App | ആശങ്കവേണ്ട! സ്കൂൾ ബസ് എവിടെയെന്ന് സർക്കാരിന്റെ വിദ്യാവാഹൻ ആപ്പിലറിയാം; ഇങ്ങനെ ഉപയോഗിക്കാം
തിരുവനന്തപുരം: (KVARTHA) സ്കൂൾ ബസ് കുട്ടികൾക്ക് ദൈനംദിന ജീവിതത്തിന്റെ ഒരു പ്രധാന ഭാഗമാണ്. എന്നാൽ, അപകടങ്ങൾ സംഭവിക്കാൻ സാധ്യതയുള്ള സാഹചര്യങ്ങളുമാണ് ഇവ. അതിനാൽ, ഓരോ സ്കൂൾ ബസ് യാത്രയും സുരക്ഷിതവും സുഖകരവുമാണെന്ന് ഉറപ്പാക്കാൻ അധികൃതർ സംവിധാനങ്ങൾ ഒരുക്കുന്നുണ്ട്. സംസ്ഥാനത്ത് സ്കൂൾ വാഹനത്തിൽ പോകുന്ന കുട്ടികൾ സുരക്ഷിതമായി തിരിച്ചെത്തുമെന്ന് ഉറപ്പാക്കാൻ ഗതാഗത വകുപ്പും (MVD) രംഗത്തുണ്ട്.
സ്കൂൾ ബസ് വിദ്യാവാഹൻ ആപ്പിലറിയാം
സ്കൂൾ ബസുകളിൽ ഓൺലൈൻ ട്രാകിംഗ് സംവിധാനം നടപ്പാക്കുന്നതിനായി 'വിദ്യാവാഹൻ' എന്ന ആപ്പ് എംവിഡി വികസിപ്പിച്ചെടുത്തിട്ടുണ്ട്. ഈ ആപ്പ് ഉപയോഗിച്ച് രക്ഷിതാക്കൾക്ക് കുട്ടികൾ യാത്ര ചെയ്യുന്ന സ്കൂൾ ബസിന്റെ തത്സമയ സ്ഥാനം ട്രാക്ക് ചെയ്യാൻ സാധിക്കും. കഴിഞ്ഞ വർഷം തുടക്കമിട്ടിരുന്നെങ്കിലും പൂർത്തിയായിരുന്നില്ല. ഇത്തവണ സ്കൂൾ വാഹനങ്ങൾ രജിസ്റ്റർ ചെയ്യിക്കുന്ന നടപടികൾ പൂർത്തിയായിട്ടുണ്ട്.
പദ്ധതിയുടെ പ്രധാന സവിശേഷതകൾ
ഓരോ സ്കൂൾ ബസിനും ഒരു ജിപിഎസ് ഉപകരണം ഘടിപ്പിക്കും, അത് ബസിന്റെ തത്സമയ സ്ഥാനം വിദ്യാവാഹൻ ആപ്പിൽ കാണിക്കും. ബസ് അപകടത്തിലായാൽ അല്ലെങ്കിൽ നിശ്ചിത പാതയിൽ നിന്ന് വ്യതിചലിക്കുകയാണെങ്കിൽ രക്ഷിതാക്കൾക്ക് സുരക്ഷാ വിവരങ്ങൾ ലഭിക്കും. ബസിന്റെ യാത്രാ സമയക്രമം, സ്റ്റോപ്പുകൾ, ഡ്രൈവറുടെ വിശദാംശങ്ങൾ തുടങ്ങിയ വിവരങ്ങൾ രക്ഷിതാക്കൾക്ക് ലഭ്യമാകും.
എങ്ങനെ ഉപയോഗിക്കാം?
* പ്ലേ സ്റ്റോറിൽ നിന്ന് വിദ്യാവാഹൻ ആപ്പ് സൗജന്യമായി ഡൗൺലോഡ് ചെയ്യാം.
* വിദ്യാലയ അധികൃതരാണ് മൊബൈൽ നമ്പർ ആപിൽ രജിസ്റ്റർ ചെയ്ത് തരേണ്ടത്. സ്‌കൂളിൽ നൽകിയ രക്ഷാകർത്താക്കളുടെ മൊബൈൽ നമ്പർ ഉപയോഗിച്ച് ഒടിപി നമ്പർ നൽകി ലോഗിൻ ചെയ്യുക.
* ഹോം പേജിൽ രക്ഷാകർത്താവിന്റെ ഫോൺ നമ്പർ രജിസ്റ്റർ ചെയ്ത് സ്കൂൾ വാഹനങ്ങളുടെ ലിസ്റ്റ് കാണാവുന്നതാണ്.
* വാഹനത്തിന്റെ പേരിന് നേരെയുള്ള ലൊക്കേറ്റ് ബട്ടണിൽ ക്ലിക്ക് ചെയ്യുക. വാഹനം മാപ്പിലൂടെ ട്രാക്ക് ചെയ്യാനാവും.
ഒരു രക്ഷാകർത്താവിന്റെ മൊബൈൽ നമ്പർ ഒന്നിലധികം വാഹനവുമായി രജിസ്റ്റർ ചെയ്യാൻ വിദ്യാലയ അധികൃതർക്ക് സാധിക്കും. ആപിലൂടെ തന്നെ വാഹനത്തിനുള്ളിലെ ഡ്രൈവർ, സഹായി, സ്കൂൾ അധികാരി എന്നിവരെ ഫോണിൽ വിളിക്കാം. വാഹനം ഓടിക്കൊണ്ടിരിക്കുകയാണെങ്കിൽ ഡ്രൈവറെ വിളിക്കാനാവില്ല. ആപ് സംബന്ധമായ സംശയങ്ങൾക്ക് 1800 599 7099 എന്ന ടോൾ ഫ്രീ നമ്പറിൽ വിളിക്കാവുന്നതാണ്.
