ഗര്‍ഭിണിയെന്ന വ്യാജേന കൊക്കെയ്ന്‍ കടത്താന്‍ ശ്രമിച്ച യുവതി പിടിയില്‍

കൊളംബിയ: ഗര്‍ഭിണിയെന്ന വ്യാജേന കൊക്കെയ്ന്‍ കടത്താന്‍ ശ്രമിച്ച കനേഡിയന്‍ യുവതി തബിത ലിയാ റിച്ചി കൊളംബിയന്‍ വിമാനത്താവളത്തില്‍ പിടിയിലായി. കൊളംബിയയിലെ ബൊഗോട്ടോ രാജ്യാന്തര വിമാനത്താവളത്തിലാണ് നാടകീയ സംഭവങ്ങള്‍ അരങ്ങേറിയത്. കാനഡയിലെ ടൊറാന്റോയിലേക്ക് പോകാനാണ് തബിത ലിയാ റിച്ചി  വിമാനത്താവളത്തിലെത്തിയത്.

യാത്ര ചെയ്യാനായി എമിഗ്രേഷന്‍ പരിശോധനയ്ക്കായി ക്യൂവില്‍ നിന്നിരുന്ന തബിത ലിയാ റിച്ചിയോട് സംശയം തോന്നിയ വനിതാ പോലീസ് എത്രമാസം ഗര്‍ഭിണിയാണെന്ന് ചോദിച്ചപ്പോള്‍ തബിത  പോലീസുമായി വാക്കേറ്റം നടത്തുകയായിരുന്നു. ഒടുവില്‍ വനിതാ പോലീസ് തബിതയുടെ വയര്‍ തൊട്ടു നോക്കിയപ്പോഴാണ് കൃത്രിമ ഗര്‍ഭമാണെന്ന് മനസിലായത്.

വയറിന് നല്ല തണുപ്പ് അനുഭവപ്പെട്ടതിനെ തുടര്‍ന്ന് വിശദമായ പരിശോധനകള്‍ നടത്തിയപ്പോഴാണ് കൃത്രിമ വയറിനുള്ളില്‍ രണ്ടു കിലോ കൊക്കെയ്ന്‍ കടത്താന്‍ ശ്രമിക്കുകയായിരുന്നുവെന്ന് മനസിലായത്.

ഒറ്റനോട്ടത്തില്‍ തന്നെ ഗര്‍ഭിണിയാണെന്ന് തോന്നിപ്പിക്കുന്ന തരത്തിലുള്ള കൃത്രിമ വയറാണ് യുവതി ധരിച്ചിരുന്നത്. ചോദ്യം ചെയ്യലില്‍ താന്‍ ഏഴുമാസം ഗര്‍ഭിണിയാണെന്ന് തബിത പറഞ്ഞിരുന്നു. 60,000 ത്തോളം രൂപ

വിലവരുന്ന കൊക്കെയ്ന്‍ ആണ് പിടികൂടിയത്.  ഈ കേസില്‍ യുവതിക്ക് അഞ്ചു മുതല്‍ എട്ടുവര്‍ഷം വരെ ജയില്‍ ശിക്ഷ അനുഭവിക്കേണ്ടി വരും. 2013 ല്‍ ഇതുവരെ ബൊഗോട്ടോ വിമാനത്താവളത്തില്‍ നിന്നും ലഹരി മരുന്ന് കടത്തിയതിന് 150 ഓളം യാത്രക്കാര്‍ പിടിയിലായിട്ടുണ്ട്.
പൂഴി കടത്ത് തടയാനെത്തിയ എസ്.ഐയെ സ്ത്രീകളുള്‍പെടെയുള്ള സംഘം തടഞ്ഞു