തലയില്‍ പേന്‍ ചെള്ള് ചോരകുടിച്ച് വീര്‍ത്തു; 5 വയസുകാരി തളര്‍ന്നുവീണു, പിന്നീട് സംഭവിച്ചത്

വാഷിങ്ടണ്‍: (www.kvartha.com 12.06.2018) തലയില്‍ പേന്‍ ചെള്ള് ചോരകുടിച്ച് വീര്‍ത്തു. ഇതോടെ അഞ്ചു വയസുകാരി തളര്‍ന്നുവീണു. അമേരിക്കയിലെ മിസ്സിസ്സിപ്പിയില്‍ ഇക്കഴിഞ്ഞ ബുധനാഴ്ചയാണ് സംഭവം. കെയ്‌ലിന്‍ ഗ്രിഫിന്‍ എന്ന അഞ്ചു വയസ്സുകാരിയാണ് പേന്‍ ചെള്ള് കടിച്ചതിനെ തുടര്‍ന്ന് തളര്‍ന്നുവീണത്. രാവിലെ ഉറക്കമെണീറ്റ കുട്ടിക്ക് കാലുകള്‍ നിലത്തു കുത്താനായില്ല. പൊടുന്നനെ ഒരു നനഞ്ഞ തുണി കണക്കെ അവള്‍ നിലത്ത് കുഴഞ്ഞു വീഴുകയായിരുന്നു.

വീണിടത്തുനിന്നും പല തവണ അവള്‍ എഴുന്നേല്‍ക്കാന്‍ ശ്രമിച്ചെങ്കിലും കാലുകളുടെ സ്വാധീനം നഷ്ടപ്പെട്ടതുപോലെയായിരുന്നു. സംസാരിക്കാന്‍ പോലും ആ പിഞ്ചുകുട്ടിക്ക് കഴിഞ്ഞില്ല. ഇതോടെ കുടുംബത്തിന്റെ മനസമാധാനം തകര്‍ന്നു. തലേദിവസം രാത്രി പോലും ചുറുചുറുക്കോടെ കളിച്ചു നടന്നവളാണ് ഇപ്പോള്‍ ഒന്നിനും വയ്യാത്ത അവസ്ഥയിലെത്തിയിരിക്കുന്നത്. അതുകൊണ്ടു തന്നെ കൊച്ചു കെയ്‌ലിന്റെ ദുരന്തം താങ്ങാന്‍ കുടുംബത്തിന് കഴിയുമായിരുന്നില്ല.


പിന്നീട് കുട്ടിയെ ചേര്‍ത്ത് പിടിച്ച് തലമുടി കെട്ടിയൊതുക്കുമ്പോഴാണ് ചോരകുടിച്ച് കിടക്കുന്ന പേന്‍ചെള്ള് അമ്മയുടെ ശ്രദ്ധയില്‍പെട്ടത്. ഇതാകാം മകളുടെ ഉന്മേഷക്കുറവിന് കാരണമെന്ന് മനസ്സിലായെങ്കിലും കുട്ടിയുടെ ചോരയൂറ്റിയെടുത്ത ചെള്ളും അസുഖവും തമ്മില്‍ ബന്ധമുണ്ടായെങ്കിലോ എന്ന് സംശയിച്ച് അമ്മ ജെസ്സീക്ക ഗ്രിഫിന്‍ ചെള്ളിനെ പിടിച്ച് കവറിനുള്ളിലാക്കി ആശുപത്രിയിലേക്ക് തിരിച്ചു.

വിവിധ തരത്തിലുള്ള പരിശോധനകള്‍ക്ക് ശേഷമാണ് ഡോക്ടര്‍മാര്‍ക്ക് കുട്ടിയുടെ രോഗം സംബന്ധിച്ച അനുമാനത്തിലെത്താന്‍ സാധിച്ചത്. അതില്‍ പിടികൂടിയ ചെള്ളിനെ കുറിച്ചുള്ള അറിവ് ഏറെ നിര്‍ണായകമായിരുന്നു.