ചൈനയുമായി അടുത്താൽ 100 ശതമാനം 'പ്രതികാരച്ചുങ്കം'; കാനഡയ്ക്ക് മുന്നറിയിപ്പുമായി അമേരിക്കൻ പ്രസിഡൻ്റ് ട്രംപ്

വാഷിംഗ്ടൺ: (KVARTHA) ചൈനയുമായി വ്യാപാരബന്ധത്തിൽ ഏർപ്പെട്ടാൽ കാനഡയ്ക്ക് മേൽ 100 ശതമാനം ചുങ്കം ചുമത്തുമെന്ന് അമേരിക്കൻ പ്രസിഡൻ്റ് ഡോണൾഡ് ട്രംപ്. കനേഡിയൻ പ്രധാനമന്ത്രി മാർക്ക് കാർണി ഈയിടെ ചൈന സന്ദർശിക്കുകയും ഇരുരാജ്യങ്ങളും തമ്മിലുള്ള വ്യാപാര സഹകരണം മെച്ചപ്പെടുത്താൻ തീരുമാനിക്കുകയും ചെയ്ത സാഹചര്യത്തിലാണ് ട്രംപിന്റെ ഭീഷണി. സ്വന്തം സമൂഹമാധ്യമമായ 'ട്രൂത്ത് സോഷ്യലി'ലൂടെയാണ് ട്രംപ് പ്രതികാരച്ചുങ്കം പ്രഖ്യാപിച്ചത്.

തുടക്കത്തിൽ, മാർക്ക് കാർണിയുടെ ചൈന സന്ദർശനത്തിന് പിന്നാലെ ചൈനയുമായി വ്യാപാരബന്ധമുണ്ടാകുന്നത് നല്ലതാണെന്ന അഭിപ്രായമായിരുന്നു ട്രംപിനുണ്ടായിരുന്നത്. എന്നാൽ, ഗ്രീൻലൻഡ് പിടിച്ചടക്കാനുള്ള ട്രംപിൻ്റെ നീക്കങ്ങളെ കാർണി പരസ്യമായി വിമർശിച്ചതോടെയാണ് ട്രംപ് നിലപാട് മാറ്റിയത്. ഇതിന് പിന്നാലെയാണ് കാനഡയ്‌ക്കെതിരെ കടുത്ത സാമ്പത്തിക നടപടികളുമായി മുന്നോട്ട് പോകുമെന്ന് അദ്ദേഹം വ്യക്തമാക്കിയത്.

‘ചൈന കാനഡയെ ജീവനോടെ വിഴുങ്ങും. അവരുടെ ബിസിനസുകൾ, സാമൂഹിക ഘടന, പൊതു ജീവിതരീതി എന്നിവ ഉൾപ്പെടെ എല്ലാം നശിപ്പിച്ച് പൂർണ്ണമായും വിഴുങ്ങും,’ എന്ന് ട്രംപ് ട്രൂത്ത് സോഷ്യലിൽ കുറിച്ചു. 

കാനഡ ചൈനയുമായി വ്യാപാരബന്ധത്തിൽ ഏർപ്പെട്ടാൽ, അമേരിക്കയിലേക്ക് വരുന്ന എല്ലാ കനേഡിയൻ ഉൽപ്പന്നങ്ങൾക്കും ഉടൻ തന്നെ 100 ശതമാനം തീരുവ ചുമത്തുമെന്നും അദ്ദേഹം മുന്നറിയിപ്പ് നൽകി.

അമേരിക്കൻ വിപണിയിൽ ചൈനീസ് ഉൽപ്പന്നങ്ങൾക്ക് ഏർപ്പെടുത്തിയിട്ടുള്ള കനത്ത ചുങ്കത്തിൽ നിന്ന് രക്ഷനേടാനായി ചൈന കാനഡയെ ഒരു ഇടത്താവളമായി ഉപയോഗിക്കുകയാണെന്നും ട്രംപ് ആരോപിച്ചു. 

കാനഡ വഴി ചൈനീസ് ഉൽപ്പന്നങ്ങൾ അമേരിക്കയിലേക്ക് ഒഴുക്കാനാണ് നീക്കമെന്നും ഇതിനെതിരെ ശക്തമായ നടപടി സ്വീകരിക്കുമെന്നും അദ്ദേഹം വ്യക്തമാക്കി. 100 ശതമാനം നികുതി ചുമത്തുന്നതോടെ കാനഡയിൽ നിന്നുള്ള ഇറക്കുമതി അസാധ്യമാവുകയും അത് കാനഡയുടെ സാമ്പത്തിക രംഗത്തിന് കനത്ത തിരിച്ചടിയാവുകയും ചെയ്യും.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു'

Article Summary: US President Donald Trump has threatened to impose a 100% tariff on Canadian goods if Canada deepens trade ties with China. The warning, posted on Truth Social, follows Canadian PM Mark Carney's criticism of Trump's Greenland ambitions.

#DonaldTrump #Canada #China #TradeWar #MarkCarney #Tariff #WorldNews #Economics