പാക് മുൻ പ്രധാനമന്ത്രി ഇമ്രാൻ ഖാൻ ജയിലിൽ കൊല്ലപ്പെട്ടെന്ന് അഭ്യൂഹം: അനുയായികൾ പ്രതിഷേധവുമായി തെരുവിൽ

റാവൽപിണ്ടി: (KVARTHA) പാകിസ്താൻ മുൻ പ്രധാനമന്ത്രിയും തെഹ്രിക് ഇ ഇൻസാഫ് (പിടിഐ) നേതാവുമായ ഇമ്രാൻ ഖാൻ റാവൽപിണ്ടിയിലെ അഡിയാല ജയിലിൽ കൊല്ലപ്പെട്ടതായി അഭ്യൂഹം ശക്തമാകുന്നു. 2023 മുതൽ അഴിമതി കേസുകളിൽ ശിക്ഷിക്കപ്പെട്ട് റാവൽപിണ്ടിയിലെ ജയിലിൽ തടവിൽ കഴിയുന്ന 73കാരനായ ഇമ്രാൻ ഖാൻ കൊല്ലപ്പെട്ടതായ വിവരം പാക് സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. 'അഫ്ഗാൻ ടൈംസ്' എന്ന അക്കൗണ്ട് ഉൾപ്പെടെ ബന്ധപ്പെട്ട സ്രോതസ്സുകളിൽ നിന്ന് വിവരം ലഭിച്ചതായി അവകാശപ്പെട്ടതോടെയാണ് അഭ്യൂഹങ്ങൾ ആരംഭിച്ചത്. ഇമ്രാൻ ഖാൻ്റെ മരണവാർത്തകൾ പ്രചരിച്ചതോടെ പാകിസ്താനിൽ വീണ്ടും രാഷ്ട്രീയ പ്രതിസന്ധി ഉടലെടുത്തിരിക്കുകയാണ്.

ആരോപണവുമായി അനുയായികൾ

പാക്ക് ചാര സംഘടനയായ ഐഎസ്ഐയാണ് ഇമ്രാൻ ഖാനെ കൊലപ്പെടുത്തിയതെന്ന് പലരും ചൂണ്ടിക്കാട്ടുന്നുണ്ട്. പാക്ക് സൈനിക മേധാവി അസിം മുനീറും ഐഎസ്‌ഐയും ചേർന്ന് ഇമ്രാൻ ഖാനെ ജയിലിൽ വച്ച് കൊലപ്പെടുത്തി എന്ന വിവരമാണ് പുറത്തുവരുന്നതെന്ന് തർക്കപ്രദേശമായ ബലൂചിസ്താനിലെ വിദേശകാര്യ മന്ത്രാലയത്തിൻ്റെ പേരിലുള്ള എക്‌സ് അക്കൗണ്ടിലെ പോസ്‌റ്റിൽ പറഞ്ഞു. ഈ വിവരം ശരിയാണെങ്കിൽ പാക്ക് തീവ്രവാദികളുടെ അവസാനമായിരിക്കും അത്. സത്യം പുറത്തുവരുന്ന നിമിഷം പാക്ക് ഭരണകൂടത്തിൻ്റെ അവസാനത്തിൻ്റെ തുടക്കമാകുമെന്നും പോസ്‌റ്റിൽ പറയുന്നു. എന്നാൽ, ഈ വാർത്തകൾ സംബന്ധിച്ച ഔദ്യോഗിക വിശദീകരണമോ സ്ഥിരീകരണമോ ഇതുവരെ അധികൃതർ പുറത്തുവിട്ടിട്ടില്ല.

കുടുംബാംഗങ്ങളെ മർദിച്ചു

ഇമ്രാൻ ഖാൻ തടവിൽ വെച്ച് ക്രൂരമായി ആക്രമിക്കപ്പെട്ടുവെന്നും അദ്ദേഹത്തെ ഏകാന്ത തടവിൽ പാർപ്പിച്ചിരിക്കുകയാണെന്നും റിപ്പോർട്ടുകൾ വന്നിരുന്നു. മൂന്നാഴ്ചയിലധികമായി തങ്ങളുടെ സഹോദരനെ കാണാൻ അധികൃതർ അനുവദിച്ചിട്ടില്ലെന്ന് ഇമ്രാൻ ഖാൻ്റെ സഹോദരിമാരായ നൊറീൻ, അലീമ, ഉസ്മ എന്നിവർ ആരോപിക്കുന്നു. സഹോദരനെ കാണണമെന്ന് ആവശ്യപ്പെട്ട് അഡിയാല ജയിലിനു മുന്നിൽ പ്രതിഷേധിച്ച തങ്ങളെയും പാർട്ടി പ്രവർത്തകരെയും പൊലീസ് ക്രൂരമായി മർദിച്ചെന്നും അവർ ആരോപിച്ചു. യാതൊരു മുന്നറിയിപ്പുമില്ലാതെ തെരുവ് വിളക്കുകൾ അണച്ച ശേഷം പഞ്ചാബ് പോലീസ് ഉദ്യോഗസ്ഥർ ക്രൂരമായി ആക്രമിച്ചു എന്നും 71 വയസ്സുള്ള തന്നെ മുടിക്ക് പിടിച്ച് നിലത്തേക്ക് വലിച്ചിഴച്ചാണ് മർദിച്ചതെന്നും നൊറീൻ ഖാൻ പൊലീസ് മേധാവിക്ക് അയച്ച കത്തിൽ പറയുന്നു.

പീഡനം നടക്കുന്നതായി പരാതി

പാർട്ടിക്ക് അപകീർത്തി വരുത്താനുള്ള ശ്രമമാണ് നടക്കുന്നതെന്നും ജയിൽ അധികൃതരുടെ മോശം പെരുമാറ്റവും പീഡനവും സംബന്ധിച്ച് ഇമ്രാൻ ഖാൻ പലപ്പോഴും പരാതിപ്പെട്ടിരുന്നുവെന്നും അദ്ദേഹത്തിൻ്റെ സഹോദരിമാർ പറഞ്ഞു. തനിക്ക് എന്തെങ്കിലും സംഭവിക്കുകയാണെങ്കിൽ സൈനിക മേധാവിയായിരിക്കും അതിന് ഉത്തരവാദിയെന്നും കഴിഞ്ഞ ജൂലൈയിൽ ഇമ്രാൻ ഖാൻ പാർട്ടി പ്രവർത്തകരോട് പറഞ്ഞിരുന്നു. അതിനിടെ, ഖാൻ കൊല്ലപ്പെട്ടുവെന്ന അഭ്യൂഹത്തെ തുടർന്ന് ആയിരക്കണക്കിന് തെഹ്രിക് ഇ ഇൻസാഫ് പാർട്ടി പ്രവർത്തകർ അഡിയാല ജയിലിനു മുന്നിലെത്തി പ്രതിഷേധ പ്രകടനം നടത്തിയിരിക്കുകയാണ്.

മുൻപും അഭ്യൂഹം

ഇമ്രാൻ ഖാൻ കൊല്ലപ്പെട്ടതായി കഴിഞ്ഞ മേയിലും അഭ്യൂഹം പ്രചരിച്ചിരുന്നു. വിവിധ ചിത്രങ്ങളും അന്ന് പ്രചരിച്ചിരുന്നു. എന്നാൽ, ആ പ്രചാരണം വ്യാജമാണെന്ന് പാക്കിസ്‌ഥാൻ്റെ വാർത്താ വിതരണ മന്ത്രാലയം കുറിപ്പിറക്കിയിരുന്നു. 2013ൽ ഒരു പ്രചാരണ റാലിക്കിടെ ‌സ്റ്റേജിൽനിന്നു വീണ ഇമ്രാൻ ഖാനെ ആളുകൾ എടുത്തുകൊണ്ടു പോകുന്ന ചിത്രമായിരുന്നു അന്ന് വ്യാപകമായി പ്രചരിച്ചത്.

ഇമ്രാൻ ഖാൻ്റെ ഈ അവസ്ഥയ്ക്ക് കാരണം ആരായിരിക്കും? നിങ്ങളുടെ അഭിപ്രായം കമൻ്റ് ചെയ്യുക.

Article Summary: Rumours spread about former Pakistan PM Imran Khan's death in Adiala Jail.

 #ImranKhan #PakistanCrisis #AdialaJail #PTIProtest #AsimMunir #ISI