സ്കൂളിലെ കൂട്ടക്കുരുതി; കൊല്ലപ്പെട്ട കുട്ടികളുടെ എണ്ണം 53 ആയി, ഗൾഫിൽ കടുത്ത ആശങ്ക; ഇറാൻ ആക്രമണങ്ങളെ അപലപിച്ച് യൂറോപ്യൻ രാജ്യങ്ങൾ, സമാധാന ചർച്ചകൾ പുനരാരംഭിക്കാൻ ആഹ്വാനം

ടെഹ്റാൻ/ജനീവ: (KVARTHA) മിഡിൽ ഈസ്റ്റിനെ പൂർണ്ണമായും യുദ്ധത്തിലേക്ക് തള്ളിവിട്ട ഇസ്റാഈൽ-അമേരിക്കൻ സംയുക്ത സൈനിക നീക്കങ്ങളിലും ഇറാന്റെ പ്രത്യാക്രമണത്തിലും കടുത്ത ആശങ്ക രേഖപ്പെടുത്തി ലോകരാജ്യങ്ങൾ. ഇറാൻ, ഗൾഫ് രാജ്യങ്ങളിലെ അമേരിക്കൻ സൈനിക താവളങ്ങൾക്ക് നേരെ നടത്തിയ ആക്രമണങ്ങളെ ശക്തമായി അപലപിച്ച് യൂറോപ്യൻ യൂണിയൻ രാജ്യങ്ങൾ രംഗത്തെത്തി. ഫ്രഞ്ച് പ്രസിഡന്റ് ഇമ്മാനുവൽ മാക്രോൺ, ജർമ്മൻ ചാൻസലർ ഫ്രീഡ്രിക്ക് മെർസ്, ബ്രിട്ടീഷ് പ്രധാനമന്ത്രി കീർ സ്റ്റാർമർ എന്നിവർ സംയുക്തമായാണ് പ്രസ്താവന പുറത്തിറക്കിയത്.

മേഖലയിൽ സമാധാനം നിലനിർത്തേണ്ടത് അത്യാവശ്യമാണെന്നും സാധാരണക്കാരുടെ ജീവൻ സംരക്ഷിക്കാൻ എല്ലാവരും തയ്യാറാകണമെന്നും ഈ രാജ്യങ്ങൾ ആവശ്യപ്പെട്ടു. ഒമാന്റെ നേതൃത്വത്തിൽ ജനീവയിൽ നടന്നുകൊണ്ടിരുന്ന ആണവ കരാർ ചർച്ചകൾ തടസ്സപ്പെട്ടതിൽ വലിയ നിരാശയുണ്ടെന്നും, ചർച്ചകൾ എത്രയും വേഗം പുനരാരംഭിക്കണമെന്നും അവർ കൂട്ടിച്ചേർത്തു.

സ്കൂളിലെ കൂട്ടക്കുരുതി; കൊല്ലപ്പെട്ട കുട്ടികളുടെ എണ്ണം 53 ആയി

തെക്കൻ ഇറാനിലെ ഹോർമോസ്ഗാൻ പ്രവിശ്യയിലെ മിനാബിൽ പെൺകുട്ടികളുടെ പ്രൈമറി സ്കൂളിന് നേരെ ഇസ്റാഈൽ നടത്തിയ മിസൈലാക്രമണത്തിൽ മരിച്ച വിദ്യാർത്ഥികളുടെ എണ്ണം 53 ആയി ഉയർന്നുവെന്ന് ഇർന (IRNA) വാർത്താ ഏജൻസി റിപ്പോർട്ട് ചെയ്തു. ഈ ക്രൂരമായ ആക്രമണത്തിന് തക്കതായ മറുപടി നൽകുമെന്ന് ഇറാൻ വിദേശകാര്യ മന്ത്രി അബ്ബാസ് അറാഘ്ചി പറഞ്ഞു.

The destroyed building is a primary school for girls in the south of Iran. It was bombed in broad daylight, when packed with young pupils.

Dozens of innocent children have been murdered at this site alone.

These crimes against the Iranian People will not go unanswered. pic.twitter.com/AVqiuolgWm

— Seyed Abbas Araghchi (@araghchi) February 28, 2026

അമേരിക്കൻ-ഇസ്റാഈൽ സംയുക്ത ആക്രമണം ഇറാന്റെ 32 പ്രവിശ്യകളിൽ 20 എണ്ണത്തിലും വലിയ നാശനഷ്ടങ്ങൾ ഉണ്ടാക്കിയതായി ഇറാനിയൻ റെഡ് ക്രസന്റ് വക്താവ് മൊജ്തബ ഖാലിദി അറിയിച്ചു. ആക്രമണ പ്രദേശങ്ങളിൽ നിന്ന് ആളുകൾ മാറിനിൽക്കണമെന്നും അദ്ദേഹം അഭ്യർത്ഥിച്ചു. ദോഹയിലും ഇറാഖിലെ എർബിൽ അന്താരാഷ്ട്ര വിമാനത്താവളത്തിന് നേരെയും വീണ്ടും ആക്രമണങ്ങൾ ഉണ്ടായി.

ടെഹ്റാനിൽ ഗതാഗതക്കുരുക്ക്; ഹോർമുസ് കടലിടുക്കിൽ യാത്രാവിലക്ക്

തലസ്ഥാനമായ ടെഹ്റാനിൽ താമസിക്കുന്ന ഒരു കോടിയോളം വരുന്ന ജനങ്ങളോട് സുരക്ഷിതമായ മറ്റ് നഗരങ്ങളിലേക്ക് മാറിത്താമസിക്കാൻ സുരക്ഷാ കൗൺസിൽ നിർദ്ദേശം നൽകിയിരുന്നു. ഇതോടെ നഗരത്തിൽ നിന്നുള്ള ഹൈവേകളിൽ വലിയ ഗതാഗതക്കുരുക്കാണ് അനുഭവപ്പെടുന്നത്. എക്സ്പ്രസ് വേകളിൽ സർക്കാർ നേരിട്ട് ഇന്ധനം എത്തിച്ചുനൽകുന്നുണ്ട്.

അതിനിടെ, യുദ്ധഭീതിയെത്തുടർന്ന് ലോകത്തിലെ തന്നെ ഏറ്റവും തിരക്കേറിയ എണ്ണ വ്യാപാര പാതയായ ഹോർമുസ് കടലിടുക്കിലൂടെയുള്ള എണ്ണ വിതരണം പ്രമുഖ കമ്പനികൾ നിർത്തിവെച്ചു. ദിവസങ്ങളോളം തങ്ങളുടെ കപ്പലുകൾ സുരക്ഷിത സ്ഥാനങ്ങളിൽ തുടരുമെന്ന് കമ്പനികൾ അറിയിച്ചു. ഇത് ആഗോള വിപണിയിൽ വലിയ പ്രതിസന്ധി സൃഷ്ടിക്കാൻ സാധ്യതയുണ്ട്.

അമേരിക്കൻ നടപടി ഭരണഘടനാ വിരുദ്ധം

ഇറാനെതിരെ അമേരിക്ക നടത്തിയ സായുധ ആക്രമണം നിയമവിരുദ്ധവും ഭരണഘടനാ വിരുദ്ധവുമാണെന്ന് യു.എസ് സെനറ്റർ എഡ്വേർഡ് ജെ. മാർക്കി ആരോപിച്ചു. അമേരിക്കൻ കോൺഗ്രസിന്റെ അനുമതിയില്ലാതെയാണ് അമേരിക്കൻ പ്രസിഡൻ്റ് ട്രംപ് യുദ്ധം പ്രഖ്യാപിച്ചതെന്നും അദ്ദേഹം കുറ്റപ്പെടുത്തി. ഈ യുദ്ധം അമേരിക്കയ്ക്കും ഇറാനും മിഡിൽ ഈസ്റ്റിനും ഒരുപോലെ വിനാശകരമായിരിക്കുമെന്ന് സെന്റർ ഫോർ ഇന്റർനാഷണൽ പോളിസിയിലെ സീനിയർ ഫെല്ലോ നെഗാർ മൊർതസാവി പറഞ്ഞു.

യു.എ.ഇക്ക് പൂർണ്ണ പിന്തുണയുമായി സൗദി

യു.എ.ഇക്ക് നേരെ ഇറാന്റെ മിസൈലുകൾ പതിക്കുകയും ഒരു പാകിസ്ഥാൻ പൗരൻ കൊല്ലപ്പെടുകയും ചെയ്ത സംഭവത്തിൽ യു.എ.ഇക്ക് പൂർണ്ണ പിന്തുണയുമായി സൗദി അറേബ്യ രംഗത്തെത്തി. സൗദി കിരീടാവകാശി മുഹമ്മദ് ബിൻ സൽമാൻ, യു.എ.ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി ഫോണിൽ സംസാരിച്ചു. രാജ്യങ്ങളുടെ പരമാധികാരം ലംഘിച്ചുകൊണ്ടുള്ള ഇറാന്റെ ആക്രമണം അംഗീകരിക്കാനാവില്ലെന്നും ഏത് സഹായത്തിനും സൗദി ഒപ്പമുണ്ടാകുമെന്നും കിരീടാവകാശി ഉറപ്പുനൽകി.

യുദ്ധസാഹചര്യം കണക്കിലെടുത്ത് ബഹ്റൈനിലെ സ്കൂളുകളും സർവ്വകലാശാലകളും അടച്ചുപൂട്ടി പഠനം പൂർണ്ണമായും ഓൺലൈനിലേക്ക് മാറ്റിയിട്ടുണ്ട്.

ഗൾഫ് നാടുകളിലെ യുദ്ധസാഹചര്യവും സുരക്ഷാ മുന്നറിയിപ്പുകളും പ്രവാസികളായ നമ്മുടെ പ്രിയപ്പെട്ടവർ അടിയന്തരമായി അറിയേണ്ടതുണ്ട്. ഈ സുപ്രധാന വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ പങ്കുവെക്കുമല്ലോ. ഗൾഫ് മേഖലയിലെ പുതിയ വിവരങ്ങൾ വേഗത്തിൽ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: France, Germany, and the UK condemned Iranian retaliatory strikes on US bases in the Gulf, while the death toll from an Israeli strike on an Iranian school rose to 53 amidst an oil shipping halt in the Strait of Hormuz.

#MiddleEastWar #IranIsraelConflict #StraitOfHormuz #EmmanuelMacron #SaudiArabia #DonaldTrump #GlobalNews #MalayalamNews