Disease | പുഴയിലോ കുളത്തിലോ ഇറങ്ങും മുമ്പ് ശ്രദ്ധിക്കുക! കേരളത്തിന് ആശങ്കയായി അമീബിക് മസ്തിഷ്കജ്വരം; എന്താണ് ഈ അത്യപൂർവ മാരകരോഗം?

 
സാധാരണയായി, തടാകങ്ങൾ, നദികൾ, ചൂടുനീരുറവകൾ, വ്യാവസായിക പ്ലാന്റുകളിൽ നിന്നുള്ള ചൂടുവെള്ളം പുറന്തള്ളൽ, ക്ലോറിനേറ്റ് ചെയ്യാത്ത മനുഷ്യനിർമിത ജലസ്രോതസുകൾ തുടങ്ങിയ ഇടങ്ങളിലാണ് ഈ അമീബ കാണപ്പെടുന്നത്. മലിനമായ ടാപ്പ് വെള്ളത്തിലും ചൂടുവെള്ള ഹീറ്ററുകളിലും ഇത് അപൂർവമായി കണ്ടെത്തിയിട്ടുണ്ട്.


ശരീരത്തിലെത്തുന്നത്

അമീബ ഒരു ഏകകോശ ജീവിയാണ്. അത് വളരെ ചെറുതാണ്. ഒരു മൈക്രോസ്കോപ്പ് ഉപയോഗിച്ച് മാത്രമേ കാണാൻ കഴിയൂ. തടാകങ്ങൾ, നദികൾ, നീരുറവകൾ എന്നിവയിലെ ശുദ്ധജലത്തിലാണ് ഈ ജീവികൾ സാധാരണയായി കാണപ്പെടുന്നത്. അമീബയുള്ള വെള്ളം ഒരു വ്യക്തിയുടെ മൂക്കിലൂടെ ശരീരത്തില്‍ പ്രവേശിച്ച് തലച്ചോറിലെത്തുകയും മസ്തിഷ്‌ക കോശങ്ങളെ നശിപ്പിക്കുകയും ചെയ്യുന്നു. സാധാരണയായി നീന്തുമ്പോൾ മൂക്കിലൂടെ ശരീരത്തിൽ പ്രവേശിച്ചാണ് നെഗ്ലേരിയ ഫൗലേരി ആളുകളെ ബാധിക്കുന്നത്.


രോഗലക്ഷണങ്ങൾ

അമീബിക് മസ്തിഷ്കജ്വരം ബാധിച്ചവരിൽ സാധാരണയായി പനി, തലവേദന, കഴുത്ത് വേദന, ഓക്കാനം, വയറിളക്കം എന്നിവ തുടങ്ങിയ ഇൻഫ്ലുവൻസയുടേതിന് സമാനമായ രോഗലക്ഷണങ്ങൾ ആദ്യം കാണിക്കുന്നു. രോഗം പുരോഗമിക്കുന്തോറും ഗുരുതര നാഡീ സംബന്ധമായ പ്രശ്നങ്ങൾ ഉണ്ടാകാം. ഗുരുതരമായ കേസുകളിൽ കോമയിലേക്ക് പോലും വഴുതി വീഴാം. അമീബ ശരീരത്തിൽ പ്രവേശിച്ച് ഒന്നു മുതൽ 12 ദിവസങ്ങൾക്കുള്ളിൽ ഈ അണുബാധയുടെ ലക്ഷണങ്ങൾ കണ്ടുതുടങ്ങും.


ജാഗ്രത പ്രധാനം

ഈ രോഗം അപൂർവമാണ് എങ്കിലും ജാഗ്രത പാലിക്കേണ്ടത് ആവശ്യമാണ്. കുളങ്ങൾ, ചൂടുള്ള നീരുറവകൾ എന്നിവ പോലുള്ള ശുദ്ധജല സ്രോതസ്സുകളിൽ മുക്കിലൂടെ വെള്ളം കയറാതിരിക്കാൻ ശ്രദ്ധിക്കണം. കുളിക്കുന്നതിനു മുമ്പ് ജലസ്രോതസ്സ് ശുദ്ധജലമാണെന്ന് ഉറപ്പാക്കുകയും വേണം. മലിനജലം കെട്ടിക്കിടക്കുന്ന സാഹചര്യം ഒഴിവാക്കുന്നതും നല്ലതാണ്. മുഖം ശുദ്ധിയാക്കാൻ മലിനമായ ടാപ്പ് വെള്ളം ഉപയോഗിക്കുമ്പോഴും നെഗ്ലേരിയ ഫൗലേരി അണുബാധ ഉണ്ടാകാം. പൊതു കുളങ്ങൾ, ചൂടുള്ള നീരുറവകൾ, മലിനീകൃത ജലാശയങ്ങൾ എന്നിവിടങ്ങളിൽ മുങ്ങുകയോ നീന്തുകയോ ചെയ്യുന്നത് ഒഴിവാക്കുക.
ഈ ജലസ്രോതസ്സുകളിൽ വെള്ളം മുഖത്തേക്ക് തളിക്കുന്നത് പോലും ഒഴിവാക്കുക.