കനത്ത മഴയിലും കാറ്റിലും ചിറക്കൽ ചാമുണ്ഡി കോട്ടത്തെ പൈതൃക മണ്ഡപം തകർന്നു വീണു

കണ്ണൂർ: (KVARTHA) കനത്ത മഴയിലും കാറ്റിലും ചിറക്കൽ ചാമുണ്ഡി കോട്ടത്തിൻ്റെ ഭാഗമായുള്ള പൈതൃക മണ്ഡപം തകർന്നു വീണു. ജൂൺ ആറിന് (ശനിയാഴ്ച) രാവിലെ പതിനൊന്നരയോടെയാണ് ഒരു മാസം മുൻപ് മാത്രം നിർമാണം പൂർത്തിയാക്കിയ പൈതൃക മണ്ഡപം നിലംപൊത്തിയത്. ശക്തമായ മഴയും കാറ്റുമാണ് മണ്ഡപം തകരാൻ ഇടയായതെന്ന് ക്ഷേത്ര സംരക്ഷണ സമിതി പ്രസിഡൻ്റ് സുരേഷ് വർമ അറിയിച്ചു.

വൻ ദുരന്തം ഒഴിവായി

ക്ഷേത്ര കമ്മിറ്റി 25 ലക്ഷം രൂപ ചെലവഴിച്ചാണ് മണ്ഡപം നിർമിച്ചത്. അപകടസമയത്ത് പരിസര പ്രദേശത്ത് ആരുമില്ലാത്തത് വൻ ദുരന്തമാണ് ഒഴിവാക്കിയത്. മേൽക്കൂര ഉൾപ്പെടെ മണ്ഡപം വലിയ ഉഗ്രശബ്ദത്തോടെയാണ് തകർന്നു വീണതെന്ന് പ്രദേശവാസികൾ പറഞ്ഞു.

പ്രസിദ്ധമായ ചിറക്കൽ ക്ഷേത്ര നഗരി

ചിറക്കൽ ചിറയുടെ തീരത്താണ് ഈ പൈതൃക മണ്ഡപം സ്ഥിതി ചെയ്യുന്നത്. കണ്ണൂരിലെ പ്രധാന ക്ഷേത്ര നഗരങ്ങളിലൊന്നാണ് ചിറക്കൽ. ചിറക്കൽ രാജവംശത്തിൻ്റെ കൊട്ടാരം, ചെറുശ്ശേരി കൃഷ്ണഗാഥ എഴുതിയ ശ്രീകൃഷ്ണ ക്ഷേത്രം, ഏഷ്യയിലെ ഏറ്റവും വലിയ മനുഷ്യനിർമിത ജലാശയങ്ങളിലൊന്നായ ചിറക്കൽ ചിറ, ഫോക് ലോർ അക്കാദമി, ചാമുണ്ഡി കോട്ടം ക്ഷേത്രം തുടങ്ങിയവ ഈ പരിസരങ്ങളിലാണ് സ്ഥിതി ചെയ്യുന്നത്. ചിറക്കൽ ചിറയുടെ നവീകരണം നടന്നതോടെ നൂറുകണക്കിന് വിനോദസഞ്ചാരികളാണ് ദിവസവും ഈ ക്ഷേത്ര നഗരിയിലെത്തിച്ചേരുന്നത്.

ചരിത്രപ്രസിദ്ധമായ ഈ പൈതൃക കേന്ദ്രത്തിലെ നാശനഷ്ടങ്ങൾ സംബന്ധിച്ച വാർത്ത സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: A newly constructed heritage pavilion at Chirakkal Chamundi Kottam, built at a cost of 25 lakhs, collapsed on Saturday morning due to heavy rain and wind, though no injuries occurred as the area was deserted.

#Chirakkal #Kannur #HeritageSite #RainDamage #ChirakkalChira #MalayalamNews #KeralaNews