രാജ്യം യുദ്ധമുഖത്ത്; സ്‌കോട്ലൻഡിനെതിരായ ലോകകപ് യോഗ്യതാ മത്സരം മാറ്റിവെക്കണം; ഫിഫയോട് അഭ്യർഥനയുമായി യുക്രൈൻ; ദുരിതം ബാധിച്ചവർക്ക് ഐക്യദാർഢ്യമെന്ന് ഫുട്‍ബോൾ അസോസിയേഷൻ

കീവ്: (www.kvartha.com 04.03.2022) സ്‌കോട്ലൻഡിനെതിരായ ലോകകപ് യോഗ്യതാ മത്സരം മാറ്റിവെക്കണമെന്ന് യുക്രേനിയൻ ഫുട്‌ബോൾ അസോസിയേഷൻ ഫിഫയോട് ആവശ്യപ്പെട്ടു. മാർച് 24 ന് ഹാംപ്‌ഡൻ പാർകിൽ നടക്കുന്ന ലോകകപ് പ്ലേ-ഓഫ് സെമിയിൽ യുക്രൈൻ സ്‌കോട്ലൻഡിനെ നേരിടുകയാണ്. എന്നാൽ രാജ്യത്തിന്റെ നിലവിലെ സാഹചര്യം കണക്കിലെടുത്ത് മത്സരം മാറ്റിവയ്ക്കണമെന്ന് യുക്രേനിയൻ ഫുട്‌ബോൾ അസോസിയേഷൻ അഭ്യർഥിച്ചു.
                            
യുക്രൈൻ മത്സരം മാറ്റിവയ്ക്കാൻ അഭ്യർഥിച്ചിട്ടുണ്ടെന്നും അനുയോജ്യമായ പരിഹാരം കണ്ടെത്താൻ സ്കോടിഷ് ഫുട്ബോൾ അസോസിയേഷനുമായും യുവേഫയുമായും ചേർന്ന് പ്രവർത്തിക്കുകയാണെന്നും ഫിഫ അറിയിച്ചു. ഇക്കാര്യത്തിൽ എത്രയും വേഗം പുതിയ വിവരങ്ങൾ നൽകുമെന്ന് ഫിഫ വ്യക്തമാക്കി.

'മാർചിൽ നടക്കാനിരിക്കുന്ന തങ്ങളുടെ മത്സരങ്ങൾ മാറ്റിവയ്ക്കാൻ യുക്രേനിയൻ ഫുട്ബോൾ അസോസിയേഷനിൽ നിന്ന് ഇന്ന്അഭ്യർഥന ലഭിച്ചതായി ഫിഫ സ്ഥിരീകരിക്കുന്നു. യുക്രൈനിലെ സംഭവങ്ങളാൽ ബാധിതരായ എല്ലാവരോടും ഫിഫ അഗാധമായ ഐക്യദാർഢ്യം പ്രകടിപ്പിക്കുന്നു. കൂടുതൽ അപ്ഡേറ്റ് യഥാസമയം നൽകും' - ഫുട്ബോൾ ഗവേണിംഗ് ബോഡി പ്രസ്താവനയിൽ പറഞ്ഞു.

ഫിഫയും യുവേഫയും റഷ്യൻ ദേശീയ ടീമിനെയും എല്ലാ റഷ്യൻ ഫുട്ബോൾ ക്ലബുകളെയും അന്താരാഷ്ട്ര മത്സരങ്ങളിൽ നിന്ന് ഇനിയൊരു അറിയിപ്പ് ഉണ്ടാകുന്നത് വരെ സസ്പെൻഡ് ചെയ്തിട്ടുണ്ട്. കോവിഡ് കാരണം, ലോകകപ് യോഗ്യതാ മത്സരങ്ങൾ ഇതിനകം പലതവണ വൈകിയിട്ടുണ്ട്.
< !- START disable copy paste -->