ഹസ്തദാനം വിവാദത്തിന് പിന്നാലെ സഞ്ജുവിന്റെ ക്യാച്ച് ചർച്ചയിൽ; അമ്പയറുടെ തീരുമാനത്തിനെതിരെ പാകിസ്താൻ പരാതി നൽകി! 

ദുബൈ: (KVARTHA) ഹസ്തദാന വിവാദത്തിന് പിന്നാലെ ഏഷ്യാ കപ്പ് സൂപ്പർ ഫോർ പോരാട്ടത്തിൽ വീണ്ടും പുതിയ വിവാദത്തിന് തിരി കൊളുത്തിയിരിക്കുകയാണ് പാകിസ്താൻ ക്രിക്കറ്റ് ടീം. മത്സരത്തിൽ അമ്പയറുടെ 'സംശയാസ്പദമായ' തീരുമാനത്തിനെതിരെ പാകിസ്താൻ അന്താരാഷ്ട്ര ക്രിക്കറ്റ് കൗൺസിലിന് (ഐസിസി) ഔദ്യോഗികമായി പരാതി നൽകി. ഇന്ത്യൻ വിക്കറ്റ് കീപ്പർ സഞ്ജു സാംസൺ പാക് ഓപ്പണർ ഫഖർ സമാനെ പുറത്താക്കിയ ക്യാച്ചിനെ ചൊല്ലിയാണ് പുതിയ തർക്കം.

മത്സരത്തിന്റെ മൂന്നാം ഓവറിൽ ഹാർദിക് പാണ്ഡ്യയുടെ പന്തിൽ വിക്കറ്റ് കീപ്പർ സഞ്ജു സാംസൺ ക്യാച്ചെടുത്താണ് ഫഖർ സമാൻ പുറത്തായത്. എന്നാൽ, സഞ്ജുവിന്റെ കൈയ്യിലെത്തും മുൻപ് പന്ത് നിലത്ത് തട്ടിയിരുന്നോ എന്ന കാര്യത്തിൽ സംശയമുയർന്നു. തുടർന്ന് തേർഡ് അമ്പയർ നിരവധി തവണ ദൃശ്യങ്ങൾ വിശദമായി പരിശോധിച്ചതിന് ശേഷം ഔട്ട് വിധിക്കുകയായിരുന്നു. ഈ തീരുമാനത്തിൽ കടുത്ത അതൃപ്തി പ്രകടിപ്പിച്ച ഫഖർ സമാൻ, ദേഷ്യത്തോടെയാണ് ക്രീസ് വിട്ടത്.

Wickets ka 𝐇𝐀𝐑𝐃𝐈𝐊 swaagat, yet again 🤩

Hardik Pandya nicks one off Fakhar Zaman 🔥

Watch #INDvPAK LIVE NOW, on the Sony Sports Network TV channels & Sony LIV.#SonySportsNetwork #DPWorldAsiaCup2025 pic.twitter.com/19fR5GiMn3

— Sony Sports Network (@SonySportsNetwk) September 21, 2025

പാക് ടീം മാനേജർ നവീദ് ചീമ ആദ്യം മാച്ച് റഫറി ആൻഡി പൈക്രോഫ്റ്റിന് പരാതി നൽകാൻ ശ്രമിച്ചെങ്കിലും, അത് തന്റെ അധികാരപരിധിയിൽ വരുന്നതല്ലെന്ന് പറഞ്ഞ് അദ്ദേഹം പരാതി സ്വീകരിക്കാൻ തയ്യാറായില്ല. ഇതിനെ തുടർന്ന് ഐസിസിക്ക് ഇ-മെയിൽ വഴി പരാതി നൽകുകയായിരുന്നുവെന്ന് ടെലികോം ഏഷ്യ റിപ്പോർട്ട് ചെയ്തു. വീഡിയോ ദൃശ്യങ്ങൾ വ്യക്തമല്ലെങ്കിൽ പോലും, ഫീൽഡിങ് ടീമിന് അനുകൂലമായി അമ്പയർ വിധി പ്രസ്താവിച്ചത് ശരിയായ നടപടിയല്ലെന്ന് പാക് ടീം മാനേജ്മെന്റ് പരാതിയിൽ ചൂണ്ടിക്കാട്ടി.

അമ്പയർമാരുടെ തീരുമാനത്തിൽ തൃപ്തനല്ലെന്ന് മത്സരശേഷം പാക് ക്യാപ്റ്റൻ സൽമാൻ ആഗയും പ്രതികരിച്ചിരുന്നു. 'അമ്പയർമാർക്ക് തെറ്റുകൾ പറ്റാം. കീപ്പർ ക്യാച്ചെടുക്കുന്നതിന് മുൻപ് പന്ത് നിലത്ത് തട്ടിയതായി തോന്നുന്നു. ഒരുപക്ഷേ എന്റെ അഭിപ്രായം തെറ്റായിരിക്കാം' - സൽമാൻ ആഗ പറഞ്ഞു. ഒരുപക്ഷേ ഫഖർ സമാൻ കൂടുതൽ സമയം ക്രീസിൽ നിന്നിരുന്നെങ്കിൽ പാകിസ്താന്റെ സ്കോർ 190 റൺസിന് മുകളിലെത്തുമായിരുന്നുവെന്നും അദ്ദേഹം കൂട്ടിച്ചേർത്തു.

അതേസമയം, അമ്പയറുടെ തീരുമാനത്തിനെതിരെ മുൻ പാക് താരങ്ങളായ ഷൊയിബ് അക്തറും വഖാർ യൂനിസും രംഗത്തെത്തി. ഫഖർ സമാൻ ഔട്ടല്ലെന്നും, താരത്തിന് സംശയത്തിന്റെ ആനുകൂല്യം ലഭിക്കേണ്ടതായിരുന്നുവെന്നും മുൻ പാക് പേസർ ഷൊയിബ് അക്തർ പറഞ്ഞു. 'അവിടെ 26 ക്യാമറകളുണ്ടായിട്ടും ഒരു ആംഗിളിൽ പോലും പന്ത് വ്യക്തമായി കാണാനില്ല. രണ്ട് ആംഗിളുകൾ മാത്രം നോക്കിയാണ് അമ്പയർ തീരുമാനമെടുത്തത്. ഒരുപക്ഷേ ഫഖർ കളിച്ചിരുന്നെങ്കിൽ മത്സരത്തിൻ്റെ ഗതി മാറുമായിരുന്നു. അമ്പയറിങ്ങിൻ്റെ പ്രത്യേകിച്ച് തേർഡ് അമ്പയറിങ്ങിൻ്റെ നിലവാരം എനിക്ക് തൃപ്തികരമായി തോന്നിയില്ല. അതിലൊന്നിൽ പന്ത് നിലത്ത് തട്ടിയതായി വ്യക്തമായി കാണാം'- അക്തർ പറഞ്ഞു.

സഞ്ജുവിന്റെ ക്യാച്ച് ഔട്ടായിരുന്നോ? നിങ്ങളുടെ അഭിപ്രായം കമന്റ് ചെയ്യൂ.

Article Summary: Pakistan files official complaint against ICC over Sanju Samson's controversial catch in Asia Cup.

#INDvsPAK #AsiaCup2025 #SanjuSamson #Cricket #Controversy #Pakistan