ബ്ലാസ്റ്റേഴ്‌സിന് ഇതിഹാസ താരത്തിനൊപ്പം ഇനി തെന്നിന്ത്യന്‍ സൂപ്പര്‍ സ്റ്റാറുകളും, പിണറായിയുമായി കൂടിക്കാഴ്ച നടത്തി

പുതിയ നിക്ഷേപകരുമായി സച്ചിന് തിരുപ്പതിയില് കൂടിക്കാഴ്ച നടത്തിയിരുന്നു. ബ്ലാസ്റ്റേഴ്സിന്റെ മൂന്നാം സീസണിലെ മാറ്റങ്ങളെ കുറിച്ചും സച്ചിന് വെളിപ്പെടുത്തി. ബ്ലാസ്‌റ്റേഴ്‌സില സച്ചിന് 40 ശതമാനം ഓഹരിയാണുള്ളത്. ബാക്കി ഓഹരികള്‍ കൈവശമുണ്ടായിരുന്ന പി വി പി ഗ്രൂപ്പ് ആദ്യ സീസണ് ശേഷം തന്നെ തങ്ങളുടെ ഓഹരികള്‍ വില്‍ക്കാന്‍ തീരുമാനിച്ചിരുന്നു. ഒഴിവുവരുന്ന 60 ശതമാനം ഓഹരികളാണ് താരങ്ങള്‍ വാങ്ങുക.

ബ്ലാസ്റ്റേഴ്‌സിനൊപ്പം ചേര്‍ന്ന് മികച്ച ഫുട്‌ബോള്‍ താരങ്ങളെ വാര്‍ത്തെടുക്കാന്‍ വേണ്ടി സമഗ്രമായ പദ്ധതി രൂപം നല്‍കിയിട്ടുള്ളതായി മുഖ്യമന്ത്രി വാര്‍ത്താസമ്മേളനത്തില്‍ അറിയിച്ചു. ചെറിയ പ്രായത്തില്‍ തന്നെ ഫുട്‌ബോള്‍ താരങ്ങളെ കണ്ടെത്താനുള്ള ശ്രമത്തിനു പിന്തുണ നല്‍കുമെന്നും അറിയിച്ചിട്ടുണ്ട്. ഇതിന് വേണ്ടി സച്ചിന്റെ നേതൃത്വത്തില്‍ റസിഡന്‍ഷ്യല്‍ ഫുട്‌ബോള്‍ അക്കാദമി തുടങ്ങുമെന്ന് അറിയിച്ചിട്ടുണ്ടെന്നും മുഖ്യമന്ത്രി വ്യക്തമാക്കി.

അടുത്ത അഞ്ച് വര്‍ഷം കൊണ്ട് രാജ്യാന്തര നിലവാരത്തിലുള്ള 100 ഫുട്‌ബോള്‍ പ്രതിഭകളെ വാര്‍ത്തെടുക്കാനാണ് അക്കാദമി കൊണ്ട് ലക്ഷ്യമിടുന്നത്. കേരളത്തിലെ കായിക മേഖല അടുത്ത അഞ്ച് വര്‍ഷം എങ്ങനെയായിരിക്കണമെന്ന ബ്ലൂപ്രിന്റ് കേരള ബ്ലാസ്‌റ്റേഴ്‌സ് ഫുട്‌ബോള്‍ ക്ലബും സര്‍ക്കാരും ചേര്‍ന്ന് ഉണ്ടാക്കും. സ്‌കൂളുകളില്‍ ബ്ലാസ്‌റ്റേഴ്‌സിന്റെ നേതൃത്വത്തില്‍ ഫുട്‌ബോള്‍ അടിത്തറ ശക്തമാക്കാനുള്ള നടപടികള്‍ സര്‍ക്കാര്‍ ആരംഭിക്കും. എല്ലാ പ്രാദേശിക, ദേശീയ, രാജ്യാന്തര മല്‍സരങ്ങളില്‍ അക്കാദമിയില്‍ നിന്നുള്ള ടീം മല്‍സരിക്കും.