വനിതാ പ്രീമിയർ ലീഗ് ലേലം: ദീപ്തി ശർമക്ക് റെക്കോർഡ് തുക; മലയാളി താരം ആശ ശോഭന കോടിപതി, സജന സജീവനെ മുംബൈ നിലനിർത്തി

ന്യൂഡൽഹി: (KVARTHA) വനിതാ പ്രീമിയർ ലീഗ് (WPL) ട്വൻ്റി20 ക്രിക്കറ്റ് ടൂർണമെൻ്റിനായുള്ള താരലേലത്തിൽ ഇന്ത്യൻ ഓൾറൗണ്ടർ ദീപ്തി ശർമ ഏറ്റവും വിലകൂടിയ താരമായി. വ്യാഴാഴ്ച ന്യൂഡൽഹിയിൽ നടന്ന മെഗാ ലേലത്തിൽ 3.20 കോടി രൂപ മുടക്കി യുപി വാരിയേഴ്സ് താരത്തെ തിരിച്ചു പിടിക്കുകയായിരുന്നു. കഴിഞ്ഞ സീസണിൽ 2.60 കോടി രൂപയായിരുന്നു ദീപ്തിക്ക് യുപി വാരിയഴ്സ് നൽകിയിരുന്നത്. ഇതോടെ ഡബ്ല്യു.പി.എൽ. ചരിത്രത്തിലെ ഏറ്റവും വിലകൂടിയ രണ്ടാമത്തെ താരം എന്ന റെക്കോർഡ് ദീപ്തി ശർമയ്ക്ക് സ്വന്തമായി. 2023-ൽ 3.40 കോടിക്ക് ആർസിബി സ്വന്തമാക്കിയ സ്മൃതി മന്ദാനയാണ് ഐ.പി.എൽ. ചരിത്രത്തിലെ ഏറ്റവും വില കൂടിയ താരം.

ലേലത്തിന് മുന്നോടിയായി ദീപ്തിയെ യുപി ഒഴിവാക്കിയിരുന്നു. എന്നാൽ ലേലത്തിൽ 50 ലക്ഷം അടിസ്ഥാന വിലയ്ക്ക് ഡൽഹി വിളിച്ചെടുത്തതോടെ ആർടിഎം (Right To Match Card) സംവിധാനത്തിലൂടെയാണ് യുപി 3.20 കോടി രൂപയ്ക്ക് താരത്തെ തിരികെയെത്തിച്ചത്. രണ്ട് വ്യത്യസ്‌ത ഡബ്ല്യുപിഎൽ ലേലങ്ങളിൽ 2.5 കോടി രൂപയിൽ കൂടുതൽ വിലയ്ക്ക് വിറ്റുപോയ ആദ്യ വനിതാ ക്രിക്കറ്റ് താരമായി ദീപ്തി ശർമ ഇതോടെ മാറി. 

കോടിത്തിളക്കത്തിൽ മലയാളി താരങ്ങൾ

മലയാളി താരങ്ങളായ ആശ ശോഭനയും സജന സജീവനുമാണ് ലേലത്തിൽ മിന്നും നേട്ടം സ്വന്തമാക്കിയത്. തിരുവനന്തപുരം സ്വദേശിയായ ഓൾറൗണ്ടർ ആശ ശോഭനയെ 1.10 കോടി രൂപയ്ക്ക് യുപി വാരിയേഴ്സാണ് ടീമിലെത്തിച്ചത്. 30 ലക്ഷം രൂപ അടിസ്ഥാന വിലയുണ്ടായിരുന്ന ലെഗ് സ്പിന്നറായ ആശയ്ക്കായി ഡൽഹി ക്യാപിറ്റൽസും ആർസിബിയും ശക്തമായ വെല്ലുവിളി ഉയർത്തിയെങ്കിലും ഒടുവിൽ യുപി സ്വന്തമാക്കുകയായിരുന്നു. 2023-ൽ ആർസിബിക്ക് വേണ്ടി പത്ത് ലക്ഷം രൂപയ്ക്ക് കരാറിൽ ഒപ്പുവെച്ച താരമാണ് രണ്ട് സീസണിനിപ്പുറം കോടികൾ മൂല്യമുള്ള താരമായി ഉയർന്നത്.

വയനാട് സ്വദേശിയായ ഓൾറൗണ്ടർ സജന സജീവനെ 75 ലക്ഷം രൂപക്ക് മുംബൈ ഇന്ത്യൻസാണ് വീണ്ടും തങ്ങളുടെ നിരയിലെത്തിച്ചത്. 30 ലക്ഷമായിരുന്നു സജനയുടെ അടിസ്ഥാന വില. കഴിഞ്ഞ രണ്ട് സീസണിലും മുംബൈക്കായി കളിച്ച സജനയെ മുംബൈക്ക് നിലനിർത്താനായി. കൂടാതെ, മലയാളി താരം മിന്നുമണി ആദ്യ റൗണ്ടിൽ അൺസോൾഡ് ആയെങ്കിലും അവസാന റൗണ്ടിൽ 40 ലക്ഷം രൂപക്ക് ഡൽഹി ക്യാപിറ്റൽസിലെത്തി. മറ്റ് മലയാളി താരങ്ങളായ വിജെ ജോഷിത, നജ്ല നൗഷാദ്, പണവി ചന്ദ്രൻ, സലോനി എന്നിവരെ ആരും ടീമിലെടുത്തില്ല.

വിദേശ താരങ്ങളിൽ മുന്നിൽ അമേലിയ കെറിൻ

മാർക്വീ താരങ്ങളിൽ ന്യൂസീലൻഡ് താരം അമേലിയ കെറിനാണ് ദീപ്തിക്ക് ശേഷം ഏറ്റവും കൂടുതൽ തുക ലഭിച്ചത്. മൂന്ന് കോടി രൂപയ്ക്ക് മുംബൈ ഇന്ത്യൻസാണ് താരത്തെ ടീമിലെത്തിച്ചത്. മറ്റൊരു ന്യൂസിലൻഡ് താരം സോഫി ഡിവൈനെ രണ്ട് കോടിക്ക് ഗുജറാത്ത് ജയൻ്റ്സും, ഓസീസ് താരം മെഗ് ലാനിങ്ങിനെ 1.9 കോടിക്ക് യുപി വാരിയേഴ്‌സും സ്വന്തമാക്കി. ദക്ഷിണാഫ്രിക്കൻ ക്യാപ്റ്റൻ ലോറ വോൾവാർട്ടിനെ 1.1 കോടി രൂപയ്ക്കും വെസ്റ്റ് ഇൻഡീസ് ഓൾറൗണ്ടർ ചിനെല്ലെ ഹെൻറിയെ 1.3 കോടി രൂപയ്ക്കും ഡൽഹി സ്വന്തമാക്കി.

ഇന്ത്യൻ താരങ്ങളിൽ ശിഖ പാണ്ഡെയെ വൻ തുകയ്ക്ക് (2.4 കോടി രൂപ) യുപി മുടക്കിയപ്പോൾ, ലോകകപ്പിൽ തിളങ്ങിയ ഇടം കൈയൻ സ്പിന്നർ ശ്രീ ചരണിയെ ഡൽഹി ക്യാപിറ്റൽസ് 1.3 കോടിക്ക് സ്വന്തമാക്കി. ഇന്ത്യൻ പേസർ ക്രാന്തി ഗൗഡിനെ 50 ലക്ഷം രൂപക്ക് യുപി വാരിയേഴ്സ് ടീമിലെത്തിച്ചു. പ്രതിക റാവലിനെ മൂന്നാം തവണ ലേലത്തിന് എത്തിയപ്പോൾ 50 ലക്ഷത്തിന് യുപി വോറിയേഴ്സ‌് സ്വന്തമാക്കിയെങ്കിലും, ഓസ്ട്രേലിയൻ ക്യാപ്റ്റനും വിക്കറ്റ് കീപ്പറുമായ അലീസ ഹീലിയും ലോകകപ്പ് ടീമിൽ കളിച്ച ഉമ ഛേത്രിയും ഉൾപ്പെടെയുള്ള പ്രമുഖർ അൺസോൾഡ് ആയത് ഏവരെയും ഞെട്ടിച്ചു. ലേലത്തിൽ 277 താരങ്ങൾ എത്തിയപ്പോൾ 67 താരങ്ങളെയാണ് അഞ്ച് ഫ്രാഞ്ചൈസികൾ ചേർന്ന് സ്വന്തമാക്കിയത്; ഇതിൽ 23 പേർ വിദേശ താരങ്ങളാണ്.

ഡബ്ല്യു.പി.എൽ. മത്സര തീയതികൾ

അടുത്ത വർഷത്തെ വനിതാ പ്രീമിയർ ലീഗിൻ്റെ നാലാം പതിപ്പ് 2026 ജനുവരി 9 മുതൽ ഫെബ്രുവരി 5 വരെ നടക്കുമെന്ന് ബിസിസിഐ പ്രഖ്യാപിച്ചു. രാജ്യത്തെ രണ്ട് വേദികളിലായാണ് മത്സരങ്ങൾ അരങ്ങേറുക. ടൂർണമെൻ്റിൻ്റെ ആദ്യ പകുതി നവി മുംബൈയിലും ഫെബ്രുവരി 5-ന് നടക്കുന്ന ഫൈനൽ ഉൾപ്പെടെയുള്ള രണ്ടാം പകുതി വഡോദരയിലുമാണ് നടക്കുക. വനിതാ പ്രീമിയർ ലീഗ് ചെയർമാനുമായ ജയേഷ് ജോർജാണ് തീയതികൾ പ്രഖ്യാപിച്ചത്.

അടുത്ത സീസണിൽ കപ്പ് നേടാൻ സാധ്യതയുള്ള ടീം ഏതാണ്? നിങ്ങളുടെ അഭിപ്രായം അറിയിക്കുക.

Article Summary: Deepti Sharma fetched ₹3.2 Cr; Malayali players Asha Sobhana and Sajana shine in WPL auction.

#WPLAuction #DeeptiSharma #AshaSobhana #SajanaSajeewan #WPL2026 #CricketNews