ധാക്ക: (KVARTHA) ബംഗ്ലാദേശിൽ രാജ്യദ്രോഹക്കുറ്റം ചുമത്തി അറസ്റ്റിലായ ഇന്റർനാഷണൽ സൊസൈറ്റി ഫോർ കൃഷ്ണ കോൺഷ്യസ്‌നെസ്‌ (ഇസ്‌കോൺ) നേതാവ്‌ ചിൻമോയ് കൃഷ്ണ ദാസിന്റെ ജാമ്യാപേക്ഷ ചിറ്റഗോംഗ് കോടതി തള്ളി.ചിന്മയ് കൃഷ്ണ ദാസിന്റെ അഭിഭാഷക സംഘം ശക്തമായ വാദങ്ങൾ നിരത്തിയെങ്കിലും കോടതി ജാമ്യം അനുവദിച്ചില്ല. ഈ സാഹചര്യത്തിൽ ഹൈകോടതിയെ സമീപിക്കാനൊരുങ്ങുകയാണ് ബന്ധപ്പെട്ടവർ. 

ബംഗ്ലാദേശിന്റെ ദേശീയ പതാകയെ അപമാനിച്ചുവെന്നാരോപിച്ചാണ് ചിന്മയ് കൃഷ്ണ ദാസിനെതിരെ കേസെടുത്തിരിക്കുന്നത്. ബംഗ്ലാദേശ് പീനൽ കോഡിലെ വിവിധ വകുപ്പുകൾ പ്രകാരമാണ് അദ്ദേഹത്തിനെതിരെ രാജ്യദ്രോഹക്കുറ്റം ചുമത്തിയിരിക്കുന്നത്. ഒക്ടോബർ 25-ന് ചിറ്റഗോങ്ങിലെ ന്യൂ മാർക്കറ്റ് ഏരിയയിൽ നടന്ന ഒരു സംഭവമാണ് കേസിനാധാരം. 

ഷെയ്ഖ് ഹസീന സർക്കാരിന്റെ പതനത്തിനു ശേഷം ബംഗ്ലാദേശിൽ ന്യൂനപക്ഷങ്ങൾക്കെതിരായ ആക്രമണങ്ങൾ വർധിച്ചതായി ആരോപണങ്ങൾ ഉയർന്നിട്ടുണ്ട്. ന്യൂനപക്ഷങ്ങൾക്കെതിരായ ആക്രമണങ്ങൾക്കെതിരെ ചിന്മയ് കൃഷ്ണദാസ് നിരവധി പ്രതിഷേധങ്ങളിൽ പങ്കെടുത്തതും ശ്രദ്ധേയമാണ്.

ഇത് വളരെ ദുഃഖകരമായ വാർത്തയാണെന്നും ലോകം മുഴുവൻ ഈ കേസിനെ ശ്രദ്ധയോടെയാണ് വീക്ഷിക്കുന്നതെന്നും കൊൽക്കത്ത ഇസ്കോൺ വൈസ് പ്രസിഡന്റ് രാധാ രമൺ ദാസ് പ്രതികരിച്ചു. ബംഗ്ലാദേശ് സർക്കാർ നീതി ഉറപ്പാക്കണമെന്നും അദ്ദേഹം ആവശ്യപ്പെട്ടു. അഡ്വ. അപൂർബ കുമാർ ഭട്ടാചാര്യയുടെ നേതൃത്വത്തിലുള്ള നിയമ സംഘമാണ് ചിന്മയിക്ക് വേണ്ടി കോടതിയിൽ ഹാജരായത്.

ഡിസംബർ മൂന്നിന് ചിറ്റഗോങ്ങിലെ കോടതി ജനുവരി രണ്ടിന് ജാമ്യ ഹർജി പരിഗണിക്കാനായി മാറ്റിവെച്ചിരുന്നു. പ്രോസിക്യൂഷൻ കൂടുതൽ സമയം ആവശ്യപ്പെട്ടതിനാലും ചിന്മയിക്ക് വേണ്ടി അന്ന് കോടതിയിൽ അഭിഭാഷകൻ ഇല്ലാതിരുന്നതിനാലുമാണ് കേസ് മാറ്റിവെച്ചത്. ജനുവരി ഒന്നിന് ഇസ്കോൺ കൊൽക്കത്ത, ചിന്മയ് കൃഷ്ണ ദാസിന് കോടതിയിൽ നീതി ലഭിക്കുമെന്ന പ്രതീക്ഷ പ്രകടിപ്പിച്ചിരുന്നു. വിധി എതിരായതോടെ ചിന്മയ് കൃഷ്ണ ദാസിന്റെ അഭിഭാഷകർ മേൽ കോടതിയിൽ അപ്പീൽ നൽകാനുള്ള ആലോചനയിലാണ്.

#ChinmoyKrishnaDas, #ISKCON, #BangladeshNews, #LegalNews, #CourtCase, #BailRejection