Miss USA | സൗന്ദര്യ മത്സരത്തിൽ ജയിച്ചവർ പടിയിറങ്ങി, ഗുരുതര ആരോപണങ്ങൾ; പ്രതിസന്ധിയിൽ മിസ് യുഎസ്എ ഓർഗനൈസേഷൻ

വാഷിംഗ്ടൺ: (KVARTHA) മുൻ ജീവനക്കാരും മത്സരാർത്ഥികളും ഉന്നയിക്കുന്ന ഗുരുതരമായ ആരോപണങ്ങളെ നേരിടുകയാണ് അമേരിക്കയിലെ സൗന്ദര്യ മത്സര നടത്തിപ്പുകാരായ മിസ് യുഎസ്എ ഓർഗനൈസേഷൻ. പ്രസിഡൻ്റും സിഇഒയുമായ ലൈലാ റോസ് വിഷലിപ്തമായ തൊഴിൽ അന്തരീക്ഷം വളർത്തിയെടുക്കുന്നുവെന്നാണ് പ്രധാന ആരോപണം.
  
മുൻ മിസ് യുഎസ്എ നൊയേലിയ വോയ്ഗ്ട്ട് എട്ട് പേജുള്ള രാജിക്കത്തിൽ റോസിന്റെ കീഴിൽ ജോലി ചെയ്യുന്നത് വളരെ സമ്മർദകമാണെന്നും തന്റെ ശാരീരികാരോഗ്യത്തെ വരെ ബാധിച്ചുവെന്നും ആരോപിച്ചു.
ശരീരവണ്ണം കുറയുക, ഹൃദയമിടിപ്പ് അസാധാരണമാവുക തുടങ്ങിയ പ്രശ്നങ്ങൾ അനുഭവപ്പെട്ടതായി അവർ വെളിപ്പെടുത്തി.

സോഷ്യൽ മീഡിയ ഡയറക്ടറായിരുന്ന ക്ലോഡിയ എങ്കൽഹാർട്ട് എന്ന മുൻ ജീവനക്കാരും വോയ്ഗ്ട്ടിന്റെ ആരോപണങ്ങളെ പിന്തുണച്ചു. 2024 സെപ്റ്റംബറിൽ, വോയ്ഗ്ട്ട് 24-ാം വയസിൽ മിസ് യുഎസ്എ പട്ടം നേടിയിരുന്നു. 72 വർഷത്തിനിടെ സ്വമേധയാ രാജിവച്ച ആദ്യത്തെ മിസ് യുഎസ്എ ജേതാവാണ് ഇവർ.

2023-ലെ മിസ് ടീൻ യുഎസ്എ സൗന്ദര്യമത്സരത്തിൽ വിജയിച്ച ഇന്ത്യൻ വംശജയായ ഉമാസോഫിയ ശ്രീവാസ്തവ ഉൾപ്പടെ നിരവധി പേരുടെ രാജിക്കിടയിലാണ് പുതിയ ആരോപണങ്ങൾ പുറത്തുവരുന്നത്. മത്സര മോഹവുമായി എത്തുന്ന യുവതികളെ ചൂഷണം ചെയ്യുന്ന സംഘടനയായി മിസ് യുഎസ്എ മാറരുത് എന്ന ആശങ്കയാണ് പലരും ഉയർത്തുന്നത്. എന്നാൽ ആരോപണങ്ങളെക്കുറിച്ച് സംഘടന ഇതുവരെ പ്രതികരിച്ചിട്ടില്ല.