Sachin Tendulkar | അച്ഛന് അന്ന് നല്‍കിയ ഉപദേശം ഇന്നും പാലിക്കുന്നു; ഒരിക്കലും പുകയില ഉപയോഗിക്കരുതെന്ന് സചിന്‍ ടെന്‍ഡുല്‍കര്‍
നല്ല ഭാവിക്ക് നമുക്ക് നല്ലത് പുകയിലയേക്കാള്‍ ആരോഗ്യം തിരഞ്ഞെടുക്കുന്നത്
ഒരിക്കലും പുകയിലയെ പ്രോത്സാഹിപ്പിക്കരുത്
മുംബൈ: (KVARTHA) ലോക പുകയില വിരുദ്ധ ദിനത്തില്‍ പുകയില ഉപയോഗത്തിനെതിരായ ബോധവത്കരണവുമായി ക്രികറ്റ് ഇതിഹാസം സചിന്‍ ടെന്‍ഡുല്‍കര്‍. എക്‌സില്‍ പങ്കുവച്ച കുറിപ്പിലൂടെയാണ് സചിന്‍ പുകയില ഉപയോഗത്തിനെതിരെ ബോധവത്കരണം നടത്തിയത്.
'എന്റെ അന്താരാഷ്ട്ര കരിയറിന്റെ തുടക്കത്തില്‍ അച്ഛന് എനിക്ക് ലളിതമായ, എന്നാല്‍ അത്രയും പ്രധാനപ്പെട്ട ഒരു ഉപദേശം തന്നു. ഒരിക്കലും പുകയിലയെ പ്രോത്സാഹിപ്പിക്കരുത്. ഇത്ര കാലവും ഞാന്‍ ആ ഉപദേശം അടിസ്ഥാനമാക്കി ജീവിച്ചു. നിങ്ങള്‍ക്കും അത് സാധിക്കും. നല്ല ഭാവിക്ക് നമുക്ക് നല്ലത് പുകയിലയേക്കാള്‍ ആരോഗ്യം തിരഞ്ഞെടുക്കുന്നതാണ്'- എന്ന് സചിന്‍ എക്‌സില്‍ കുറിച്ചു.
At the start of my international career, my father gave me a simple yet important piece of advice: never promote tobacco. I have lived by it, and so can you. Let us choose health over tobacco for a better future.#WorldNoTobaccoDay
— Sachin Tendulkar (@sachin_rt) May 31, 2024
പുകയിലയുമായി ബന്ധപ്പെട്ട പരസ്യങ്ങളില്‍ അഭിനയിക്കാന്‍ തനിക്ക് മുന്‍പ് ഓഫര്‍ ലഭിച്ചിരുന്നതായി സചിന്‍ അടുത്ത കാലത്ത് വെളിപ്പെടുത്തിയിരുന്നു. എന്നാല്‍ അവരോടെല്ലാം താന്‍ നോ പറഞ്ഞതായും സചിന്‍ പറഞ്ഞിരുന്നു.
കളിക്കുന്ന കാലത്ത് തന്റെ കൂടെ കളിച്ച പലരും സിഗരറ്റ് കംപനിയുടെ സ്റ്റികര്‍ ബാറ്റില്‍ പതിച്ചാണ് കളിച്ചിരുന്നത്. എന്നാല്‍ തന്റെ ബാറ്റില്‍ പരസ്യമെന്ന നിലയില്‍ പോലും അത്തരം കംപനികളുടെ സ്റ്റികര്‍ ഒട്ടിക്കാന്‍ തയാറായില്ല. അച്ഛന് നല്‍കിയ വാക്കാണ് തനിക്ക് പ്രധാനമെന്നും സചിന്‍ പറഞ്ഞിരുന്നു.
