കഠിനമായ ചൂട്: ലോകത്ത് പ്രതിവർഷം 5.5 ലക്ഷം പേർ മരിക്കുന്നു; ഒരു രാജ്യവും സുരക്ഷിതമല്ലെന്ന് യുഎൻ

സിഡ്നി/ജനീവ: (KVARTHA) ചൂട് മൂലമുള്ള ആരോഗ്യ പ്രശ്നങ്ങളെ തുടർന്ന് ലോകത്ത് പ്രതിവർഷം 5.5 ലക്ഷം പേർ മരിക്കുന്നതായി പഠനം. 1990 മുതലുള്ള കണക്കുകൾ പരിശോധിക്കുമ്പോൾ ചൂടിനെ തുടർന്നുള്ള മരണനിരക്ക് 20 ശതമാനം വർദ്ധിച്ചുവെന്ന് കാലാവസ്ഥയും ആരോഗ്യവും സംബന്ധിച്ച ലാൻസെറ്റ് വാർഷിക റിപ്പോർട്ടിലാണ് ഈ ഞെട്ടിപ്പിക്കുന്ന വിവരമുള്ളത്.

ലോകത്ത് ഓരോ മിനിറ്റിലും ചൂടിനെ തുടർന്ന് ഒരാളെങ്കിലും മരിക്കുന്നുണ്ടെന്ന് സിഡ്‌നി യൂണിവേഴ്സിറ്റിയിലെ ആരോഗ്യ വിദഗ്ധൻ ഒല്ലി ജെ പറഞ്ഞു. ലോകത്താകെ ചൂടിനെ തുടർന്ന് ടൂറിസത്തിൽ അടക്കം മാറ്റം വന്നു. 

യൂറോപ്പിലെ ഉഷ്ണ തരംഗം റിപ്പോർട്ട് ചെയ്യാൻ തുടങ്ങി. ഏഷ്യയിലെ ചൂട് അസഹ്യമായി. 71 സംഘടനകളിൽ നിന്നായി 128 ഗവേഷകരാണ് ആഗോളതലത്തിൽ പഠനത്തിനായി പങ്കെടുത്തത്.

ചൂടിനെ തുടർന്ന് തൊഴിൽ നഷ്ടം മൂലം പ്രതിവർഷം ഒരു ലക്ഷം കോടി ഡോളറിന്റെ നഷ്ടം 2024-ൽ വിവിധ രാജ്യങ്ങൾക്കുണ്ടായി. രാത്രിയിലെ ഉറക്ക നഷ്ടവും 2024-ൽ 20 ശതമാനം വർദ്ധിച്ചു. ഒപ്പം മാനസിക പ്രശ്നങ്ങളും കൂടിയെന്നും, ചൂടും ആർദ്രതയുമുള്ള കാലാവസ്ഥയിൽ ആളുകൾക്ക് അതിജീവനം പ്രയാസകരമാകും എന്നും റിപ്പോർട്ടിൽ പറയുന്നുണ്ട്.

അതേസമയം, മാറി വരുന്ന കാലാവസ്ഥാ വ്യതിയാനം മൂലമുണ്ടാകുന്ന കെടുതികളിൽ നിന്ന് ലോകത്ത് ഒരു രാജ്യവും സുരക്ഷിതമല്ലെന്ന് ഐക്യരാഷ്ട്രസഭ സെക്രട്ടറി ജനറൽ അന്റോണിയോ ഗൂട്ടറസ് പറയുന്നു. 

ജീവനും സമ്പദ്‌വ്യവസ്ഥയ്ക്കും സംരക്ഷണം നൽകാൻ അതിവേഗ മുന്നറിയിപ്പ് സംവിധാനങ്ങൾ വിപുലീകരിക്കണമെന്ന് ലോക കാലാവസ്ഥാ സംഘടനയുടെ (ഡബ്ലിയുഎംഒ) ഉന്നതതല യോഗത്തിൽ അദ്ദേഹം ആവശ്യപ്പെട്ടു.

'നിങ്ങളുടെ ദീർഘകാല നിരീക്ഷണങ്ങളില്ലെങ്കിൽ ഓരോ വർഷവും ദശലക്ഷക്കണക്കിന് ജീവനുകളും ശതകോടിക്കണക്കിന് ഡോളറും സംരക്ഷിക്കുന്ന മുന്നറിയിപ്പുകളും മാർഗ്ഗനിർദ്ദേശങ്ങളും ഞങ്ങൾക്ക് ലഭിക്കില്ല,' ഗൂട്ടറസ് ചൂണ്ടിക്കാട്ടി. 

ഭാവിയിൽ അപകടസാധ്യതകൾ ലഘൂകരിക്കുന്നതിനായി പുനരുപയോഗ ഊർജ്ജം സ്വീകരിക്കുന്നത് ഉൾപ്പെടെയുള്ള പുതിയ ദേശീയ കാലാവസ്ഥാ കർമ്മ പദ്ധതികൾ രാജ്യങ്ങൾ നടപ്പിലാക്കണമെന്നും അദ്ദേഹം ആവശ്യപ്പെട്ടു.

കഴിഞ്ഞ 50 വർഷത്തിനിടെ കാലാവസ്ഥ, ജലം, മറ്റ് അനുബന്ധ ദുരന്തങ്ങൾ എന്നിവ 20 ലക്ഷത്തിലധികം ആളുകളുടെ ജീവൻ കവർന്നു. ഈ മരണങ്ങളിൽ 90 ശതമാനവും സംഭവിച്ചത് വികസ്വര രാജ്യങ്ങളിലാണ്. തീവ്ര കാലാവസ്ഥാ ദുരന്തങ്ങൾ പതിവായി മാറുന്നതിനാൽ സാമ്പത്തിക നഷ്ടവും വർദ്ധിക്കുകയാണ്.

ദുരന്ത മുന്നറിയിപ്പ് സംവിധാനങ്ങൾ പരിമിതമായ രാജ്യങ്ങളിൽ ദുരന്തമരണനിരക്ക് ആറ് മടങ്ങും ബാധിക്കപ്പെടുന്ന ആളുകളുടെ എണ്ണം നാല് മടങ്ങും കൂടുതലാണെന്ന് കണക്കുകൾ സൂചിപ്പിക്കുന്നു. 

ലോകത്തെ എല്ലാ സർക്കാരുകളും അവരുടെ നയങ്ങളിലും ബജറ്റുകളിലും നേരത്തെയുള്ള മുന്നറിയിപ്പ് സംവിധാനങ്ങൾ ഉൾപ്പെടുത്തണമെന്ന് ഡബ്ലിയുഎംഒ ആവശ്യപ്പെടുന്നുമുണ്ട്.

ഈ വാർത്തയെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക. വാർത്ത പങ്കുവെക്കുക. 

Article Summary: Extreme heat kills 550,000 people annually; UN calls for better early warning systems.

#ExtremeHeat #ClimateChange #EarlyWarningSystems #UN #LancetReport #GlobalWarming