വാഷിംഗ്ടൺ: (KVARTHA) ബഹിരാകാശയാത്രിക സുനിത വില്യംസ് ഇപ്പോൾ അന്താരാഷ്ട്ര ബഹിരാകാശ നിലയത്തിൽ ഒരു ദൗത്യത്തിലാണ്. സെപ്റ്റംബർ 19 ന് വ്യാഴാഴ്ച, ഭൂമിയെ വലം വയ്ക്കുന്ന അന്താരാഷ്ട്ര ബഹിരാകാശ നിലയത്തിൽ വച്ച് അവർ തന്റെ ജന്മദിനം ആഘോഷിച്ചത് വേറിട്ടതായി. ഭൂമിയിൽ നിന്ന് 400 കിലോമീറ്റർ മുകളിലായി, സുനിത ഈ അപൂർവ അനുഭവം ആസ്വദിച്ചു. ഇത് രണ്ടാം തവണയാണ് വില്യംസ് ബഹിരാകാശത്ത് തൻ്റെ ജന്മദിനം ആഘോഷിക്കുന്നത്. 2012-ലെ ദൗത്യത്തിൽ അവർ ബഹിരാകാശത്ത് ജന്മദിനം ആഘോഷിച്ചിരുന്നു.

ജന്മദിനത്തിൽ തന്നെ സുനിത ബഹിരാകാശ നിലയത്തിൽ ഒരു പ്രധാന അറ്റകുറ്റപ്പണിയും നടത്തി. മറ്റൊരു ബഹിരാകാശയാത്രികനായ ഡോൺ പെറ്റിറ്റിനൊപ്പം ചേർന്ന്, ബഹിരാകാശ നിലയത്തിലെ ‘സ്പേസ് ബാത്ത്റൂം’ എന്ന് വിളിക്കപ്പെടുന്ന മാലിന്യ ശുചിത്വ കമ്പാർട്ട്മെൻ്റ്ഫിലെ ഫിൽട്ടറുകൾ മാറ്റിസ്ഥാപിച്ചു. ഈ പ്രവൃത്തി ബഹിരാകാശ നിലയത്തിലെ എല്ലാവർക്കും ശുദ്ധവായു ലഭിക്കാൻ സഹായിക്കും. പരിചയസമ്പന്നയായ സുനിത വില്യംസിന് ഇത് മൂന്നാമത്തെ ബഹിരാകാശ യാത്രയാണ്.

ഹൂസ്റ്റണിലെ മിഷൻ കൺട്രോൾ റൂമിലെ വിദഗ്ധരുമായും സുനിത ജന്മദിനത്തിൽ വിശദമായ ചർച്ചകൾ നടത്തി. ദൗത്യത്തിന്റെ ലക്ഷ്യങ്ങളും ഭാവിയിലെ പദ്ധതികളും ചർച്ചയായി. ജൂൺ അഞ്ചിന് ബോയിംഗ് സ്റ്റാർലൈനറിൽ ബഹിരാകാശത്തേക്ക് പോയ സുനിതയും ബുച്ച് വിൽമോറും ഏകദേശം ഒരു ആഴ്ചയ്ക്കുള്ളിൽ തിരിച്ചെത്തേണ്ടതായിരുന്നു. എന്നാൽ സ്റ്റാർലൈനറിൽ സംഭവിച്ച നിരവധി സാങ്കേതിക പ്രശ്നങ്ങൾ കാരണം തിരിച്ചുവരവ് വൈകി. ഹീലിയം ചോർച്ച സംഭവിച്ചതും പ്രധാന പ്രശ്നമായിരുന്നു. ഈ സാഹചര്യത്തിൽ, സുനിതയും വിൽമോറും ഇല്ലാതെയാണ് സ്റ്റാർലൈനർ ഭൂമിയിലേക്ക് മടങ്ങിയത്.

സുനിതയും വിൽമോറും 2025 ഫെബ്രുവരിയിൽ ഭൂമിയിലേക്ക് മടങ്ങുന്നതിനായി കാത്തിരിക്കുകയാണ്. ഇപ്പോൾ അവർ ബഹിരാകാശ നിലയത്തിലെ മുഴുവൻ ക്രൂവിന്റെയും ഭാഗമാണ്. നിലയത്തിലെ പതിവ് അറ്റകുറ്റപ്പണികളും പരീക്ഷണങ്ങളും വിജയകരമായി പൂർത്തിയാക്കുന്നതിൽ വിൽമോർ പ്രധാന പങ്കു വഹിക്കുന്നു. ഈ ആഴ്ച ആദ്യം, വിൽമോർ ഉൾപ്പെടെയുള്ള ക്രൂ അംഗങ്ങൾ രണ്ട് റഷ്യക്കാരെയും ഒരു അമേരിക്കക്കാരനെയും വഹിച്ചുകൊണ്ട് വന്ന സോയൂസ് ബഹിരാകാശ പേടകത്തെ സ്വാഗതം ചെയ്തു. ഈ പുതിയ അംഗങ്ങളുടെ വരവോടെ, നിലയത്തിൽ ഇപ്പോഴുള്ള ബഹിരാകാശയാത്രികരുടെ എണ്ണം 12 ആയി.

#SunitaWilliams #ISS #NASA #space #spaceexploration #birthday #spacewalk