ഡിമോണയിൽ വ്യോമപ്രതിരോധം ഭേദിച്ച് ഇറാൻ മിസൈലുകൾ; നൂറിലേറെപ്പേർക്ക് പരുക്ക്, തിരിച്ചടിക്കുമെന്ന് ഇസ്രയേൽ

ടെൽ അവീവ്: (KVARTHA) പശ്ചിമേഷ്യയിൽ യുദ്ധം ഇരുപത്തിമൂന്നാം ദിവസത്തിലേക്ക് കടന്നതോടെ ഇസ്റാഈലിന് നേരെ ആക്രമണം അതിശക്തമാക്കി ഇറാൻ. ഇസ്റാഈലിൻ്റെ തന്ത്രപ്രധാനമായ ആണവഗവേഷണ കേന്ദ്രം സ്‌ഥിതി ചെയ്യുന്ന ഡിമോണ മേഖലയിലാണ് ഇറാൻ കനത്ത വ്യോമാക്രമണം നടത്തിയത്. മിസൈൽ ആക്രമണത്തിൽ കുട്ടികൾ ഉൾപ്പടെ നൂറിലേറെപ്പേർക്ക് പരുക്കേറ്റതായാണ് അന്താരാഷ്ട്ര മാധ്യമ റിപ്പോർട്ടുകൾ വ്യക്തമാക്കുന്നത്.

ഡിമോണയിൽ അടിയന്തര അന്വേഷണം

ഇസ്റാഈലിന്റെ വ്യോമപ്രതിരോധ സംവിധാനങ്ങൾ പ്രവർത്തനക്ഷമമായിരുന്നുവെങ്കിലും ആറഡിലേക്കെത്തിയ മിസൈലുകളെ പൂർണ്ണമായി തടയാൻ കഴിഞ്ഞില്ലെന്ന് ഇസ്റാഈൽ സൈന്യം വെളിപ്പെടുത്തി. സംഭവത്തിൽ അടിയന്തര അന്വേഷണം ആരംഭിച്ചതായി ഐഡിഎഫ് വക്‌താവ് ബ്രിഗേഡിയർ ജനറൽ എഫി ഡെഫ്രിൻ വ്യക്‌തമാക്കി.

ഇറാന്റെ ആക്രമണം യുദ്ധക്കുറ്റമാണെന്നും കുട്ടികൾ ഉൾപ്പടെയുള്ള സാധാരണക്കാർക്കാണ് പരുക്കേറ്റതെന്നും ഇത് പച്ചയായ ഭീകരവാദമാണെന്നും ഇസ്റാഈൽ വിദേശകാര്യമന്ത്രാലയം എക്‌സ് പ്ലാറ്റ്ഫോമിലെ പോസ്‌റ്റിൽ കുറിച്ചു. 

ഇതിനിടെ, ഇറാന്റെ മിസൈൽ ആക്രമണത്തിൽ ഡിമോണയിലെ ആണവകേന്ദ്രത്തിന് യാതൊരുവിധ കേടുപാടുകളുമുണ്ടായിട്ടില്ലെന്നും ആണവവികിരണം സംഭവിച്ചിട്ടില്ലെന്നും രാജ്യാന്തര ആണവോർജ ഏജൻസി ഔദ്യോഗികമായി സ്ഥിരീകരിച്ചു.

തിരിച്ചടിക്കുമെന്ന് നെതന്യാഹു

ഇസ്റാഈലിനെ സംബന്ധിച്ച് വളരെ പ്രയാസമേറിയ വൈകുന്നേരമാണ് കടന്നുപോയതെന്ന് പ്രധാനമന്ത്രി ബെന്യാമിൻ നെതന്യാഹു പ്രതികരിച്ചു. ഇസ്റാഈൽ പൗരൻമാരുടെ വേദനയിൽ പങ്കുചേരുന്നുവെന്നും അവർക്ക് ആവശ്യമായ എല്ലാ സഹായങ്ങളും എത്തിക്കാൻ നിർദേശം നൽകിയിട്ടുണ്ടെന്നും അദ്ദേഹം വ്യക്തമാക്കി. 

മണിക്കൂറുകൾക്കിടെ ഇത് രണ്ടാം തവണയാണ് ഇസ്റാഈലിൻ്റെ വ്യോമപ്രതിരോധം ഭേദിച്ച് ഇറാന്റെ മിസൈലുകൾ ലക്ഷ്യസ്‌ഥാനങ്ങളിൽ പതിക്കുന്നത്. ഈ ആക്രമണങ്ങൾക്ക് കനത്ത പ്രതികാരം ചെയ്യുമെന്നും നെതന്യാഹു കൂട്ടിച്ചേർത്തു. ഇതിന് പിന്നാലെ ഇറാൻ തലസ്‌ഥാനമായ ടെഹ്റാന്റെ കിഴക്കൻ മേഖലയിൽ ഇസ്റാഈൽ കനത്ത വ്യോമാക്രമണം നടത്തിയതായും റിപ്പോർട്ടുകളുണ്ട്.

നയതന്ത്ര ബന്ധങ്ങളിൽ വിള്ളൽ

യുദ്ധം രൂക്ഷമാകുന്നതിനിടെ നയതന്ത്ര തലത്തിലും വലിയ കോളിളക്കങ്ങളാണ് പശ്ചിമേഷ്യയിൽ സംഭവിക്കുന്നത്. റിയാദിലെ ഇറാനിയൻ എംബസി ഉദ്യോഗസ്‌ഥരെ സൗദി അറേബ്യ പുറത്താക്കി. മിലിറ്ററി അറ്റാഷെ ഉൾപ്പെടെ അഞ്ച് ഉദ്യോഗസ്‌ഥരോട് 24 മണിക്കൂറിനകം രാജ്യം വിടാനാണ് സൗദി വിദേശകാര്യമന്ത്രാലയം നിർദേശം നൽകിയിരിക്കുന്നത്.

അതിനിടെ യുഎഇയുടെ വടക്കൻ എമിറേറ്റായ റാസൽഖൈമയിൽ ഇറാൻ്റെ ഡ്രോൺ ആക്രമണശ്രമം തടഞ്ഞതായി അധികൃതർ അറിയിച്ചു. സൗദിയുടെ കിഴക്കൻ പ്രവിശ്യയിലും സമാനമായ ഡ്രോൺ ആക്രമണശ്രമമുണ്ടായി. ഇറാഖിൽ ബാഗ്ദ‌് വിമാനത്താവളത്തിന് സമീപം യുഎസ് നയതന്ത്ര ഓഫിസിനെ ലക്ഷ്യമിട്ടും ഡ്രോൺ ആക്രമണമുണ്ടായതായി റിപ്പോർട്ടുകൾ വ്യക്തമാക്കുന്നു.

സമാധാന ശ്രമങ്ങളുമായി അമേരിക്ക

യുദ്ധം അറുതിയില്ലാതെ തുടരുന്നതിനിടെ വെടിനിർത്തലിനും സമാധാനത്തിനുമായി അമേരിക്കയും ഇസ്റാഈലും സംയുക്ത ശ്രമങ്ങൾ ആരംഭിച്ചതായി യുഎസ് മാധ്യമങ്ങൾ റിപ്പോർട്ട് ചെയ്തു. അമേരിക്കൻ പ്രസിഡൻ്റ് ട്രംപിന്റെ പ്രതിനിധികളായ ജാറെദ് കുഷ്‌നറും സ്‌റ്റീവ് വിറ്റ്കോഫും ഖത്തർ, ഈജിപ്ത്, ബ്രിട്ടൻ എന്നീ രാജ്യങ്ങളുടെ സഹകരണത്തോടെയാണ് ഇപ്പോൾ ചർച്ചകൾ നടത്തുന്നത്. നിലവിൽ യുഎസും ഇറാനും നേരിട്ട് ചർച്ചകളിൽ പങ്കാളികളായിട്ടില്ല.

കർശന ഉപാധികളുമായി ഇരുപക്ഷവും

സമാധാന ചർച്ചകളിൽ ആറോളം കർശന ഉപാധികളാണ് അമേരിക്ക ഇറാന് മുന്നിൽ വെക്കുന്നത്. ഹോർമുസ് കടലിടുക്ക് തുറക്കുക, അഞ്ച് വർഷത്തേക്ക് മിസൈൽ പദ്ധതിയോ പരീക്ഷണമോ പാടില്ല, യുറേനിയം സമ്പുഷ്‌ടീകരണം നടത്തരുത്, ആണവ റിയാക്‌ടറുകൾ റദ്ദാക്കുക, മിസൈലുകളുടെ പരിധി 1000 കിലോമീറ്ററിൽ താഴെയായി നിശ്ചയിക്കുക, ഹിസ്ബുല്ല, ഹൂതികൾ, ഹമാസ് എന്നീ സായുധസംഘങ്ങൾക്ക് ധനസഹായം നൽകരുത് എന്നിവയാണ് ഈ നിബന്ധനകൾ.

അതേസമയം, ഹോർമുസ് കടലിടുക്കിലെ സാഹചര്യം സാധാരണ നിലയിലാക്കാൻ അമേരിക്കയും ഇസ്റാഈലും ഇറാനെ ആക്രമിക്കുന്നത് നിർത്തണമെന്നാണ് ഇറാന്റെ പ്രധാന ആവശ്യം. ഭാവിയിൽ ആക്രമിക്കില്ലെന്ന് ഉറപ്പ് നൽകണമെന്നും അവർ ആവശ്യപ്പെടുന്നു. നഷ്ടപരിഹാരത്തിന് പകരം മരവിപ്പിച്ച സാമ്പത്തികസ്രോതസുകൾ തുറന്നുനൽകുകയെന്ന അമേരിക്കയുടെ പദ്ധതി ഇറാൻ പരിഗണിച്ചേക്കും. 

ദീർഘകാല കരാറിലേക്കെത്തും മുൻപ് താൽക്കാലിക വെടിനിർത്തൽ സാധ്യതകളാണ് ഇപ്പോൾ സജീവമായി പരിഗണിക്കുന്നത്. ഇതിനിടെ ഇന്ത്യ, റഷ്യ തുടങ്ങിയ രാജ്യങ്ങളും ഗൾഫ് രാഷ്ട്രങ്ങളുടെ പങ്കാളിത്തത്തോടെ സമാധാനത്തിനായി മധ്യസ്‌ഥ ചർച്ചകൾ നടത്തുന്നുണ്ട്.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യുമല്ലോ. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിൽ കമന്റായി രേഖപ്പെടുത്താൻ മറക്കരുത്.

Article Summary: Iran intensified the Middle East conflict with a heavy missile strike near Israel's Dimona nuclear facility leaving over 100 injured, prompting urgent US-led ceasefire talks.

#MiddleEastConflict #IsraelIranWar #DimonaAttack #USCeasefire #GlobalNews #MiddleEastTensions #IDF #DonaldTrumpRepresentatives #WarUpdates