Birth Child | ആത്മീയ അനുഭവം; മകന്റെ കുഞ്ഞിന് ജന്മം നല്‍കി അമ്മ; ഒരു മുത്തശ്ശി തന്റെ പേരക്കുട്ടിക്ക് ജന്മം നല്‍കുന്നത് അസാധാരണമായ സംഭവമെന്ന് ആശുപത്രി അധികൃതര്‍

ന്യൂയോര്‍ക്: (www.kvartha.com) വാടക ഗര്‍ഭധാരണവുമായി ബന്ധപ്പെട്ട് ദിനംപ്രതി നിരവധി വാര്‍ത്തകള്‍ റിപോര്‍ട് ചെയ്യുന്നുണ്ട്. എന്നാല്‍ അതില്‍ നിന്നുമൊക്കെ ഏറെ വ്യത്യസ്തമായ ഒരു വാടക ഗര്‍ഭധാരണത്തിന്റെ വാര്‍ത്തയാണ് യുഎസിലെ യൂടായില്‍ നിന്ന് പുറത്തുവരുന്നത്.


വാടക ഗര്‍ഭധാരണത്തിലൂടെ മകന്‍ ജെഫ് ഹോകിന്റെ കുഞ്ഞിന് ജന്മം നല്‍കാന്‍ 56 കാരിയായ നാന്‍സി ഹോക് തയാറാകുകയായിരുന്നു. യൂടാ സാങ്കേതിക സര്‍വകലാശാലയില്‍ ഉദ്യോഗസ്ഥയാണ് നാന്‍സി. ജെഫ് ഹോക് -കാമ്പ്രിയ ദമ്പതികളുടെ അഞ്ചാമത്തെ കുഞ്ഞിന് ജന്മം നല്‍കാനാണ് അമ്മയായ നാന്‍സി ഹോകിന് ഭാഗ്യം ലഭിച്ചത്.

'മനോഹരമായ നിമിഷം. എത്രപേര്‍ക്ക് അവരുടെ അമ്മ ഒരു കുഞ്ഞിന് ജന്മം നല്‍കുന്ന ധന്യമുഹൂര്‍ത്തത്തിന് സാക്ഷികളാകാന്‍ സാധിക്കും?' എന്ന കുറിപ്പോടെയാണ് വെബ് ഡെവലപറായ ജെഫ് ഹോക് വാര്‍ത്ത പുറംലോകത്തെ അറിയിച്ചത്.

ഒമ്പത് മണിക്കൂര്‍ സമയമെടുത്താണ് നാന്‍സി മകന്റെ കുഞ്ഞിനു ജന്മം നല്‍കിയത്. ഇത് ആത്മീയ അനുഭവമായിരുന്നു എന്ന് പ്രസവത്തിനുശേഷം നാന്‍സി പറഞ്ഞു. കുഞ്ഞിനു ജന്മം നല്‍കിയതിനു ശേഷം നാന്‍സി പലതരത്തിലുള്ള വൈകാരിക അവസ്ഥകളിലൂടെ കടന്നുപോയതായും 'പ്യൂപിള്‍' റിപോര്‍ട് ചെയ്യുന്നു. എന്നാല്‍ കുഞ്ഞിനെ തന്റെ ഒപ്പം കൊണ്ടുപോകില്ലെന്ന് നാന്‍സി വ്യക്തമാക്കി.

വളരെ വലിയ നന്ദിയും ചെറിയ ദുഃഖവും ഈ വേര്‍പാടില്‍ എനിക്കുണ്ടെന്ന് നാന്‍സി പറഞ്ഞു. അമ്മയുടെ ആഗ്രഹ പ്രകാരം കുഞ്ഞിനു ഹന്ന എന്നാണ് പേരിട്ടിരിക്കുന്നതെന്ന് ഹോക് പറഞ്ഞു. ഗര്‍ഭിണിയായിരിക്കുമ്പോള്‍ ഒരു ദിവസം അര്‍ധരാത്രി ഉറക്കത്തില്‍ 'എന്റെ പേര് ഹന്ന' എന്ന് അമ്മ പറഞ്ഞിരുന്നു. അതുകൊണ്ടാണ് കുഞ്ഞിന് ആ പേര് തന്നെ നല്‍കിയതെന്നും ഹോക് പറഞ്ഞു.