മഴയില്ല, ബാണാസുര ഡാം വറ്റുന്നു, കുടിവെള്ളം മുട്ടുമോയെന്ന ആശങ്കയില്‍ കോഴിക്കോട്ടുകാര്‍

ജൂണ്‍ കടന്ന് ജൂലൈയായി. എന്നിട്ടും മഴ കാര്യമായി ഒന്നും കനിഞ്ഞില്ലെന്നതാണ് വാസ്തവം. അവിടെയും ഇവിടെയും പേരിനു പെയ്തു പോയതല്ലാതെ വറ്റിക്കൊണ്ടിരിക്കുന്ന ഭൂമിയെ വീണ്ടും നിറയ്ക്കാന്‍ പാകത്തിന് മഴയൊന്നും ലഭിച്ചില്ല. ഇതിന്റെ പ്രതിഫലനം നദികളിലും അണക്കെട്ടുകളിലും കാണാം.

വയനാട്ടിലെ ബാണാസുര അണക്കെട്ട് വരും കാലം എത്ര രൂക്ഷമായിരിക്കുമെന്നതിന്റെ സൂചനകള്‍ നല്‍കിക്കഴിഞ്ഞു. വര്‍ഷകാല സമയമായിട്ടും മഴ ലഭിക്കാത്തതിനാല്‍ ബാണാസുര അണക്കെട്ടില്‍ ജലനിരപ്പ് നന്നേ കുറവാണ്. അണക്കെട്ടിന്റെ വൃഷ്ടിപ്രദേശത്ത് മഴ കാര്യമായി ലഭിക്കാത്തതിനാല്‍ നീരൊഴുക്ക് കുറഞ്ഞിരിക്കുകയാണ്. നദിയില്‍ പലഭാഗത്തും അടിത്തട്ട് കാണാവുന്ന അവസ്ഥ. ചിലയിടങ്ങളില്‍ വേനല്‍ക്കാലത്തേപ്പോലെ തന്നെ വെള്ളമേയില്ല.


മഴക്കാലമായാല്‍ സാധാരണ അണക്കെട്ടിന്റെ സമീപപ്രദേശങ്ങളിലെല്ലാം വെള്ളം കയറുന്നതാണ്. എന്നാല്‍, ഇപ്പോള്‍ സമീപവാസികള്‍ക്ക് വെള്ളം കാണണമെങ്കില്‍ അണക്കെട്ടില്‍ ഇറങ്ങി നോക്കേണ്ട അവസ്ഥയാണ്. 2015 ല്‍ 86 ദശലക്ഷം മീറ്റര്‍ ക്യൂബിക് വെള്ളമാണ് ഡാം വൃഷ്ടിപ്രദേശത്ത് ലഭിച്ചത്. ഇക്കുറി ഇതുവരെ ലഭിച്ചതാകട്ടെ 51 ദശലക്ഷം മീറ്റര്‍ ക്യൂബിക്കും.

ബാണാസുരയിലെ ഈ അവസ്ഥ സാരമായി ബാധിക്കുന്നത് കോഴിക്കോട്ടുകാരെയാണ്. കോഴിക്കോടിന്റെ ജീവനാടിയെന്ന് വേണമെങ്കില്‍ ബാണാസുര അണക്കെട്ടിനെ വിശേഷിപ്പിക്കാം. കാരണം, ഇവിടുത്തുകാര്‍ കുടവെള്ള സ്രോതസായി ഉപയോഗിക്കുന്ന കുറ്റിയാടിയിലേക്ക് വെള്ളമെത്തുന്നത് ബാണാസുരയില്‍ നിന്നാണ്. ഇതു മാത്രമോ കോഴിക്കോട്ടുകാരെ വെളിച്ചം കാണിക്കുന്ന കക്കയം ജലവൈദ്യുത പദ്ധതിയും ആശ്രയിക്കുന്നത് ബാണാസുരയെ തന്നെ. ഈ അണക്കെട്ട് വറ്റിയാല്‍ വരാന്‍ പോകുന്നത് വലിയൊരു ദുരന്തം തന്നെയായിരിക്കും.

Also Read: