Fuel Price | പുതുവർഷ സമ്മാനവുമായി യുഎഇ! പെട്രോൾ, ഡീസൽ വില കുറച്ചു

ദുബൈ: (KVARTHA) പ്രവാസികൾക്ക് പുതുവർഷ സമ്മാനം. 2024 ജനുവരി മാസത്തിൽ പെട്രോള്‍, ഡീസല്‍ വില കുറയ്ക്കാന്‍ ഇന്ധന വില നിര്‍ണയ സമിതി തീരുമാനിച്ചു. ജനുവരി ഒന്ന് മുതൽ സൂപ്പർ 98 പെട്രോൾ ലിറ്ററിന് 2.82 ദിർഹവും സ്‌പെഷ്യൽ 95 പെട്രോൾ ലിറ്ററിന് 2.71 ദിർഹവും ഇ-പ്ലസ് 91 പെട്രോളിന് ലിറ്ററിന് 2.64 ദിർഹവുമായിരിക്കും നിരക്ക്. ഡീസൽ വില ലിറ്ററിന് മൂന്ന് ദിർഹമായും തീരുമാനിച്ചു.


ഡിസംബറിൽ സൂപ്പർ 98 - 2.96 ദിർഹം, സ്‌പെഷ്യൽ 95 - 2.85 ദിർഹം, ഇ-പ്ലസ് 91 - 2.77 ദിർഹം, ഡീസൽ - 3.19 ദിർഹം എന്നിങ്ങനെയായിരുന്നു വില. പെട്രോൾ വില 13 മുതൽ 14 ഫിൽസും ഡീസൽ ലിറ്ററിന് 19 ഫിൽസുമാണ് ഇപ്പോൾ കുറച്ചത്. യുഎഇയുടെ ഇന്ധന വില നിര്‍ണയ സമിതി എല്ലാ മാസവും യോഗം ചേർന്നാണ് പെട്രോൾ, ഡീസൽ നിരക്കുകൾ നിർണയിക്കുന്നത്. പുതിയ നിരക്കുകൾ ജനുവരി ഒന്ന് മുതൽ ബാധകമാണ്.

തുടർച്ചയായ ആക്രമണങ്ങളും സംഘർഷങ്ങളും ഉണ്ടായിരുന്നിട്ടും ചില പ്രധാന വാണിജ്യ കപ്പലുകൾ ചെങ്കടൽ വഴി കടന്നുപോകുന്നത് പുനരാരംഭിച്ചിട്ടുണ്ട്. ഇതോടെ ആഗോള എണ്ണവിലയിൽ കാര്യമായ മാറ്റമുണ്ടായില്ല.