‘എനിക്കിതിന് കഴിയുമോ എന്ന് സംശയിച്ചു, ഈ ദിവസത്തിനു വേണ്ടിയാണ് കാത്തിരുന്നത്’: വികാരാധീനനായി സഞ്ജു സാംസൺ

കൊൽക്കത്ത: (KVARTHA) കൊൽക്കത്ത ഈഡൻ ഗാർഡൻസിൽ വിൻഡീസ് താരം റൊമാരിയോ ഷെപ്പേർഡിനെ മിഡ്-ഓണിലൂടെ ഫോറിന് പായിച്ച ശേഷം സഞ്ജു സാംസൺ പിച്ചിൽ മുട്ടുകുത്തി. ഹെൽമറ്റ് ഊരിയ ശേഷം രണ്ട് കൈകളും ഉയർത്തി ആകാശത്തേക്ക് നോക്കിയ സഞ്ജുവിനെ ഇന്ത്യയുടെ പുതിയ 'ചേസ് മാസ്റ്റർ' എന്നാണ് ആരാധകർ വിശേഷിപ്പിച്ചത്. 

തോറ്റാൽ ലോകകപ്പിൽ നിന്നും പുറത്താകുമായിരുന്ന നിർണ്ണായക മത്സരത്തിൽ ഇന്ത്യയെ മുന്നിൽ നിന്ന് നയിച്ച സഞ്ജുവിന്റെ ഈ ഇന്നിങ്സിനെ വാക്കുകൾക്ക് അതീതമെന്നാണ് കായിക ലോകം വിലയിരുത്തുന്നത്. ഇത് സഞ്ജുവിന്റെ കരിയറിലെ ഏറ്റവും സെൻസിബിൾ ഇന്നിങ്സും വിമർശകർക്കുള്ള കൃത്യമായ മറുപടിയുമായി മാറി. 

Cometh the hour, cometh Sanju Samson! 🫡

9⃣7⃣*(50) - A knock for the ages to take #TeamIndia into the semi-finals 👏

Scorecard ▶️ https://t.co/ur4pr8Bi3K#T20WorldCup | #MenInBlue | #INDvWI | @IamSanjuSamson pic.twitter.com/ftJRp2wMTE

— BCCI (@BCCI) March 1, 2026

സെഞ്ചറിയേക്കാൾ മൂല്യമുള്ള ഇന്നിങ്സ്

ട്വന്റി20 ലോകകപ്പിൽ വെസ്റ്റിൻഡീസിനെതിരായ സൂപ്പർ 8 മത്സരത്തിൽ ഓപ്പണറായി ഇറങ്ങിയ സഞ്ജു സാംസൺ 50 പന്തിൽ നിന്ന് 97 റൺസെടുത്ത് പുറത്താകാതെ നിന്നു. സഞ്ജുവിന്റെ തകർപ്പൻ പ്രകടനത്തിന്റെ കരുത്തിൽ ജയിച്ച ഇന്ത്യ ലോകകപ്പ് സെമിഫൈനലിലും പ്രവേശിച്ചു. 

കേവലം മൂന്ന് റൺസിന് മാത്രമാണ് സഞ്ജുവിന് സെഞ്ചറി നഷ്ടമായത്. എങ്കിലും സെഞ്ചറിയേക്കാൾ മൂല്യമുള്ള ഈ ഇന്നിങ്സ് സഞ്ജുവിനെ തന്നെ മത്സരത്തിലെ താരമായി തെരഞ്ഞെടുക്കാൻ കാരണമായി.

View this post on Instagram

A post shared by ICC (@icc)

കാത്തിരുന്ന സ്വപ്ന നിമിഷം

പ്ലെയർ ഓഫ് ദ മാച്ച് പുരസ്കാരം സ്വീകരിച്ച ശേഷം വികാരാധീനനായാണ് സഞ്ജു സംസാരിച്ചത്. ‘ഈയൊരു ദിവസത്തിനു വേണ്ടിയാണ് ഞാൻ കാത്തിരുന്നത്. ഇത് എനിക്ക് ലോകത്തോളം വലുതാണ്. സത്യത്തിൽ, ഞാൻ ക്രിക്കറ്റ് കളിക്കാൻ തുടങ്ങിയ അന്ന് മുതൽ, രാജ്യത്തിന് വേണ്ടി കളിക്കണമെന്ന് സ്വപ്നം കണ്ട അന്ന് മുതൽ, ഈ ഒരു ദിവസത്തിന് വേണ്ടിയായിരുന്നു ഞാൻ കാത്തിരുന്നത്. 

ഞാൻ വളരെയധികം നന്ദിയുള്ളവനാണ്. ഉയർച്ച താഴ്ചകൾ നിറഞ്ഞ സവിശേഷമായ ഒരു യാത്രയായിരുന്നു എന്റേത്. പലപ്പോഴും ഞാൻ എന്നെത്തന്നെ സംശയിച്ചിട്ടുണ്ട്; എനിക്കിതിന് കഴിയുമോ, എനിക്ക് മുന്നേറാൻ സാധിക്കുമോ എന്നൊക്കെ ഞാൻ ചിന്തിക്കുമായിരുന്നു. എങ്കിലും ഞാൻ എന്നിൽ വിശ്വസിച്ചു. ഇന്ന് എന്നെ അനുഗ്രഹിച്ചതിന് സർവ്വശക്തനായ ദൈവത്തോട് ഞാൻ നന്ദി പറയുന്നു. ഞാൻ വളരെയധികം സന്തോഷവാനാണ്,’ സഞ്ജു പറഞ്ഞു.

BIG occasion 🤝 BIG knock

Sanju Samson is adjudged the Player of the Match at the Eden Gardens ✨

Scorecard ▶️ https://t.co/ur4pr8Bi3K#TeamIndia | #T20WorldCup | #MenInBlue | #INDvWI | @IamSanjuSamson pic.twitter.com/tmKNBWbFNA

— BCCI (@BCCI) March 1, 2026

കോലിയിൽ നിന്നും രോഹിത്തിൽ നിന്നും പഠിച്ച പാഠങ്ങൾ

വിരാട് കോലി, രോഹിത് ശർമ എന്നിവരിൽ നിന്നും താൻ പഠിച്ച പാഠങ്ങളാണ് ഈ ഇന്നിങ്സിന് സഹായകമായതെന്ന് സഞ്ജു വെളിപ്പെടുത്തി. ‘കഴിഞ്ഞ 10-12 വർഷമായി ഞാൻ ഐപിഎൽ കളിക്കുന്നു, കഴിഞ്ഞ 10 വർഷമായി ഇന്ത്യൻ ടീമിലുമുണ്ട്. ഞാൻ എല്ലാ മത്സരങ്ങളും കളിച്ചിട്ടുണ്ടാകില്ല, പക്ഷേ ഡഗൗട്ടിലിരുന്ന് വിരാട് കോലിയെയും രോഹിത് ശർമയെയും പോലുള്ള മഹാരഥന്മാരിൽ നിന്ന് ഞാൻ ഒരുപാട് കാര്യങ്ങൾ പഠിച്ചു. 

അവർ എന്താണ് ചെയ്യുന്നത് എന്ന് നിരീക്ഷിക്കുകയും അതിൽ നിന്ന് പഠിക്കുകയും ചെയ്യുക എന്നത് പ്രധാനമാണ്. ആ അനുഭവം എന്നെ ഒരുപാട് സഹായിച്ചിട്ടുണ്ട്. ഞാൻ ഒരുപക്ഷേ 50-60 മത്സരങ്ങളേ കളിച്ചിട്ടുണ്ടാകൂ, പക്ഷേ നൂറിലധികം മത്സരങ്ങൾ ഞാൻ നിരീക്ഷിച്ചിട്ടുണ്ട്. മികച്ച താരങ്ങൾ എങ്ങനെയാണ് മത്സരങ്ങൾ ഫിനിഷ് ചെയ്യുന്നതെന്നും സാഹചര്യത്തിനനുസരിച്ച് എങ്ങനെയാണ് കളി മാറ്റുന്നതെന്നും ഞാൻ കണ്ടു പഠിച്ചു,’ സഞ്ജു വ്യക്തമാക്കി.

സാഹചര്യത്തിനൊത്ത പോരാട്ടം

കഴിഞ്ഞ മത്സരത്തിലെ സാഹചര്യമല്ല ഈ വിൻഡീസ് പോരാട്ടത്തിൽ ഉണ്ടായിരുന്നതെന്ന് സഞ്ജു കൂട്ടിച്ചേർത്തു. ‘കഴിഞ്ഞ മത്സരത്തിൽ ഞങ്ങൾ ആദ്യം ബാറ്റ് ചെയ്യുകയായിരുന്നു, വലിയൊരു സ്കോർ ഉയർത്തുക എന്നതായിരുന്നു ലക്ഷ്യം. അതുകൊണ്ട് തന്നെ ആദ്യ പന്ത് മുതൽ ആക്രമിച്ച് കളിക്കാനാണ് ഞാൻ ശ്രമിച്ചത്. എന്നാൽ ഈ മത്സരം തികച്ചും വ്യത്യസ്തമായിരുന്നു. 

ഞാൻ സ്കോർ ഉയർത്താൻ ശ്രമിക്കുമ്പോഴെല്ലാം വിക്കറ്റുകൾ വീഴുന്നുണ്ടായിരുന്നു. അതിനാൽ ഒരു പാർട്‌നർഷിപ്പ് കെട്ടിപ്പടുക്കാനാണ് ഞാൻ ശ്രമിച്ചത്. സവിശേഷമായി എന്തെങ്കിലും ചെയ്യുമെന്ന് ഞാൻ കരുതിയിരുന്നില്ല, എന്റെ റോളിൽ ശ്രദ്ധ കേന്ദ്രീകരിക്കാനും ഓരോ പന്തിനെയും അതിന്റെ മെറിറ്റിൽ നേരിടാനുമാണ് ഞാൻ ശ്രമിച്ചത്. എന്റെ ജീവിതത്തിലെ ഏറ്റവും മികച്ച ദിവസങ്ങളിൽ ഒന്നാണിത്,’ വികാരാധീനനായി സഞ്ജു പറഞ്ഞുനിർത്തി.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. ഈ വാർത്ത മറ്റുള്ളവരുമായി പങ്കിടാനും അഭിപ്രായങ്ങൾ കമൻ്റായി രേഖപ്പെടുത്താനും മറക്കരുത്

Sanju Samson emotional after match-winning 97* against West Indies in T20 World Cup.

#SanjuSamson #T20WorldCup #IndiaVsWestIndies #CricketNews #TeamIndia #Kvartha