വളപട്ടണം അഖിലേന്ത്യ സെവൻസ് ഫുട്ബോൾ ടൂർണമെന്റ് ജനുവരി 15 മുതൽ; സ്വർണ്ണക്കപ്പിനായി 24 ടീമുകൾ മാറ്റുരയ്ക്കും

കണ്ണൂർ: (KVARTHA) അരനൂറ്റാണ്ടിലേറെയായി ഫുട്ബോൾ ആവേശമായി നെഞ്ചിലേറ്റുന്ന വളപട്ടണം ടൗൺ സ്പോർട്സ് ക്ലബ്ബ് സംഘടിപ്പിക്കുന്ന 31-ാമത് അഖിലേന്ത്യ സെവൻസ് ഫുട്ബോൾ ടൂർണമെന്റ് ജനുവരി 15 വ്യാഴാഴ്ച മുതൽ ആരംഭിക്കും. എ കെ കുഞ്ഞിമായൻ ഹാജി സ്മാരക സ്വർണ്ണക്കപ്പിനും ആർ എ ജി ഫോൾഡിങ് നൽകുന്ന ഒരു ലക്ഷം രൂപ പ്രൈസ് മണിക്കുമായി നടക്കുന്ന മത്സരങ്ങൾ വളപട്ടണം സി എൻ കുഞ്ഞഹമ്മദ് ഹാജി സ്മാരക പഞ്ചായത്ത് ഫ്ലഡ്‌ലൈറ്റ് മിനി സ്റ്റേഡിയത്തിലാണ് നടക്കുന്നത്.

കേരളത്തിലെ ഏറ്റവും പഴക്കം ചെന്ന സെവൻസ് ഫുട്ബോൾ ടൂർണമെന്റുകളിൽ ഒന്നായ വളപട്ടണം ഫുട്ബോൾ ഒരു വർഷത്തെ ഇടവേളയ്ക്ക് ശേഷമാണ് ജനുവരിയിൽ പുനരാരംഭിക്കുന്നത്. 

കേരളത്തിലെ പ്രമുഖ സെവൻസ് ടീമുകൾക്ക് പുറമെ എഫ് സി ഗോവ, വില്ല ബോയ്സ് കർണാടക എന്നീ ഇതര സംസ്ഥാന ടീമുകളും ഇത്തവണ മാറ്റുരയ്ക്കും. 15 ന് നടക്കുന്ന ഉദ്ഘാടന മത്സരത്തിൽ 92, 94 വർഷങ്ങളിൽ സ്വർണ്ണക്കപ്പ് നേടിയ കോഴിക്കോട് പള്ളിപറമ്പ് മാസ് കേറ്ററിങ് ജിംഖാനയും 2015 ലെ ജേതാക്കളായ ഷൂട്ടേഴ്സ് പടന്നയും തമ്മിൽ ഏറ്റുമുട്ടും.

ആകെ 24 ടീമുകളാണ് ടൂർണമെന്റിൽ പങ്കെടുക്കുന്നത്. സൂപ്പർ സ്റ്റുഡിയോ മലപ്പുറം, ലിൻഷ മണ്ണാർക്കാട്, കെ എം ജി മാവൂർ, റിയൽ എഫ് സി തെന്നല, ഉഷ എഫ് സി തൃശൂർ, അൽ മദീന ചെർപ്പുളശ്ശേരി, സബാൻ കോട്ടക്കൽ, ടൗൺ ടീം അരീക്കോട് തുടങ്ങിയ പ്രമുഖർ വിവിധ പ്രാദേശിക ടീമുകൾക്കായി ജേഴ്സി അണിയും. വ്യാഴാഴ്ച രാത്രി 7.30 ന് കെ വി സുമേഷ് എംഎൽഎ ടൂർണമെന്റ് ഉദ്ഘാടനം ചെയ്യും. പഞ്ചായത്ത് പ്രസിഡന്റ് വി കെ സി ജംഷീറ ചടങ്ങിൽ അദ്ധ്യക്ഷത വഹിക്കും.

ടൂർണമെന്റിൽ നിന്നുള്ള വരുമാനം ഫുട്ബോൾ പരിശീലന ക്യാമ്പുകൾ സംഘടിപ്പിക്കാനും മറ്റു ജീവകാരുണ്യ പ്രവർത്തനങ്ങൾക്കുമാണ് വിനിയോഗിക്കുകയെന്ന് സംഘാടകർ അറിയിച്ചു. നോക്കൗട്ട് അടിസ്ഥാനത്തിൽ നടക്കുന്ന മത്സരങ്ങൾ ഫെബ്രുവരി എട്ടിനാണ് സമാപിക്കുക. 

രാത്രി 8 മണി മുതലാണ് മത്സരങ്ങൾ ആരംഭിക്കുന്നത്. ഗാലറി പാസ്സിന് 1300 രൂപയും സീസൺ ടിക്കറ്റിന് 700 രൂപയുമാണ് നിരക്ക്. 12 വയസ്സ് വരെയുള്ള കുട്ടികൾക്ക് ദിവസേനയുള്ള ഗാലറി ടിക്കറ്റിന് 50 രൂപയാണ് ഈടാക്കുക. 

വാർത്താസമ്മേളനത്തിൽ ടി വി അബ്ദുൽ ഹമീദ് ഹാജി, എളയടത്ത് അഷ്റഫ്, കെ നസീർ ഹാജി, എം വി മുസ്തഫ ഹാജി, സി അബ്ദുൽ നസീർ എന്നിവർ പങ്കെടുത്തു.

സെവൻസ് ഫുട്ബോൾ ആവേശം പങ്കുവെക്കാൻ ഈ വാർത്ത ഷെയർ ചെയ്യൂ. 

Article Summary: 31st Valapattanam All India Sevens Football Tournament starts from January 15 at Kannur, featuring 24 top teams.

#SevensFootball #Valapattanam #KannurFootball #AllIndiaSevens #FootballTournament #KeralaSports