ഖത്തറിലെ ഇസ്രയേൽ ആക്രമണം: അപലപിച്ച് മോദി; ഭീകരതയുടെ ഏത് രൂപത്തിനും എതിരാണ് ഇന്ത്യ

ദോഹ: (KVARTHA) ഖത്തർ തലസ്ഥാനമായ ദോഹയിൽ ഇസ്രായേൽ നടത്തിയ ആക്രമണത്തെ പ്രധാനമന്ത്രി നരേന്ദ്ര മോദി അപലപിച്ചു. ഖത്തർ അമീർ ശൈഖ് തമീം ബിൻ ഹമദ് ആൽഥാനിയുമായി ഫോണിൽ സംസാരിച്ച പ്രധാനമന്ത്രി, സംഭവത്തിൽ ഇന്ത്യയുടെ അതീവമായ ആശങ്ക അറിയിക്കുകയും ചെയ്തു. ഖത്തറിന്റെ പരമാധികാരം ലംഘിക്കപ്പെട്ടതിനെ ഇന്ത്യ അപലപിക്കുന്നതായും സംഭാഷണങ്ങളിലൂടെയും നയതന്ത്രപരമായ ശ്രമങ്ങളിലൂടെയും പ്രശ്‌നങ്ങൾ പരിഹരിച്ച് സംഘർഷം ഒഴിവാക്കണമെന്നും പ്രധാനമന്ത്രി എക്സ് (മുമ്പ് ട്വിറ്റർ) പ്ലാറ്റ്‌ഫോമിൽ കുറിച്ചു.

Spoke with Amir of Qatar Sheikh Tamim Bin Hamad Al-Thani and expressed deep concern at the attacks in Doha. India condemns the violation of the sovereignty of the brotherly State of Qatar. We support resolution of issues through dialogue and diplomacy, and avoiding escalation.…

— Narendra Modi (@narendramodi) September 10, 2025

പ്രധാനമന്ത്രിയുടെ ഔദ്യോഗിക എക്സ് പേജിലെ കുറിപ്പ് ഇങ്ങനെ: 'ഖത്തർ അമീർ ശൈഖ് തമീം ബിൻ ഹമദ് ആൽഥാനിയുമായി സംസാരിക്കുകയും ദോഹയിലെ ആക്രമണങ്ങളിൽ അഗാധമായ ആശങ്ക രേഖപ്പെടുത്തുകയും ചെയ്തു. സഹോദര രാഷ്ട്രമായ ഖത്തറിൻ്റെ പരമാധികാര ലംഘനത്തെ ഇന്ത്യ അപലപിക്കുന്നു. ചർച്ചകളിലൂടെയും നയതന്ത്രത്തിലൂടെയും പ്രശ്‌നങ്ങൾ പരിഹരിക്കുന്നതിനെയും, സംഘർഷം ഒഴിവാക്കുന്നതിനെയും ഞങ്ങൾ പിന്തുണയ്ക്കുന്നു. മേഖലയിൽ സമാധാനത്തിനും സ്ഥിരതയ്ക്കും വേണ്ടി ഉറച്ചുനിൽക്കുന്നതിനൊപ്പം ഭീകരതയുടെ ഏത് രൂപത്തിനുമെതിരെ ഇന്ത്യ നിലകൊള്ളുകയും ചെയ്യും'.

ചൊവ്വാഴ്ചയാണ് ഹമാസിൻ്റെ നേതാക്കൾ താമസിക്കുന്ന ദോഹയിലെ റെസിഡൻഷ്യൽ ആസ്ഥാനം ലക്ഷ്യമിട്ട് ഇസ്രായേൽ വ്യോമാക്രമണം നടത്തിയത്. അമേരിക്കയുടെ മധ്യസ്ഥതയിൽ ഗസ്സ വെടിനിർത്തൽ ചർച്ചകൾ ദോഹയിൽ നടക്കുന്നതിനിടെയാണ് ഹമാസ് നേതാക്കൾക്ക് നേരെയുണ്ടായ ആക്രമണം. ജറുസലേമിന് സമീപം ആറ് പേരുടെ മരണത്തിനിടയാക്കിയ വെടിവയ്പ്പിന്റെ ഉത്തരവാദിത്തം ഹമാസ് ഏറ്റെടുത്തതിനു പിന്നാലെയാണ് ഇസ്രയേൽ ആക്രമണം നടന്നത്. ഹമാസ് നേതാവ് ഖലീൽ അൽ ഹയ്യ കൊല്ലപ്പെട്ടുവെന്ന് ഇസ്രായേൽ ഡിഫൻസ് ഫോഴ്‌സ് (IDF - Israeli Defense Force) സ്ഥിരീകരിച്ചപ്പോൾ, ഖലീൽ അൽ ഹയ്യ ഉൾപ്പെടെയുള്ള നേതാക്കൾ സുരക്ഷിതരാണെന്ന് ഹമാസ് അറിയിച്ചു. താമസക്കാരുടെയും പരിസര പ്രദേശങ്ങളുടെയും സുരക്ഷ ഉറപ്പാക്കാൻ ആവശ്യമായ നടപടികൾ സ്വീകരിച്ചതായി ഖത്തർ വിദേശകാര്യ മന്ത്രാലയം അറിയിച്ചു.

മധ്യപൂർവദേശത്ത് സമാധാനം പുനഃസ്ഥാപിക്കാൻ ഏത് നയതന്ത്ര നീക്കങ്ങളാണ് ആവശ്യം? നിങ്ങളുടെ അഭിപ്രായങ്ങൾ പങ്കുവയ്ക്കുക.

Article Summary: A report on PM Modi condemning the Israeli attack in Doha.

#India #Qatar #Israel #PMModi #DohaAttack #Terrorism