സംസ്ഥാനത്ത് കനത്തമഴയും ഇടിയും മിന്നലും; വെള്ളംപൊങ്ങിയതിനെ തുടര്ന്ന് പലയിടങ്ങളിലും ഗതാഗതക്കുരുക്ക്, കാസര്കോട് ഉരുള്പൊട്ടല്
Oct 3, 2021, 08:40 IST
ADVERTISEMENT
കോഴിക്കോട്: (www.kvartha.com 03.10.2021) കേരളത്തില് കനത്തമഴയും ഇടിയും മിന്നലും. തമിഴ്നാട് തീരത്തോട് ചേര്ന്നുള്ള ചക്രവാതച്ചുഴിയാണ് സംസ്ഥാനത്ത് മഴ ശക്തമാകാന് കാരണം. ബുധനാഴ്ചവരെ മഴ തുടരുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ അറിയിപ്പ്.
കനത്ത മഴയില് വയനാട്ടിലും കോഴിക്കോട്ടും പലയിടങ്ങളിലും വെള്ളംപൊങ്ങിയതിനെ തുടര്ന്ന് ഗതാഗതക്കുരുക്കുണ്ടായി. കോഴിക്കോട് മുക്കത്ത് നാലു കടകളില് വെള്ളംകയറി സാധനങ്ങള് നശിച്ചു. ഈ പ്രദേശത്ത് ആദ്യമായാണ് കടകളില് വെള്ളം കയറിയതെന്നും ലക്ഷങ്ങളുടെ നാശനഷ്ടമുണ്ടായെന്നുമാണ് വ്യാപാരികള് പറയുന്നത്.
കോഴിക്കോട് ജില്ലയിലെ പല ഭാഗത്തും താഴ്ന്ന പ്രദേശങ്ങളില് വെള്ളം കയറി. വയനാട്ടിയും കനത്ത മഴ തുടരുന്നു. കോഴിക്കോട് കാരശ്ശേരി തോട്ടക്കാട് ഭാഗത്ത് മണ്ണിടിച്ചിലും ഉണ്ടായി.
കാസര്കോട് മരുതോം മലയോര ഹൈവേയ്ക്ക് സമീപം വനത്തില് ഉരുള്പൊട്ടി. സംഭവത്തില് ആളപായമില്ല. ശനിയാഴ്ച വൈകുന്നേരത്തോടെയാണ് സംഭവം. റോഡിന് ഇരുവശവുമുള്ള സ്ലാബുകള് തകര്ന്നു വീഴുകയും മണ്ണിടിഞ്ഞ് ഗതാഗതം തടസപ്പെടുകയും ചെയ്തു. എന്നാല് വീടുകള്ക്കും മറ്റും നാശനഷ്ടം റിപോര്ട് ചെയ്തിട്ടില്ല.
ആറ് ജില്ലകളില് നാളെ യെലോ അലര്ടാണ്. പത്തനംതിട്ട, കോട്ടയം, ഇടുക്കി, മലപ്പുറം, കോഴിക്കോട്, വയനാട് ജില്ലകളിലാണ് യെലോ അലര്ട്. ഇടിമിന്നലോട് കൂടിയ ഒറ്റപ്പെട്ട ശക്തമായ മഴയ്ക്കാണ് സാധ്യത. തിങ്കളാഴ്ച ഇടുക്കിയില് ഓറഞ്ച് അലര്ട് പ്രഖ്യാപിച്ചിട്ടുണ്ട്. പത്തനംതിട്ടയിലും പാലക്കാട് മുതല് വടക്കോട്ടുള്ള ജില്ലകളിലും യെലോ അലര്ടായിരിക്കും.
നിങ്ങളുടെ അഭിപ്രായങ്ങൾ കെവാർത്തയുടെ ഫെയ്സ്ബുക്ക് പേജിൽ പങ്കുവെക്കാം.
അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ
ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന
നിയമനടപടികൾ നേരിടേണ്ടിവന്നേക്കാം.
