ഇറാൻ സ്കൂളിലെ ഇസ്രാഈൽ മിസൈൽ വർഷം; കൊല്ലപ്പെട്ട കുട്ടികളുടെ എണ്ണം 180 ആയി

വാഷിങ്ടൺ: (KVARTHA) പശ്ചിമേഷ്യയിൽ ഇസ്രാഈൽ-യുഎസ് സഖ്യം നടത്തുന്ന സൈനിക നടപടി അതീവ ഗുരുതരമായ മാനുഷിക പ്രത്യാഘാതങ്ങളിലേക്ക് നീങ്ങുന്നു. തെക്കൻ ഇറാാനിലെ മിനാബിൽ പെൺകുട്ടികളുടെ പ്രൈമറി സ്കൂളിന് നേരെയുണ്ടായ മിസൈലാക്രമണത്തിൽ കൊല്ലപ്പെട്ടവരുടെ എണ്ണം 180 ആയതായി ഇറാന്റെ ഔദ്യോഗിക വൃത്തങ്ങൾ അറിയിച്ചു. ഷജറെ ത്വയ്യിബ സ്കൂളിന് നേരെ ശനിയാഴ്ചയാണ് ആക്രമണമുണ്ടായത്.

കൂട്ടക്കുരുതിയായി സ്കൂൾ ആക്രമണം

സ്കൂളിൽ ക്ലാസുകൾ നടന്നുകൊണ്ടിരിക്കെയാണ് മിസൈൽ പതിച്ചത്. ഇറാന്റെ ആരോഗ്യ മന്ത്രാലയത്തിലെ പബ്ലിക് റിലേഷൻസ് മേധാവി ഹൊസൈൻ കെർമാൻപുർ ആണ് മരണസംഖ്യ 180 കടന്നതായി സ്ഥിരീകരിച്ചത്. കൊല്ലപ്പെട്ടവരിൽ ഭൂരിഭാഗവും ഏഴിനും പന്ത്രണ്ടിനും ഇടയിൽ പ്രായമുള്ള വിദ്യാർത്ഥിനികളാണ്. അവശിഷ്ടങ്ങൾക്കിടയിൽ ഇനിയും മൃതദേഹങ്ങൾ ഉണ്ടാകാൻ സാധ്യതയുള്ളതിനാൽ മരണസംഖ്യ ഇനിയും ഉയർന്നേക്കാമെന്ന് അദ്ദേഹം ആശങ്ക പ്രകടിപ്പിച്ചു.

ആശുപത്രികൾക്ക് നേരെയും ആക്രമണം

സ്കൂളുകൾക്ക് പുറമെ ടെഹ്‌റാനിലെ ഗാന്ധി ആശുപത്രി ഉൾപ്പെടെയുള്ള ആരോഗ്യ കേന്ദ്രങ്ങളെയും ഇസ്രാഈൽ ലക്ഷ്യമിട്ടതായി റിപ്പോർട്ടുകളുണ്ട്. സ്കൂളിൽ പതിച്ച അതേ തരം മിസൈലുകളാണ് ആശുപത്രിക്ക് നേരെയും പ്രയോഗിച്ചതെന്ന് ഇറാൻ ആരോപിക്കുന്നു. സാധാരണക്കാരെയും കുട്ടികളെയും ലക്ഷ്യം വെച്ചുള്ള ഇത്തരം നീക്കങ്ങൾ അന്താരാഷ്ട്ര നിയമങ്ങളുടെ ലംഘനമാണെന്ന് യുനെസ്കോ ഉൾപ്പെടെയുള്ള സംഘടനകൾ വിമർശിച്ചു.

നാലാഴ്ചത്തെ സൈനിക നടപടി; ട്രംപ്

ഇറാനെതിരായ ആക്രമണം പൂർത്തിയാക്കാൻ നാലാഴ്ചയോളം സമയം വേണ്ടിവരുമെന്ന് യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കി. ബ്രിട്ടിഷ് പത്രമായ ഡെയ്‌ലി മെയിലിന് നൽകിയ അഭിമുഖത്തിലാണ് ട്രംപ് ഇക്കാര്യം പറഞ്ഞത്. ഇറാൻ വലിയ രാജ്യമായതിനാൽ ലക്ഷ്യങ്ങൾ പൂർത്തിയാക്കാൻ സമയം ആവശ്യമാണെന്നും അദ്ദേഹം കൂട്ടിച്ചേർത്തു. ചർച്ചകൾക്ക് തയ്യാറാണെന്ന് സൂചന നൽകിയെങ്കിലും ഉടൻ അതിന് സാധ്യതയില്ലെന്നും ട്രംപ് പറഞ്ഞു.

ഐആർജിസി ആസ്ഥാനം തകർത്തു

ഇറാന്റെ സൈനിക ശക്തിയായ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) ആസ്ഥാനം തകർത്തതായി യുഎസ് സൈന്യം അവകാശപ്പെട്ടു. കഴിഞ്ഞ 47 വർഷത്തിനിടെ ഒട്ടേറെ അമേരിക്കക്കാരുടെ മരണത്തിന് ഉത്തരവാദികളായ ഐആർജിസിയുടെ ആസ്ഥാനം തകർത്തതിനെ 'പാമ്പിന്റെ തല വെട്ടിമാറ്റി' എന്നാണ് യുഎസ് സെൻട്രൽ കമാൻഡ് (സെന്റ്കോം) വിശേഷിപ്പിച്ചത്. നിലവിൽ ഐആർജിസിക്ക് ആസ്ഥാനമില്ലെന്നും യുഎസ് പ്രസ്താവനയിൽ പറഞ്ഞു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. ഈ വാർത്ത മറ്റുള്ളവരുമായി പങ്കിടാനും അഭിപ്രായങ്ങൾ കമൻ്റായി രേഖപ്പെടുത്താനും മറക്കരുത്.

Article Summary: Israel missile attack kills 180 Iran students as US claims IRGC headquarters destroyed.

#IranWar #IsraelAttack #DonaldTrump #Minab #IRGC #WorldNews