഒരു തിരിച്ചടിയായി മാത്രമേ കാണാനാകൂ എന്നും അദ്ദേഹം വിലയിരുത്തി.

സംസ്കാര ചടങ്ങിനിടെ ആക്രമണം

യുഎസ്-ഇസ്റാഈൽ ആക്രമണത്തിൽ കൊല്ലപ്പെട്ട ഇറാൻ്റെ മുൻ പരമോന്നത നേതാവ് ആയത്തുല്ല അലി ഖാംനഈയുടെ ഏഴ് ദിവസം നീളുന്ന സംസ്കാര ചടങ്ങുകൾ പുരോഗമിക്കുന്നതിനിടെയാണ് അമേരിക്ക പുതിയ ആക്രമണം നടത്തിയത്. ചടങ്ങുകൾ തീരുന്നതുവരെ ആക്രമണങ്ങൾ നിർത്തിവെക്കുമെന്ന് അമേരിക്കൻ പ്രസിഡൻ്റ് ഡോണൾഡ് ട്രംപ് നേരത്തെ ഉറപ്പുനൽകിയിരുന്നു. ഈ ചരിത്രപരമായ സംഭവം അട്ടിമറിക്കാനാണ് വാഷിംഗ്ടൺ ശ്രമിക്കുന്നതെന്ന് ഐആർജിസി ആരോപിച്ചു.

സംഘർഷത്തിൻ്റെ നാൾവഴി

കഴിഞ്ഞ ജൂൺ 24 നാണ് ഗൾഫിൽ കുടുങ്ങിയ കപ്പലുകളെ ഒഴിപ്പിക്കുന്നതിനായി ഒമാൻ്റെ തീരത്തുകൂടി അമേരിക്കയുടെ മേൽനോട്ടത്തിൽ പുതിയൊരു താൽക്കാലിക പാത ഐഎംഒ (IMO) പ്രഖ്യാപിച്ചത്. എന്നാൽ തങ്ങളോട് ആലോചിക്കാതെയാണ് ഇത് ചെയ്തതെന്നാരോപിച്ച ഇറാൻ, ഈ പാത ഉപയോഗിക്കുന്ന കപ്പലുകൾക്ക് മുന്നറിയിപ്പ് നൽകി. ദിവസങ്ങൾക്ക് ശേഷം ഒമാൻ പാത ഉപയോഗിച്ച രണ്ട് കപ്പലുകൾ ആക്രമിക്കപ്പെട്ടതോടെ ഐഎംഒയുടെ ഒഴിപ്പിക്കൽ പദ്ധതി നിർത്തിവെച്ചു. ഇതിന് മറുപടിയായി ജൂൺ 26, 27 തീയതികളിൽ ഇറാൻ്റെ തെക്കൻ തീരത്ത് അമേരിക്ക ആക്രമണം നടത്തി. ഇതിന് പകരമായി ബഹ്റൈനിലെയും കുവൈറ്റിലെയും യുഎസ് താവളങ്ങളിലേക്ക് ഇറാൻ മിസൈലുകൾ തൊടുത്തുവിട്ടു.

തുടർന്ന് ജൂൺ 28 ന് ഇരുപക്ഷവും ശത്രുത അവസാനിപ്പിക്കുകയും ജൂലൈ ഒന്നിന് ഖത്തറിൽ വെച്ച് കൂടുതൽ പരോക്ഷ ചർച്ചകൾ നടത്തുകയും ചെയ്തു. എന്നാൽ ചൊവ്വാഴ്ച (ജൂലൈ 7) ഹോർമുസ് കടലിടുക്കിൽ മൂന്ന് കപ്പലുകൾ കൂടി ആക്രമിക്കപ്പെട്ടതോടെയാണ് അമേരിക്ക വീണ്ടും ഇറാന് നേരെ കടുത്ത ആക്രമണം അഴിച്ചുവിട്ടത്. ഇതിന് ഇറാൻ കൂടുതൽ മിസൈലുകൾ ഉപയോഗിച്ച് തിരിച്ചടിക്കുകയും ചെയ്തു. ഹോർമുസ് കടലിടുക്കിലെ കപ്പലുകളുടെ സുരക്ഷാ ചുമതല തങ്ങൾക്കാണെന്ന് ഇറാൻ വാദിക്കുമ്പോൾ, സുരക്ഷിതമായ പാത ഒരുക്കുക മാത്രമാണ് ഇറാൻ്റെ ഉത്തരവാദിത്തമെന്ന് അമേരിക്കയും വാദിക്കുന്നു.

അന്താരാഷ്ട്ര രാഷ്ട്രീയത്തിലെ ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: The US launched major overnight strikes on multiple locations in Iran, prompting the IRGC to retaliate by attacking 85 US military sites across the region amid escalating tensions.

#IranUSConflict #StraitOfHormuz #QeshmIsland #IRGCMissiles #MiddleEastTensions #WorldNews #AyatollahKhamenei #AmmuNews