ഈഫൽ ടവറിൽ ബിഎപിഎസ് സംഘത്തിൻ്റെ സന്ദർശനം; വനിതാ ജീവനക്കാരെ മാറ്റിയതിൽ പ്രതിഷേധിച്ച് പണിമുടക്ക്, ടവർ അടച്ചു

പാരിസ്: (KVARTHA) ഹൈന്ദവ സംഘടനാ പ്രതിനിധികളുടെ സന്ദർശനത്തെ തുടർന്ന് വനിതാ ജീവനക്കാരെ ജോലിയിൽനിന്ന് മാറ്റിനിർത്തിയതിൽ പ്രതിഷേധിച്ച് ഈഫൽ ടവർ താൽക്കാലികമായി അടച്ചു. ബിഎപിഎസ് (ബോച്ചാസൻവാസി അക്ഷർ പുരുഷോത്തം സ്വാമിനാരായണൻ സൻസ്ഥ) സംഘടനയുമായി ബന്ധപ്പെട്ട നൂറോളം പേരുടെ സംഘം 2026 സെപ്റ്റംബർ 5 ശനിയാഴ്ച ഈഫൽ ടവർ സന്ദർശിക്കാനായി എത്തിയപ്പോഴാണ് സംഭവമുണ്ടായത്. വിനോദസഞ്ചാര കേന്ദ്രമായ ഐഫിൽ ടവറിൽ ഉയർന്ന ലിംഗവിവേചന ആരോപണം ചർച്ചയായിരിക്കുകയാണ്.

വനിതാ ജീവനക്കാരെ മാറ്റിനിർത്തി

പാരിസിലെ പുതിയ ഹൈന്ദവ ക്ഷേത്രം തുറക്കുന്നതുമായി ബന്ധപ്പെട്ടാണ് ബിഎപിഎസ് സംഘം നഗരത്തിലെത്തിയത്. വനിതാ ജീവനക്കാർ 'കാഴ്ചയിൽപ്പെടരുത്' എന്ന സംഘത്തിൻ്റെ ആവശ്യത്തെ തുടർന്ന് ഇവർ കടന്നു പോകുന്ന വഴിയിലുള്ള വനിതാ ജീവനക്കാരെ മാറ്റി അവിടെ പുരുഷ ജീവനക്കാരെ നിയോഗിക്കുകയായിരുന്നു. ഈ സംഭവം സ്ത്രീകളെ അപമാനിക്കുന്നതും ലിംഗ സമത്വത്തിന് എതിരായ നടപടിയുമാണെന്ന് ചൂണ്ടിക്കാട്ടിയാണ് വനിതാ ജീവനക്കാർ പ്രതിഷേധവുമായി രംഗത്തെത്തിയത്. മതപരമായ നിബന്ധനകളുടെ പേരിൽ തൊഴിലിടങ്ങളിൽ വിവേചനം അനുവദിക്കാനാവില്ലെന്ന് ജീവനക്കാർ വ്യക്തമാക്കി.

മാനേജ്മെൻ്റിൻ്റെ നടപടിയും പ്രതിഷേധവും

വനിതാ ജീവനക്കാർ പണിമുടക്കിയതോടെ 2026 സെപ്റ്റംബർ 7 തിങ്കളാഴ്ച ഈഫൽ ടവർ അടച്ചു. വിനോദസഞ്ചാരികളുടെ തിരക്കേറിയ സമയത്ത് ടവർ അടച്ചിട്ടത് സന്ദർശകരെ ബാധിച്ചു. ഇതോടെ ഈഫൽ ടവർ മാനേജ്മെൻ്റായ സെറ്റ് വനിതാ ജീവനക്കാരോട് ക്ഷമാപണം നടത്തുകയും അവരെ ചർച്ചയ്ക്കു വിളിക്കുകയും ചെയ്തു. 'സ്ത്രീകളുമായുള്ള സമ്പർക്കം' പരിമിതപ്പെടുത്തുന്ന തരത്തിൽ സന്ദർശനം ക്രമീകരിക്കണമെന്ന് പ്രതിനിധി സംഘം ആവശ്യപ്പെട്ടിരുന്നുവെന്ന് ഈഫൽ ടവറിൻ്റെ നടത്തിപ്പുകാരായ സെറ്റ് സമ്മതിച്ചിട്ടുണ്ട്.

അന്വേഷണത്തിന് ഉത്തരവിട്ട് ഡെപ്യൂട്ടി മേയർ

സംഭവത്തിൽ ഫ്രഞ്ച് രാഷ്ട്രീയ നേതൃത്വവും അമർഷം രേഖപ്പെടുത്തി. ഈഫൽ ടവറിലെ പ്രതിഷേധത്തിന് കാരണമായ ആരോപണങ്ങളിൽ പാരിസ് ഡെപ്യൂട്ടി മേയർ ഇമ്മാനുവൽ ഗ്രിഗ്വാർ അന്വേഷണത്തിന് ഉത്തരവിട്ടു. തൊഴിലാളികളുടെ ആശങ്കകൾ ന്യായമാണെന്നും ശ്രദ്ധ അർഹിക്കുന്നുണ്ടെന്നും അദ്ദേഹം പറഞ്ഞു. ജീവനക്കാരുടെ പ്രതിഷേധം ന്യായമാണെന്ന് അംഗീകരിക്കുന്നുവെന്നും എക്സിലെ കുറിപ്പിൽ ഗ്രിഗ്വാർ വ്യക്തമാക്കി. ഇത്തരം നിബന്ധനകൾ അംഗീകരിക്കുന്നത് ഒരു തരത്തിലും നീതീകരിക്കാനാവില്ലെന്നും ഇത് തൻ്റെയോ ഐഫിൽ ടവർ ഉയർത്തിപ്പിടിക്കേണ്ടതോ ആയ മൂല്യങ്ങൾക്ക് ചേർന്നതല്ലെന്നും അദ്ദേഹം എക്സിൽ കുറിച്ചു.

ലിംഗഭേദമന്യേ എല്ലാവർക്കും വിവേചനമില്ലാതെ ജോലി ചെയ്യാനും സഞ്ചരിക്കാനും സാധിക്കണം. പാരിസിലെമ്പാടും പ്രത്യേകിച്ച് അതിൻ്റെ പ്രതീകാത്മകമായ ചരിത്രസ്മാരകങ്ങളിൽ, സ്ത്രീ-പുരുഷ സമത്വം കർശനമായി പാലിക്കപ്പെടണമെന്നും അദ്ദേഹം പറഞ്ഞു. ഫ്രാൻസിൻ്റെ മതേതര, സമത്വ മൂല്യങ്ങൾക്ക് വിരുദ്ധമാണ് ഇത്തരം നടപടികളെന്നാണ് രാഷ്ട്രീയ നേതൃത്വത്തിൻ്റെ വിലയിരുത്തൽ.

വിശദീകരണവുമായി ബിഎപിഎസ്

അതേസമയം, സന്ദർശകർക്ക് തടസ്സങ്ങൾ കുറയ്ക്കാനും സാധാരണ പ്രവേശനം ഉറപ്പാക്കാനും ഈഫൽ ടവർ അധികൃതരുമായി ഏകോപിപ്പിച്ചാണ് സന്ദർശനം നടത്തിയതെന്ന് ബിഎപിഎസ് അറിയിച്ചു. പൊതുജനങ്ങൾക്ക് അസൗകര്യമുണ്ടാകാതിരിക്കാൻ പ്രവർത്തന സമയം തുടങ്ങുന്ന ഘട്ടത്തിൽ തന്നെ, ഈഫൽ ടവർ മാനേജ്മെൻ്റുമായി കൂടിയാലോചിച്ചാണ് പ്രതിനിധി സംഘത്തിൻ്റെ സന്ദർശനം നിശ്ചയിച്ചതെന്ന് എക്സിൽ പങ്കുവെച്ച പ്രസ്താവനയിൽ ക്ഷേത്ര അധികൃതർ വ്യക്തമാക്കി. സന്ദർശനത്തിനിടെ മറ്റ് സന്ദർശകർക്ക് സ്മാരകത്തിലേക്ക് പ്രവേശനം നിഷേധിച്ചതായി അറിവില്ലെന്നും സംഘടന പറഞ്ഞു. വിവേചനപരമായ ആവശ്യങ്ങളും തങ്ങളുടെ ഭാഗത്തുനിന്നും ബോധപൂർവം ഉണ്ടായിട്ടില്ലെന്നാണ് സംഘടന നൽകുന്ന വിശദീകരണം.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Eiffel Tower closed briefly after staff strike over BAPS group visit protocol.

#EiffelTower #ParisNews #GenderEquality #BAPS #FranceNews #SobhaNews