അതിശക്തമായ മഴ; മുല്ലപ്പെരിയാറിലും ഇടുക്കിയിലും ജലനിരപ്പ് ഉയരുന്നു

കുമളി: (KVARTHA) വൃഷ്ടിപ്രദേശങ്ങളിൽ ശക്തമായ മഴ തുടങ്ങിയതോടെ മുല്ലപ്പെരിയാർ അണക്കെട്ടിലെ ജലനിരപ്പിൽ ഒരടിയിലേറെ വർധന രേഖപ്പെടുത്തി. ജൂലൈ 31 വെള്ളിയാഴ്ച രാവിലെ 6-ന് 112.45 അടിയായിരുന്ന ജലനിരപ്പ് ഓഗസ്റ്റ് 1 ശനിയാഴ്ച രാവിലെ 113.70 അടിയായി ഉയർന്നു. എന്നാൽ മുൻവർഷം ഇതേ ദിവസം ഡാമിൽ 134.90 അടി വെള്ളമുണ്ടായിരുന്നു. ഇതനുസരിച്ച് മുൻവർഷത്തേക്കാൾ 21.25 അടിയുടെ കുറവാണ് നിലവിൽ രേഖപ്പെടുത്തിയിട്ടുള്ളത്.

24 മണിക്കൂറിനുള്ളിൽ അണക്കെട്ടിലേക്ക് സെക്കൻഡിൽ 2650 ഘനയടി വീതം വെള്ളം ഒഴുകിയെത്തിയപ്പോൾ തമിഴ്‌നാട് വെറും 268 ഘനയടി വെള്ളം മാത്രമാണ് കൊണ്ടുപോയത്. അണക്കെട്ട് പ്രദേശത്ത് 117.4 മില്ലിമീറ്ററും, തേക്കടിയിൽ 93.2 മില്ലിമീറ്ററും, കുമളിയിൽ 91 മില്ലിമീറ്ററും മഴയാണ് പെയ്തത്. മുല്ലപ്പെരിയാറിൽ നിന്നുള്ള ജലം ശേഖരിക്കുന്ന തമിഴ്നാട്ടിലെ വൈഗ അണക്കെട്ടിലെ ജലനിരപ്പ് ഓഗസ്റ്റ് 1 ശനിയാഴ്ച രാവിലെ 6 മണിക്ക് 33.79 അടിയാണ്.

ഇടുക്കിയിലും വർധന

മുല്ലപ്പെരിയാറിന് പുറമെ ഇടുക്കി ജലസംഭരണിയിലും ഒറ്റ ദിവസം കൊണ്ട് 3.4 അടി വെള്ളം ഉയർന്നു. ജൂലൈ 31 വെള്ളിയാഴ്ച 2330.90 അടിയായിരുന്ന ജലനിരപ്പ് ഒറ്റദിവസം കൊണ്ട് വർധിച്ച് നിലവിൽ 2334.30 അടിയായിട്ടുണ്ട്. ജൂലൈ 31 വെള്ളിയാഴ്ച രാത്രി മാത്രം 154.40 മില്ലിമീറ്റർ മഴയാണ് പ്രദേശത്ത് പെയ്തത്. ഇടുക്കി ഡാമിൻ്റെ പരമാവധി സംഭരണ ശേഷി 2403 അടിയാണ്.

ജലനിരപ്പ് കൃത്യമായി നിരീക്ഷിക്കുന്നതിൻ്റെ ഭാഗമായി അധികൃതർ ഡാമുകളിൽ പ്രത്യേക പരിശോധനകൾ നടത്തുന്നുണ്ട്. ഡാമിലെ ജലനിരപ്പ് ക്രമീകരിക്കുന്നതിൻ്റെ ഭാഗമായി മൂലമറ്റത്ത് വൈദ്യുതോൽപ്പാദനം കുറച്ചിട്ടുണ്ട്. കഴിഞ്ഞ ദിവസം 4.090 ദശലക്ഷം യൂണിറ്റായിരുന്നു ഇവിടുത്തെ വൈദ്യുതോൽപ്പാദനം.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങൾളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Mullaperiyar and Idukki dam water levels rise following heavy rain.

#MullaperiyarDam #IdukkiDam #KeralaRain #WaterLevel #KumilyNews #KeralaWeather #AmmuNews