Alliance | ഇസ്രാഈലിനെതിരെ ഇസ്ലാമിക രാഷ്ട്രങ്ങളുടെ സഖ്യത്തിന് ആഹ്വാനം ചെയ്ത് തുർക്കി പ്രസിഡൻ്റ്; അണിയറയിൽ പുതിയ രാഷ്ട്രീയ നീക്കങ്ങളോ?
ADVERTISEMENT
ഇസ്രാഈലിന്റെ ധാർഷ്ട്യവും കൊള്ളയും ഭരണകൂട ഭീകരതയും തടയാനുള്ള ഒരേയൊരു നടപടി ഇസ്ലാമിക രാജ്യങ്ങളുടെ കൂട്ടായ്മയാണെന്നും എർദോഗൻ
അങ്കോറ: (KVARTHA) ഇസ്രാഈലിനെതിരെ ഇസ്ലാമിക രാജ്യങ്ങളുടെ സഖ്യത്തിന് ആഹ്വാനവുമായി തുർക്കി പ്രസിഡന്റ് റജബ് ത്വയ്യിബ് എർദോഗൻ. അധിനിവേശ വെസ്റ്റ്ബാങ്കിൽ വെള്ളിയാഴ്ച നടന്ന പ്രതിഷേധത്തിൽ പങ്കെടുത്ത തുർക്കി-അമേരിക്കൻ പൗരയായ സ്ത്രീയെ ഇസ്രാഈൽ സൈന്യം കൊലപ്പെടുത്തിയെന്ന റിപ്പോർട്ട് പുറത്തുവന്നതിന് പിന്നാലെയാണ് റജബ് ത്വയ്യിബ് എർദോഗന്റെ പ്രസ്താവന.
ഇസ്രാഈലിലെ നെതന്യാഹു ഭരണകൂടത്തിൻ്റെ വർധിച്ചുവരുന്ന ഭീഷണിക്കെതിരെ മുസ്ലീം രാജ്യങ്ങൾ സഖ്യമുണ്ടാക്കണമെന്ന് വടക്കുപടിഞ്ഞാറൻ പ്രവിശ്യയായ കൊകേലിയിൽ ശനിയാഴ്ച നടന്ന ഒരു പരിപാടിയെ അഭിസംബോധന ചെയ്തുകൊണ്ട് എർദോഗൻ പറഞ്ഞു. ഇസ്രാഈലിന്റെ ധാർഷ്ട്യവും കൊള്ളയും ഭരണകൂട ഭീകരതയും തടയാനുള്ള ഒരേയൊരു നടപടി ഇസ്ലാമിക രാജ്യങ്ങളുടെ കൂട്ടായ്മയാണെന്നും അദ്ദേഹം കൂട്ടിച്ചേർത്തു.
ഈജിപ്തുമായും സിറിയയിലെ ബഷർ അസദ് ഭരണകൂടവുമായും ബന്ധം മെച്ചപ്പെടുത്താനും പുനരാരംഭിക്കാനും തുർക്കി ശ്രമിക്കുന്നുണ്ട്, ഈ പ്രദേശത്തെ വർദ്ധിച്ചുവരുന്ന ഭീഷണികൾക്കെതിരെ ഒരുമിച്ച് പ്രവർത്തിക്കുന്നത് സഹായിക്കുമെന്ന് അദ്ദേഹം ചൂണ്ടിക്കാട്ടി. ഈജിപ്ത് പ്രസിഡൻ്റ് അബ്ദുൽ-ഫത്താഹ് അൽ-സിസിയെ തുർക്കി സന്ദർശിച്ച് ഏതാനും ദിവസങ്ങൾക്ക് ശേഷമാണ് എർദോഗൻ്റെ പരാമർശം.
12 വർഷത്തിന് ശേഷമാണ് ഒരു ഈജിപ്ഷ്യൻ നേതാവ് തുർക്കി സന്ദർശിക്കുന്നത്. ഈജിപ്ത് പ്രസിഡന്റിന്റെ സന്ദർശന വേളയിൽ ഇരുവരും നടത്തിയ സംയുക്ത വാർത്താ സമ്മേളനത്തിൽ, തുർക്കിക്കും ഈജിപ്തിനും ഫലസ്തീൻ വിഷയത്തിൽ പൊതു നിലപാടാണ് ഉള്ളതെന്ന് എർദോഗൻ അടിവരയിട്ടു, മാസങ്ങൾ നീണ്ട വംശഹത്യ അവസാനിപ്പിക്കുന്നതിന് ഇരുവരും മുൻഗണന നൽകി.
അതേസമയം, ഇസ്രായേൽ വിദേശകാര്യ മന്ത്രി ഇസ്രായേൽ കാറ്റ്സ് എർദോഗനെ വിമർശിച്ച് രംഗത്തെത്തി. ഹമാസിൻ്റെ നേട്ടത്തിനായി വിദ്വേഷവും അക്രമവും ഉത്തേജിപ്പിക്കുന്നുവെന്ന് അദ്ദേഹം ആരോപിച്ചു. ഓഗസ്റ്റിൽ ഹമാസ് രാഷ്ട്രീയകാര്യ മേധാവി ഇസ്മാഈൽ ഹനിയ്യയെ തെഹ്റാനിൽ വച്ച് കൊലപ്പെടുത്തിയതിനെ തുർക്കി അപലപിച്ചിരുന്നു.
ഫലസ്തീൻ ജനതയോട് അനുശോചനം രേഖപ്പെടുത്തുകയും സമാധാനത്തിനെതിരെയുള്ള ഇസ്രാഈൽ സർക്കാരിൻ്റെ സമീപനത്തെ വിമർശിക്കുകയും ചെയ്തുകൊണ്ട് തുർക്കി വിദേശകാര്യ മന്ത്രാലയം പ്രസ്താവനയിറക്കിരുന്നു. 2023 ഒക്ടോബർ മുതൽ നടന്നുകൊണ്ടിരിക്കുന്ന ഇസ്രാഈൽ ആക്രമണത്തിൽ ഫലസ്തീനിലെ ഗസ്സ മുനമ്പിലും മറ്റ് ഫലസ്തീൻ പ്രദേശങ്ങളിലും 40,000-ത്തിലധികം ആളുകളുടെ ജീവൻ നഷ്ടമായിട്ടുണ്ട്. ഇവരിൽ കൂടുതലും സ്ത്രീകളും കുട്ടികളുമാണ്.
#Erdogan, #IslamicAlliance, #IsraelConflict, #Turkey, #PalestinianDeaths, #MiddleEast
