ശുഐബ് വധക്കേസില്‍ സിബിഐ അന്വേഷണം ആവശ്യപ്പെട്ട് നിയമസഭയില്‍ ഭരണ- പ്രതിപക്ഷ ബഹളം; രണ്ടാം ദിവസവും സഭ മുടങ്ങി

തിരുവനന്തപുരം: (www.kvartha.com 27.02.2018) ശുഐബ് വധക്കേസില്‍ സിബിഐ അന്വേഷണം ആവശ്യപ്പെട്ട് ചൊവ്വാഴ്ചയും നിയമസഭയില്‍ പ്രതിപക്ഷ ബഹളം. ഭരണ- പ്രതിപക്ഷ അംഗങ്ങള്‍ തമ്മില്‍ വാക്കേറ്റമുണ്ടായി. ഇതേത്തുടര്‍ന്നു നിയമസഭ പിരിഞ്ഞു. കഴിഞ്ഞദിവസവും സഭ ഇതേ വിഷയത്തെ ചൊല്ലി നേരത്തേ പിരിഞ്ഞിരുന്നു. രാവിലെ ചോദ്യോത്തര വേളയുടെ സമയത്തു പ്രതിപക്ഷ പ്രതിഷേധം ഉണ്ടായി. അംഗങ്ങള്‍ നടുത്തളത്തിലിറങ്ങി പ്രതിഷേധിച്ചു.

രാവിലെ സ്പീക്കര്‍ പി.ശ്രീരാമകൃഷ്ണന്‍ ഡയസിലെത്തിയ ഉടനെ പ്ലക്കാര്‍ഡുകളും ബാനറുകളുമായി പ്രതിപക്ഷ എംഎല്‍എമാര്‍ നടുത്തളത്തില്‍ ഇറങ്ങുകയായിരുന്നു. പ്രതിപക്ഷ ബഹളത്തെത്തുടര്‍ന്നു ചോദ്യോത്തരവേള നിര്‍ത്തിവച്ചു. പിന്നീടു റദ്ദാക്കി. സ്പീക്കറുടെ ചേംബറിനു മുന്നില്‍ പ്രതിപക്ഷം ബാനര്‍ നിവര്‍ത്തി. സഭയുടെ അന്തസ് മാനിക്കണമെന്നും ചെയറിന്റെ മുഖം മറച്ചുള്ള പ്രതിഷേധം അനുവദിക്കില്ലെന്നും സ്പീക്കര്‍ പറഞ്ഞെങ്കിലും കാര്യമുണ്ടായില്ല.


ജനാധിപത്യത്തെ മാനിക്കുന്നുണ്ടെങ്കില്‍ സഭാ നടപടികള്‍ തടസപ്പെടുത്തരുതെന്ന് പ്രതിപക്ഷ നേതാവിനോട് പലതവണ സ്പീക്കര്‍ ആവശ്യപ്പെട്ടു. ബഹളം നടക്കുമ്പോള്‍ പ്രതിപക്ഷ നേതാവ് മിണ്ടാതിരിക്കുന്നത് ശരിയല്ലെന്നും സ്പീക്കര്‍ ചൂണ്ടിക്കാട്ടി. തുടര്‍ന്ന് ചോദ്യോത്തരവേള താത്കാലികമായി നിറുത്തി വച്ചു. പ്രതിപക്ഷം മര്യാദ കാട്ടണമെന്നു സ്പീക്കര്‍ ആവശ്യപ്പെട്ടെങ്കിലും പ്രതിപക്ഷാംഗങ്ങള്‍ നടുത്തളത്തില്‍ കുത്തിയിരുന്നു പ്രതിഷേധിച്ചു.