വാഷിംഗ്ടൺ: (KVARTHA) ഇറാനെതിരായ ഇസ്രാഈൽ ആക്രമണ പദ്ധതികളുമായി ബന്ധപ്പെട്ട രഹസ്യ രേഖകൾ ചോർന്ന സംഭവം രാജ്യാന്തര തലത്തിൽ വലിയ ചർച്ചയായി. യുഎസ് പ്രതിനിധി സഭാ സ്പീക്കർ മൈക്ക് ജോൺസൺ ഈ വിവരം സ്ഥിരീകരിച്ചു. ഈ രേഖകളിൽ ഇറാനെതിരായ ഇസ്രാഈലിന്റെ ആക്രമണ പദ്ധതികളെക്കുറിച്ചുള്ള അമേരിക്കൻ വിലയിരുത്തലുകൾ അടങ്ങിയിട്ടുണ്ടെന്നാണ് റിപ്പോർട്ടുകൾ.

കഴിഞ്ഞ ആഴ്ച ഈ രേഖകൾ ഓൺലൈനിൽ പ്രസിദ്ധീകരിച്ചതായി റിപ്പോർട്ടുകൾ പുറത്തുവന്നു. ഇതിൽ ഒക്ടോബർ ഒന്നിന് ഇറാൻ നടത്തിയ മിസൈൽ ആക്രമണത്തിന് മറുപടിയായി ഇസ്രാഈൽ സൈന്യം തയ്യാറെടുക്കുന്നതിന്റെ ചിത്രങ്ങളും ഉൾപ്പെടുന്നു. അമേരിക്ക, ബ്രിട്ടൻ, കാനഡ, ന്യൂസിലാൻഡ്, ഓസ്‌ട്രേലിയ എന്നീ രാജ്യങ്ങളുടെ ഫൈവ് ഐസ് ഇൻ്റലിജൻസ് സഖ്യവുമായി മാത്രം പങ്കിടുന്ന അതീവ പ്രാധാന്യമുള്ള രേഖകളാണ് ചോർന്നിരിക്കുന്നത്.

ഒക്ടോബറിൽ ഇറാൻ ഇസ്രാഈലിനെതിരെ വ്യാപകമായ മിസൈൽ ആക്രമണം നടത്തിയിരുന്നു. ഇത് 2024-ൽ ഇസ്രാഈലിനെതിരെ ഇറാൻ നടത്തിയ രണ്ടാമത്തെ ആക്രമണമായിരുന്നു. ഏപ്രിൽ മാസത്തിലും ഇറാൻ ഇസ്രാഈലിനെ ആക്രമിച്ചിരുന്നു. ഇതിന് മറുപടി നൽകുമെന്ന് ഇസ്രാഈൽ അറിയിച്ചിരുന്നു. ഇതിനിടെ സുപ്രധാന രേഖകൾ ചോർന്ന സംഭവം വലിയ സുരക്ഷാ വെല്ലുവിളിയാണ് ഉയർത്തുന്നത്.

#Israel #Iran #SecurityLeak #Intelligence #MilitaryPlans #Geopolitics