സൂപ്പർ ലീഗ് കേരള ഫൈനൽ: കണ്ണൂർ വാരിയേഴ്സ് തൃശൂർ മാജിക് എഫ് സിയുമായി ഏറ്റുമുട്ടും; ജവഹർ സ്റ്റേഡിയത്തിൽ കൊട്ടിക്കലാശം

കണ്ണൂർ: (KVARTHA) ജവഹർ സ്റ്റേഡിയത്തിൽ സെലിബ്രിറ്റികളെ സാക്ഷി നിർത്തി സൂപ്പർ ലീഗ് കേരള രണ്ടാം സീസണിലെ ഫൈനൽ മത്സരത്തിൽ കണ്ണൂർ വാരിയേഴ്‌സ് എഫ് സിയും തൃശൂർ മാജിക് എഫ് സിയും തമ്മിൽ ഏറ്റുമുട്ടും. വെള്ളിയാഴ്ച, (ഡിസംബർ 19) രാത്രി 7.30-ന് കണ്ണൂർ മുൻസിപ്പൽ ജവഹർ സ്റ്റേഡിയത്തിലാണ് ഫൈനൽ മത്സരം നടക്കുന്നത്.

കണ്ണൂർ വാരിയേഴ്‌സ് എഫ് സി സെമി ഫൈനലിൽ നിലവിലെ ചാമ്പ്യന്മാരും ഗ്രൂപ്പിലെ ഒന്നാം സ്ഥാനക്കാരുമായ കാലിക്കറ്റ് എഫ് സിയെ എതിരില്ലാത്ത ഒരു ഗോളിന് തോൽപ്പിച്ചാണ് ഫൈനലിന് യോഗ്യത നേടിയത്. അതേസമയം, തൃശൂർ മാജിക് എഫ് സി മലപ്പുറം എഫ് സിയെ ഒന്നിനെതിരെ മൂന്ന് ഗോളുകൾക്ക് പരാജയപ്പെടുത്തിയാണ് കലാശപ്പോരിനെത്തുന്നത്.

മികച്ച ഫോമിൽ തുടരുന്ന മുഹമ്മദ് സിനാൻ തന്നെയാണ് കണ്ണൂർ വാരിയേഴ്‌സിന്റെ പ്രധാന ശക്തി കേന്ദ്രം. 21 വയസ്സുകാരനായ സിനാൻ നിലവിൽ 10 മത്സരങ്ങളിൽ നിന്ന് നാല് ഗോളും രണ്ട് അസിസ്റ്റും നേടി ടോപ് സ്കോറർ പട്ടികയിൽ മൂന്നാം സ്ഥാനത്തുണ്ട്. 

ഹോം മത്സരങ്ങളിൽ മുൻപ് വിമർശനം നേരിട്ട പ്രതിരോധ നിര അവസാന രണ്ട് മത്സരങ്ങളിലും മികച്ച പ്രകടനമാണ് കാഴ്ചവെക്കുന്നത്. സെമിയിൽ ഗ്രൂപ്പ് ഘട്ടങ്ങളിൽ 21 ഗോൾ നേടിയ കാലിക്കറ്റ് എഫ് സിക്കെതിരെ നിക്കോളാസും വികാസും നയിച്ച പ്രതിരോധ നിര ശക്തമായി നിലയുറപ്പിക്കുകയും ക്ലീൻഷീറ്റ് സ്വന്തമാക്കുകയും ചെയ്തു. പരിശീലകൻ മാനുവൽ സാഞ്ചസിന്റെ തന്ത്രങ്ങളും ടീമിന് കരുത്താകുന്നു.

എന്നാൽ, സ്വന്തം മൈതാനത്ത് നടന്ന അഞ്ച് ഹോം മത്സരങ്ങളിൽ ഒരെണ്ണത്തിൽ പോലും വിജയിക്കാൻ സാധിച്ചിട്ടില്ലെന്നത് കണ്ണൂർ വാരിയേഴ്സിനെ അലട്ടുന്ന വിഷയമാണ്. അവസരങ്ങൾ സൃഷ്ടിക്കുന്നുണ്ടെങ്കിലും ലക്ഷ്യത്തിലെത്തിക്കാൻ കഴിയാത്തതും പോരായ്മയാണ്. സെമി ഫൈനലിൽ പെനാൽറ്റിയിലൂടെയാണ് ടീം ഗോൾ കണ്ടെത്തിയത്.

സൂപ്പർ ലീഗിലെ ഏറ്റവും മികച്ച ടീമുകളിൽ ഒന്നാണ് തൃശൂർ മാജിക് എഫ് സി. പോയിന്റ് പട്ടികയിൽ രണ്ടാം സ്ഥാനക്കാരായാണ് അവർ ഫിനിഷ് ചെയ്തത്. ലീഗിൽ ഏറ്റവും കുറവ് ഗോൾ വഴങ്ങിയ ടീമും തൃശൂരാണ്. ഐ ലീഗിലെ മികച്ച താരങ്ങളിലൊരാളായ മാർക്കസ് ജോസഫ് പരിക്ക് മാറി തിരിച്ചെത്തിയത് അവർക്ക് കരുത്താകുന്നു. 

സെമി ഫൈനലിൽ മലപ്പുറത്തിനെതിരെ ഹാട്രിക് ഗോളാണ് താരം നേടിയത്. ലെനി റോഡ്രിഗസ് നയിക്കുന്ന മധ്യനിരയും മേഴ്സൺ ആൽവസ് നയിക്കുന്ന പ്രതിരോധവും മികച്ചുനിൽക്കുന്നു. ഗോൾ പോസ്റ്റിൽ ഇന്ത്യൻ അണ്ടർ 23 താരം കമാലുദ്ദീനും ടീമിന് കരുത്തുപകരുന്നു.

കണ്ണൂർ വാരിയേഴ്‌സിന് എതിരെ സൂപ്പർ ലീഗിൽ തൃശൂർ മാജിക് എഫ് സിക്ക് ഇതുവരെ ജയിക്കാൻ സാധിച്ചിട്ടില്ലെന്നത് ശ്രദ്ധേയമാണ്. സീസണിൽ ഇരുവരും ഏറ്റുമുട്ടിയപ്പോൾ ഒരു മത്സരം സമനിലയിൽ പിരിഞ്ഞപ്പോൾ ഒന്നിൽ കണ്ണൂർ വിജയിച്ചു. മുന്നേറ്റനിര താരം കെവിൻ പരിക്കേറ്റ് പുറത്തായത് തൃശൂരിന് തിരിച്ചടിയാണ്. 

ചലച്ചിത്ര താരങ്ങളായ ആസിഫലി, കുഞ്ചാക്കോ ബോബൻ തുടങ്ങിയവരാണ് വാരിയേഴ്‌സിന്റെ ഫൈനൽ പോരാട്ടം കാണാൻ കണ്ണൂരിലെത്തുന്നത്. അനുബന്ധ പരിപാടികൾ വൈകിട്ട് ആറ് മണി മുതൽ സ്റ്റേഡിയത്തിൽ ആരംഭിക്കും.

ഫൈനലിൽ ആര് ജയിക്കും? നിങ്ങളുടെ പ്രവചനം താഴെ കമന്റ് ചെയ്യൂ! ഷെയർ ചെയ്യൂ.

Article Summary: Kannur Warriors and Thrissur Magic set for Super League Kerala Final showdown in Kannur today.

#SuperLeagueKerala #KannurWarriors #ThrissurMagic #KeralaFootball #JawaharStadium #FinalBattle