Chocolate Day | ജൂലൈ 7,  ലോക ചോക്ലേറ്റ് ദിനം: മധുരത്തിന്റെയും സന്തോഷത്തിന്റെയും ആഘോഷം

കൊച്ചി: (KVARTHA) ജൂലൈ ഏഴ്, ലോക ചോക്ലേറ്റ് ദിനമാണ്! ലോകമെമ്പാടുമുള്ള ചോക്ലേറ്റ് പ്രേമികൾ എല്ലാവർഷവും ഈ ദിവസം ആഘോഷിക്കുന്നു. ആളുകള്‍ക്ക് തങ്ങളുടെ പ്രിയപ്പെട്ടവ കഴിക്കാനും ആസ്വദിക്കാനും ഒരു ദിനം. മധുരത്തിനൊപ്പം സന്തോഷം പകരാനും ചോക്ലറ്റ് വേണം ഇന്ന്. ഒരു കാലത്തു ആഡംബരമായിരുന്നു ചോക്ലേറ്റ്. 

ഇന്നും നമ്മുടെ നാടുകളിൽ കാണപ്പെടുന്ന വൃക്ഷമായ കൊക്കോ മരത്തിലെ കായയിൽ നിന്നാണ് ചോക്ലേറ്റ് ഉത്പാദിപ്പിക്കപ്പെടുന്നത്. ആയിരക്കണക്കിന് വർഷങ്ങൾക്ക് മുമ്പേ കൊക്കോ മരം കൃഷി ചെയ്തിരുന്നതായും ചരിത്രം പറയുന്നു. കയ്പ് രുചിയുള്ള കൊക്കോയിൽ നിന്ന് മധുരമുള്ള ചോക്ലേറ്റ് ഉണ്ടാക്കുന്നത് നിരവധി പ്രക്രിയയ്ക്ക് ശേഷമാണ്. കൊക്കോയിൽ അടങ്ങിയിട്ടുള്ള ഫിനോളിക് സംയുക്തങ്ങൾ നമ്മുടെ ആരോഗ്യത്തിന് നല്ലതാണെന്നും പഠനങ്ങൾ ചൂണ്ടിക്കാട്ടുന്നു.

ചോക്ലേറ്റിന്റെ ചരിത്രം:

ചോക്ലേറ്റിന്റെ ചരിത്രം രസകരമാണ്. മധ്യ അമേരിക്കയിലെ മായൻ വംശജരാണ് ആദ്യമായി കൊക്കോ ഉപയോഗിച്ചത് എന്ന് വിശ്വസിക്കപ്പെടുന്നു.  ബി.സി. 350 ഓട് കൊക്കോ നിരവധി ചടങ്ങുകളിലും പാനീയങ്ങളിലും ഉപയോഗിച്ചിരുന്നു.  പിന്നീട്, യൂറോപ്പിലേക്ക് എത്തിയപ്പോഴാണ് ചോക്ലേറ്റ് ഇന്ന് നമ്മൾ അറിയുന്ന മധുരപലഹാരമായി മാറിയതെന്നാണ് പറയുന്നത്.

പോഷകങ്ങളുടെ കലവറ:

രുചിക്കപ്പുറം ആരോഗ്യത്തിന് നല്ലത് കൂടിയായാണ് ചോക്ലേറ്റിനെ വിലയിരുത്തുന്നത്. ചോക്ലേറ്റിൽ മഗ്നീഷ്യം, സിങ്ക്, ആന്റിഓക്സിഡന്റുകൾ എന്നിവ ധാരാളം അടങ്ങിയിട്ടുണ്ടെന്ന് ആരോഗ്യ വിദഗ്ധർ പറയുന്നു. ഇതിലടങ്ങിയിരിക്കുന്ന ഫോസ്ഫേറ്റ്, പ്രോട്ടീൻ, കാൽസ്യം മുതലായവ ഇൻസുലിൻ പ്രതിരോധം കുറയ്ക്കുവാൻ സഹായിക്കുന്ന ഘടകങ്ങളാണ്. ഹൃദയാരോഗ്യം മെച്ചപ്പെടുത്താനും ഡാർക്ക് ചോക്ലേറ്റ് കഴിക്കുന്നത് നല്ലതാണെന്നും പഠനങ്ങൾ വ്യക്തമാക്കുന്നു. 

ഇന്ന് എല്ലാ സന്തോഷങ്ങൾക്കും ചോക്ലേറ്റ് കൊണ്ടാണ് തുടക്കം. പ്രിയപ്പെട്ടവരോടുള്ള സ്നേഹവും ചോക്ലേറ്റ് സമ്മാനിച്ച് കൊണ്ട് തുടങ്ങാറുണ്ട്. മധുരമുള്ള ചോക്ലറ്റ് കഴിച്ചും പ്രിയപ്പെട്ടവർക്ക് നൽകിയും നമുക്ക് ലോക ചോക്ലേറ്റ് ദിനം ആഘോഷിക്കാം. എന്നിരുന്നാലും, എല്ലാ നല്ല കാര്യങ്ങളെയും പോലെ, മിതമായ അളവിൽ ചോക്ലേറ്റ് കഴിക്കുന്നതാണ് നല്ലത്.  ചോക്ലേറ്റിൽ പഞ്ചസാരയും കൊഴുപ്പും അടങ്ങിയിട്ടുണ്ട്, അതിനാൽ അമിതമായി കഴിക്കുന്നത് ആരോഗ്യ പ്രശ്നങ്ങൾക്ക് കാരണമാകും. നിങ്ങൾക്ക് ഏതെങ്കിലും ആരോഗ്യ പ്രശ്നങ്ങൾ ഉണ്ടെങ്കിൽ, ചോക്ലേറ്റ് കഴിക്കുന്നതിനെ കുറിച്ച് ഡോക്ടറുമായി സംസാരിക്കുന്നത് നല്ലതാണ്.