ഈരാറ്റുപേട്ടയിലും പൂഞ്ഞാറിലും കനത്ത മഴ; പി സി ജോർജിന്റെ വീട്ടിലും ഭാര്യയുടെ കടയിലുമായി 40 ലക്ഷത്തിന്റെ നഷ്ടം

ഈരാറ്റുപേട്ട: (KVARTHA) കോട്ടയം ഈരാറ്റുപേട്ടയിലും പൂഞ്ഞാറിലും കനത്ത മഴയിൽ വ്യാപക നാശനഷ്ടം. മഴ ശക്തമായതോടെ വീടുകളിലും റോഡുകളിലും കടകളിലുമെല്ലാം വെള്ളം കയറി. കനത്ത മഴയിൽ ബിജെപി ദേശീയ നിർവാഹകസമിതി അംഗം പി സി ജോർജിൻ്റെ പൂഞ്ഞാറിലെ വീട്ടിലും വെള്ളം കയറി വലിയ നാശനഷ്ടങ്ങളുണ്ടായി. വീട്ടിലും ഭാര്യയുടെ കടയിലുമായി ഏതാണ്ട് 40 ലക്ഷം രൂപയുടെ നഷ്ടമുണ്ടായെന്ന് അദ്ദേഹം വ്യക്തമാക്കി.

'40 കൊല്ലമായി ഞാൻ ഇവിടെ താമസിക്കാൻ തുടങ്ങിയിട്ട്. ഇന്നുവരെ ഇതുപോലൊരു അവസ്ഥ ഉണ്ടായിട്ടില്ല. ഇത്രയും വെള്ളം കയറുന്നത് ആദ്യമായിട്ടാണ്' എന്ന് പി സി ജോർജ് പറഞ്ഞു. കാലാവസ്ഥാ വ്യതിയാനത്തെ തുടർന്ന് മുൻകാലങ്ങളിൽ വെള്ളം കയറാത്ത പ്രദേശങ്ങളിൽ പോലും വലിയ വെള്ളപ്പൊക്കമുണ്ടാകുന്ന സാഹചര്യമാണ് നിലവിലുള്ളത്.

പുലർച്ചെ വീടിനകത്ത് വെള്ളം കയറി

ഓഗസ്റ്റ് 1 ശനിയാഴ്ച പുലർച്ചെ 2 മണിക്കാണ് തൊട്ടടുത്ത് താമസിക്കുന്ന ബാങ്ക് ഉദ്യോഗസ്ഥൻ വീട്ടിലെത്തി വാതിലിൽ മുട്ടിയത്. അപ്പോഴാണ് വെള്ളം കയറുന്നുണ്ടെന്ന് അറിഞ്ഞത്. ഏതാണ്ട് 2.30 ആയതോടെ വീടിനകത്തേയ്ക്കും വെള്ളം കയറി. 

വീടിനകത്ത് 3.5 അടി വെള്ളം കയറിയതായി പി സി ജോർജ് പറഞ്ഞു. അദ്ദേഹത്തിനും ഭാര്യ ഉഷയ്ക്കുമൊപ്പം രണ്ടാമത്തെ മകൻ ഷെയ്നുമാണ് അപ്പോൾ വീട്ടിലുണ്ടായിരുന്നത്. പെട്ടെന്ന് തന്നെ ഇവർ വീടിൻ്റെ മുകളിലത്തെ നിലയിലേക്ക് മാറുകയായിരുന്നു.

വെള്ളം കയറി വീട്ടിലെ ഉപകരണങ്ങൾ പലതും നശിച്ചു. പാത്രങ്ങൾ, 2 ഫ്രിഡ്ജുകൾ, ടിവി തുടങ്ങി നശിക്കാത്തതൊന്നുമില്ല. വീട്ടിൽ മാത്രം ഏതാണ്ട് 10 ലക്ഷം രൂപയുടെ നഷ്ടമുണ്ടായിട്ടുണ്ട്. ഇതിനുപുറമെ 2 ഇന്നോവ കാറുകളിലും വെള്ളം കയറി.

കടയിൽ ലക്ഷങ്ങളുടെ നാശനഷ്ടം

പൂഞ്ഞാറിൽ ഭാര്യ ഉഷ നടത്തുന്ന സ്ഥാപനത്തിലും വെള്ളം കയറി വലിയ നാശനഷ്ടമുണ്ടായി. കടയിലുണ്ടായിരുന്ന വിലകൂടിയ സാരികൾ ഉൾപ്പെടെ എല്ലാം നശിച്ചുപോയി. അവിടെ ഏതാണ്ട് 30 ലക്ഷം രൂപയുടെ നഷ്ടമുണ്ടെന്നാണ് നിഗമനം. മൊത്തം 40 ലക്ഷം രൂപയുടെ നഷ്ടമുണ്ടായെങ്കിലും ഇതിലും വലിയ നഷ്ടങ്ങൾ സംഭവിച്ചവരുണ്ടെന്നും അതിനിടയിൽ തൻ്റെ പ്രശ്നം പറയുന്നതിൽ ന്യായമില്ലെന്നും അദ്ദേഹം പറഞ്ഞു.

പൂഞ്ഞാർ മേഖലയിൽ 213 മില്ലീമീറ്റർ വരെ മഴയാണ് ലഭിച്ചത്. അർധരാത്രിയോടെയാണ് ഈരാറ്റുപേട്ട ഭാഗത്ത് വെള്ളം ഉയർന്നു തുടങ്ങിയത്. ഓഗസ്റ്റ് 1 ശനിയാഴ്ച പുലർച്ചെ 3 മണിയോടെ പാലാ വരെയുള്ള റോഡിൻ്റെ പല ഭാഗങ്ങളും പൂർണമായും വെള്ളത്തിനടിയിലായി. മഴ ശക്തമായി തുടരുന്നതിനാൽ മലയോര മേഖലകളിലേക്കും വെള്ളപ്പൊക്ക സാധ്യതാ പ്രദേശങ്ങളിലേക്കുമുള്ള യാത്രകൾക്ക് കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങൾളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Heavy rain floods PC George's house in Poonjar causing Rs 40 lakh loss.

#Erattupetta #Poonjar #PCGeorge #KeralaRain #FloodAlert #KottayamNews #AmmuNews