ബീജിംഗ്: (KVARTHA) വിവാഹവുമായി ബന്ധപ്പെട്ട് ഓരോ നാട്ടുകാരും അവരുടേതായ ആചാരങ്ങളും അനുഷ്ഠനങ്ങളും പിന്തുടരാറുണ്ട്. എന്നാൽ കാലം മാറുന്നതിനനുസരിച്ച് ഇത്തരം സംസ്കാരങ്ങൾ എല്ലാം കാലഹരണപ്പെട്ടെന്ന് തന്നെ പറയാം. കാരണം പുതുതലമുറയുടെ ചിന്താഗതികളുമായി ഇതുപോലെയുള്ള ആചാരങ്ങൾ വളരെയധികം വ്യത്യാസപ്പെട്ടിരിക്കുന്നു. എങ്കിലും ലോകത്തിന്റെ പല ഭാഗത്തും നൂറ്റാണ്ടുകൾ പഴക്കമുള്ള ഇത്തരം ആചാരങ്ങളെ ആധുനിക വൽകരിച്ചു പുതിയ രീതിയിലേക്ക് മാറ്റുന്നവരുണ്ട്. 

എന്നാൽ അവർക്കൊന്നും അധികനാൾ നിലനിൽപുണ്ടാകില്ല. കാരണം ഇതുപോലെയുള്ള ആചാരങ്ങൾക്കെതിരെ കഠിന വിമർശനമാണ് ഉയർന്നുകൊണ്ടിരിക്കുന്നത്. സമാനമായ പ്രതികരണമാണ് വൈറലായ ഒരു വീഡിയോയ്ക്കും നേരിട്ടിരിക്കുന്നത്.  വീഡിയോ കണ്ട് പലരും തങ്ങളുടെ രോഷം പ്രകടിപ്പിച്ചു. ചൈനയിൽ നിന്നാണ് വീഡിയോ പുറത്തുവന്നിരിക്കുന്നത്. ദൃശ്യങ്ങൾ വലിയ വിവാദങ്ങൾക്കും ചര്‍ച്ചകള്‍ക്ക് വഴിവച്ചിരിക്കുകയാണ്. 

ചൈനയിലെ ജനപ്രിയ സോഷ്യൽ മീഡിയ പ്ലാറ്റ്‌ഫോമായ വെയ്ബോയിൽ വൈറലായി പടർന്ന വീഡിയോയിൽ ഞെട്ടിക്കുന്ന ദൃശ്യമാണ് കാണുന്നത്. ഒരു കൂട്ടം പുരുഷന്മാർ ഒരു വധുവിനെ ടേപ്പ് ഉപയോഗിച്ച് തൂണിൽ കെട്ടിയിടുന്നതായി കാണാം. വിവാഹ വസ്ത്രത്തിലുള്ള വധു സഹായത്തിനായി നിലവിളിക്കുന്നുണ്ടെങ്കിലും ആരും അവളെ രക്ഷിക്കാൻ വരുന്നില്ല. 

സൗത്ത് ചൈന മോർണിംഗ് പോസ്റ്റ് (എസ്സിഎംപി) റിപ്പോർട്ട് അനുസരിച്ച്, ഇവർ വരന്റെ ബാല്യകാല സുഹൃത്തുക്കളാണ്, നവദമ്പതികളുടെ സമ്മതത്തോടെ ഒരു തമാശയായിട്ടാണ് ഈ സംഭവം നടത്തിയതെന്നാണ് പറയുന്നത്. 'ഞങ്ങളുടെ പ്രദേശത്തെ ഒരു പഴമയുള്ള ആചാരമാണിത്, വിവാഹങ്ങളിൽ സുഹൃത്തുക്കൾ ചില രസകരമായ കാര്യങ്ങൾ ചെയ്യുന്നത് സാധാരണമാണ്. ഈ സംഭവത്തിൽ വധുവിന്റെ സുരക്ഷയ്ക്ക് ഞങ്ങൾ പ്രത്യേകം ശ്രദ്ധിച്ചിരുന്നു. വരനും ഇതിനൊപ്പം ഉണ്ടായിരുന്നു', വരന്റെ സുഹൃത്തായ യാങ് പറഞ്ഞു. 

ചൈനക്കാർ ഈ ആചാരത്തെ 'ഹുൻ നാവോ' എന്നു വിളിക്കുന്നു. നൂറ്റാണ്ടുകൾക്ക് മുമ്പ്, വിവാഹ ദിനത്തിൽ ചിരിക്കുന്നത് തിന്മയെ അകറ്റുമെന്ന വിശ്വാസത്തോടെയാണ് ഈ ആചാരം തുടങ്ങിയത്. നവദമ്പതികൾക്ക് ആഹ്ലാദകരമായ അന്തരീക്ഷം ഒരുക്കുക എന്നതായിരുന്നു ഇതിന്റെ പ്രധാന ലക്ഷ്യം. എന്നാൽ കാലം മാറിയതോടെ ഈ ആചാരം അതിന്റെ യഥാർത്ഥ അർത്ഥം നഷ്ടപ്പെട്ടു. ഇന്ന് ഇത് ആളുകൾക്ക് മോശം തമാശകളും അനുചിതമായ ഗെയിമുകളും കളിക്കാനുള്ള ഒരു അവസരമായി മാറിയിരിക്കുന്നു.

ഈ ആചാരം സമൂഹമാധ്യമങ്ങളിൽ വലിയ വിവാദങ്ങൾക്ക് ഇടയാക്കി. പലരും ഈ പഴമയുള്ള ആചാരത്തെ രൂക്ഷമായി വിമർശിച്ചു. 'മറ്റൊരാളുടെ ദുഃഖത്തിൽ സന്തോഷിക്കുന്നത് വളരെ വൃത്തികെട്ടതാണ്' എന്ന് ഒരു ഉപയോക്താവ് കുറിച്ചു. 'വധുവിന് എന്തെങ്കിലും സംഭവിച്ചാൽ ആരുടെ ഉത്തരവാദിത്തമായിരിക്കും?' എന്ന് മറ്റൊരാൾ ചോദിച്ചു. 'ഈ അശ്ലീലമായ വിവാഹ ആചാരങ്ങൾ കാലഹരണപ്പെട്ടതാണ്, മറ്റുള്ളവരെ വേദനിപ്പിക്കാൻ ഇതിന് ഒരു ന്യായീകരണവുമില്ല' എന്നായിരുന്നു മറ്റൊരു പ്രതികരണം.

എന്നാൽ ഈ വീഡിയോ വൈറലായതോടെ ഈ സംഭവത്തിൽ ഉൾപ്പെട്ട യാങ് ഉൾപ്പെടെയുള്ളവർ തങ്ങളുടെ പ്രവർത്തികൾക്ക് മാപ്പ് പറഞ്ഞതായി പ്രാദേശിക സർക്കാർ അധികൃതർ പ്രസ്താവന പുറപ്പെടുവിച്ചു. ഈ പ്രസ്താവനയിൽ, അവർ ഈ സംഭവത്തെ അപലപിക്കുകയും നല്ല വിവാഹ ആചാരങ്ങൾ പ്രോത്സാഹിപ്പിക്കുമെന്ന് വാഗ്ദാനം ചെയ്യുകയും ചെയ്തു. കൂടാതെ, പൗരന്മാരോട് കാലഹരണപ്പെട്ട ആചാരങ്ങൾ ഉപേക്ഷിക്കാൻ അഭ്യർത്ഥിച്ചു.

#chinesewedding #tradition #controversy #outrage #bride #viral #socialmedia