ന്യൂഡൽഹി: (KVARTHA) ലോകത്തെ ഏറ്റവും നീളം കൂടിയ വിഷപ്പാമ്പായ രാജവെമ്പാലയെ കുറിച്ച് അറിയാവുന്നതെല്ലാം മാറാൻ പോകുകയാണ്. 188 വർഷമായി ഒരൊറ്റ ഇനമായി കണക്കാക്കിയിരുന്ന രാജവെമ്പാല യഥാർത്ഥത്തിൽ നാല് വ്യത്യസ്ത ഇനങ്ങളാണെന്ന് ശാസ്ത്രജ്ഞർ തെളിയിച്ചിരിക്കുന്നു. രാജവെമ്പാലകൾ വടക്കേ ഇന്ത്യ മുതൽ തെക്കൻ ചൈന വരെയുള്ള ഈർപ്പമുള്ള പ്രദേശങ്ങളിൽ, പ്രത്യേകിച്ച് ഇടതൂർന്ന കാടുകളിലും കണ്ടൽക്കാടുകളിലും ജീവിക്കുന്ന വിഷമുള്ള പാമ്പുകളാണ്.

എന്താണ് പുതിയ കണ്ടെത്തൽ?

188 വർഷമായി രാജവെമ്പാലയെ പ്രതിനിധീകരിക്കുന്നത് ഒഫിയോഫാഗസ് ഹന്ന (Ophiophagus hannah)  എന്ന ഒരൊറ്റ ഇനമാണ്. ഇവയുടെ ശരീരത്തിന്റെ നിറം, വലിപ്പം തുടങ്ങിയവ സ്ഥലം കൊണ്ട് വ്യത്യാസപ്പെടുന്നത് ശാസ്ത്രജ്ഞരുടെ ശ്രദ്ധയാകർഷിച്ചു. ഇത്രയും വ്യത്യാസങ്ങൾ ഉണ്ടെങ്കിൽ ഇവ ഒരൊറ്റ ഇനമാണോ എന്ന സംശയം ഉയർന്നു. 

2021-ൽ നടത്തിയ ഒരു പഠനത്തിൽ രാജവെമ്പാലകളുടെ ജനിതക വ്യത്യാസങ്ങൾ ശാസ്ത്രജ്ഞർ സ്ഥിരീകരിച്ചു. ഈ പഠനത്തെ അടിസ്ഥാനമാക്കി, മ്യൂസിയങ്ങളിലുള്ള രാജവെമ്പാലകളുടെ ശരീരഘടന പരിശോധിച്ചപ്പോൾ നാല് വ്യത്യസ്ത ഇനങ്ങളെ തിരിച്ചറിഞ്ഞു. അടുത്തിടെ യൂറോപ്യൻ ജേണൽ ഓഫ് ടാക്സോണമിയിൽ കണ്ടെത്തലുകൾ പ്രസിദ്ധീകരിച്ചു .

4 ഇനങ്ങൾ 

● വടക്കൻ രാജവെമ്പാല  (O. hannah): ഉത്തര ഹിമാലയൻ മേഖല, ഇന്ത്യയുടെ കിഴക്കൻ ഭാഗങ്ങൾ, മ്യാൻമർ, ഇൻഡോചൈന എന്നിവിടങ്ങളിലും തായ്‌ലൻഡിന്റെ ഏറ്റവും കുറഞ്ഞ വീതിയുള്ള ഭാഗമായ കാ ഇസ്‌തമുസിലും വരെ വ്യാപിച്ചുകിടക്കുന്ന പാമ്പാണ്. ഇരുണ്ട അരികുകളുള്ള മഞ്ഞ വരകളും 18 മുതൽ 21 വരെ പല്ലുകളുമുള്ളതാണ് ഇതിന്റെ പ്രായപൂർത്തിയായ രൂപം.

● സുന്ദ രാജവെമ്പാല (Ophiophagus bungarus): മലായ് ഉപദ്വീപ്, സുമാത്ര, ബോർണിയോ, ജാവ എന്നീ സുന്ദ ദ്വീപുകളിലും ഫിലിപ്പൈൻസിലെ മിൻഡൊറോയിലും കാണപ്പെടുന്നു. വലിയ പാമ്പുകൾക്ക് സാധാരണയായി വരകൾ ഇല്ല, അല്ലെങ്കിൽ ശരീരത്തിൽ ഇരുണ്ട അരികുകളുള്ള ഇടുങ്ങിയ, മങ്ങിയ വരകൾ ഉണ്ടാകാം.

● പശ്ചിമഘട്ട രാജവെമ്പാല (Ophiophagus kaalinga): ഇന്ത്യൻ ഉപഭൂഖണ്ഡത്തിലെ പശ്ചിമഘട്ടനിരകളിൽ മാത്രം കാണപ്പെടുന്ന ഒരു പാമ്പാണ് ഇത്. ശരീരത്തിലെ ഇളം വരകളുടെ അരികുകൾ ഇരുണ്ട നിറമില്ലാത്തതിനാൽ ഇവയെ വേർതിരിച്ചറിയാൻ കഴിയും.

● ലുസോൺ രാജവെമ്പാല (Ophiophagus salvatana): ഫിലിപ്പൈൻസിലെ വടക്കൻ ദ്വീപായ ലുസോണിൽ കാണപ്പെടുന്നു. മറ്റ് മൂന്ന് ഇനങ്ങളിൽ നിന്ന് വ്യത്യസ്തമായി ഇവയ്ക്ക് വളരെ കോണാകൃതിയിലുള്ളതും ഇളം നിറമുള്ളതുമായ വരകളാണുള്ളത്.

എന്തുകൊണ്ടാണ് ഈ കണ്ടെത്തൽ പ്രധാനം?

ഈ ഇനങ്ങളെല്ലാം വിഷമാണ്. ഇവയുടെ വിഷം അത്രമാത്രം ശക്തമാണ്, ഒരു കടിയേറ്റാൽ വലിയ അളവിൽ വിഷം ശരീരത്തിലേക്ക് പടർന്നുപിടിക്കും. 15 മിനിറ്റിനുള്ളിൽ ഒരു മനുഷ്യനെ കൊല്ലാൻ പോലും ഇതിന് കഴിയും. ഈ പഠനത്തിന്റെ പ്രധാന പ്രാധാന്യം, ഓരോ ഇനത്തിനും വ്യത്യസ്തമായ ആൻറിവെനം വികസിപ്പിക്കേണ്ടതിന്റെ ആവശ്യകതയാണ്. കാരണം ഓരോ ഇനത്തിന്റെയും വിഷത്തിന്റെ ഘടന വ്യത്യസ്തമായിരിക്കും. 

ഈ പുതിയ കണ്ടെത്തൽ രാജവെമ്പാല കടികൾക്കുള്ള മികച്ച ചികിത്സ വികസിപ്പിക്കുന്നതിന് വളരെ സഹായകമാകും. ശാസ്ത്രജ്ഞർ ഇനിയും പല ദ്വീപുകളിൽ അജ്ഞാതമായ രാജവെമ്പാല ഇനങ്ങളെ കണ്ടെത്താൻ സാധ്യതയുണ്ടെന്ന് പ്രതീക്ഷിക്കുന്നു. രാജവെമ്പാലകളെ കുറിച്ചുള്ള പഠനം ഇപ്പോഴും തുടരുകയാണ്.

#kingcobra #newspecies #snake #discovery #science #biology #conservation