Paris Olympics | ഞെട്ടിക്കാൻ പാരീസ്; ഒളിമ്പിക്‌സ് മത്സരങ്ങൾ നടക്കുന്ന സ്റ്റേഡിയങ്ങളുടെ വിശേഷങ്ങൾ അറിയാം 

പാരീസ്: (KVARTHA) കായിക ചരിത്രത്തിലെ മറക്കാനാകാത്ത അനുഭവം സമ്മാനിക്കാൻ ഒരുങ്ങുകയാണ് പാരീസ് (Paris) നഗരം. ജൂലൈ 26 മുതൽ ഓഗസ്റ്റ് 11 വരെ ഒളിമ്പിക്സ് (Olympics ) മത്സരങ്ങൾക്ക് വേദിയാകുന്ന പാരീസ്, മനോഹരമായ കാഴ്ചകളും അത്യാധുനിക കായിക സമുച്ചയങ്ങളും ഒരുക്കിയിരിക്കുന്നു. ഒളിമ്പിക്സിന് വേദിയാകുന്ന പല സ്റ്റേഡിയങ്ങളും (Stadium) ചരിത്രപ്രാധാന്യമുള്ളവയാണ്. 

1900 ലെ പാരീസ് ഒളിമ്പിക്സിന് വേദിയായ സ്റ്റേഡ് ഡി ഫ്രാൻസ്, റോളണ്ട് ഗാറോസ് ടെന്നീസ് സ്റ്റേഡിയം എന്നിവയാണ് ഉദാഹരണങ്ങൾ. ഓരോ സ്റ്റേഡിയത്തിനും അതിന്റേതായ കഥയും പാരമ്പര്യവും ഉണ്ട്, ഇത് മത്സരങ്ങൾക്ക് (Competitions) ഒരു പ്രത്യേക അന്തരീക്ഷം നൽകുന്നു. ഇത്തവണ കായിക മാമാങ്കത്തിന് വേദിയാകുന്ന സ്റ്റേഡിയങ്ങൾ പരിചയപ്പെടാം.

പിയറി മൗറോയ സ്റ്റേഡിയം

വടക്കൻ ഫ്രാൻസിലെ വില്ലെന്യൂവ് ദി ആസ്കിലെ (Villeneuve-d'Ascq) പിയറി മൗറോയ സ്റ്റേഡിയം (Pierre Mauroy stadium) ഹാൻഡ്‌ബോൾ, ബാസ്കറ്റ്ബോൾ മത്സരങ്ങൾക്ക് അടക്കം ആതിഥേയത്വം വഹിക്കും. ഇത് ഡെകാത്‌ലോൺ അരീന എന്ന പേരിലും അറിയപ്പെടുന്നു. ലോസ്‌ക് ലില്ലെ ഫുട്‌ബോൾ ക്ലബ്ബിന്റെ സ്വന്തം കളിസ്ഥലമാണ് ഇത്. കൂടാതെ സംഗീത പരിപാടികൾ, റഗ്ബി മത്സരങ്ങൾ, ഇൻഡോർ സ്പോർട്സ് മത്സരങ്ങൾ എന്നിവയും ഇവിടെ നടക്കാറുണ്ട്.

50,157 സീറ്റുകളുള്ള ഈ സ്റ്റേഡിയത്തിന് ഫ്രാൻസിന്റെ മുൻ പ്രധാനമന്ത്രിയായിരുന്ന പിയറി മൗറോയയുടെ പേരാണ് നൽകിയിരിക്കുന്നത്. 2012 ൽ ഉദ്ഘാടനം ചെയ്ത ഈ സ്റ്റേഡിയം 2013 യുവേഫ വനിതാ യൂറോ ഫൈനൽ, 2019 റഗ്ബി ലോകകപ്പ് ഫൈനൽ ഉൾപ്പെടെ നിരവധി പ്രധാന കായിക മത്സരങ്ങൾക്ക് ആതിഥേയത്വം വഹിച്ചിട്ടുണ്ട്.

റോളണ്ട് ഗാരോസ് സ്റ്റേഡിയം 

ടെന്നിസ് മത്സരങ്ങൾ നടക്കുന്നത് റോളണ്ട് ഗാരോസ് സ്റ്റേഡിയത്തിലാണ് (The Roland Garros stadium). ഫ്രഞ്ച് ഓപ്പണിന് (French Open) ആതിഥേയത്വം വഹിക്കുന്ന ഇതിഹാസ സ്റ്റേഡിയമാണ് റോളണ്ട് ഗാരോസ്.
ഇത് ഫ്രഞ്ച് ടെന്നീസ് ഫെഡറേഷന്റെ (French Tennis Federation - FFT) ആസ്ഥാനമാണ്. 1928 ൽ നിർമ്മിച്ച ഈ സ്റ്റേഡിയത്തിന് ഫ്രഞ്ച് വ്യോമയാന വിദഗ്ധൻ  റോളണ്ട് ഗാരോസിന്റെ പേരാണ് നൽകിയിരിക്കുന്നത്. ഒളിമ്പിക്‌സിൽ  ടെന്നിസിന് പുറമെ, ബോക്സിംഗ് മത്സരങ്ങൾക്കും വേദിയാകും.

പാർക്ക് ദേ പ്രിൻസസ് സ്റ്റേഡിയം 

പുരുഷന്മാരുടെയും സ്ത്രീകളുടെയും ഫുട്ബോൾ മത്സരങ്ങൾ നടക്കുന്നത് പാർക്ക് ദേ പ്രിൻസസ് സ്റ്റേഡിയത്തിലാണ് (arc des Princes stadium). പാരീസിലെ മികച്ച ഫുട്ബോൾ സ്റ്റേഡിയങ്ങളിൽ ഒന്നാണ് പാർക്ക് ദേ പ്രിൻസസ്. ഇത് ഫ്രഞ്ച് ഫുട്ബോൾ ക്ലബായ പാരിസ് സെന്റ് ജെർമെയ്‌ന്റെ (Paris Saint-Germain) സ്വന്തം കളിസ്ഥലമാണ്. ഒളിമ്പിക് ഗെയിംസിൽ പുരുഷന്മാരുടെയും സ്ത്രീകളുടെയും ഗ്രൂപ്പ് ഘട്ട മത്സരങ്ങൾ, ക്വാർട്ടർ ഫൈനൽ, ഫൈനൽ എന്നിവയ്ക്കെല്ലാം പാർക്ക് ദേ പ്രിൻസസ് ആതിഥേയത്വം വഹിക്കും.

അഡിഡാസ് അരീന

പാരീസ് ഒളിമ്പിക്സിനായി നിർമ്മിച്ച ഏക വേദിയാണ് അഡിഡാസ് അരീന (Adidas Arena). ഫ്രഞ്ച് തലസ്ഥാന നഗരമായ പാരീസിൽ പുതുതായി പണിത ഈ സ്റ്റേഡിയം ബാഡ്മിന്റൺ, റിഥമിക് ജിംനാസ്റ്റിക്സ് മത്സരങ്ങൾക്ക് ആതിഥേയത്വം വഹിക്കും. 2024 ഫെബ്രുവരിയിൽ ഔദ്യോഗികമായി ഉദ്ഘാടനം ചെയ്ത അഡിഡാസ് അരീന, ഏകദേശം 8000 സീറ്റുകൾ ഉള്ള ഒരു ബഹുഉദ്ദേശ്യ സ്റ്റേഡിയമാണ്. 

പാരാലിമ്പിക് ഗെയിംസിൽ പാരാ ബാഡ്മിന്റൺ, പാരാ പവർലിഫ്റ്റിംഗ് മത്സരങ്ങൾക്കും ഇവിടെ വേദിയൊരുക്കും. കായിക മത്സരങ്ങൾക്കു പുറമെ, ദേശീയ, അന്താരാഷ്ട്ര കായിക മത്സരങ്ങൾ, കൂടാതെ സംഗീത പരിപാടികൾ, ഷോകൾ, കോൺഫറൻസുകൾ എന്നിവയും ഇവിടെ നടക്കും. പാരീസ് ബാസ്കറ്റ്ബോൾ ക്ലബിന്റെ (Paris Basketball Club) സ്വന്തം കളിസ്ഥലം കൂടിയാണ്.

യവ്സ്-ദ്യു-മനോയർ സ്റ്റേഡിയം

പുനരുദ്ധാരണം ചെയ്ത യവ്സ്-ദ്യു-മനോയർ സ്റ്റേഡിയം (Yves-du-Manoir stadium) പുരുഷന്മാരുടെയും സ്ത്രീകളുടെയും ഫീൽഡ് ഹോക്കി മത്സരങ്ങൾക്ക് ആതിഥേയത്വം വഹിക്കും. ഈ ചരിത്രപ്രധാന സ്റ്റേഡിയം 1924 ൽ നിർമ്മിക്കപ്പെട്ട ഒന്നാമത്തെ ഒളിമ്പിക് ഗ്രാമത്തിനൊപ്പം തന്നെ പാരീസിലെ കൊളൊംബ് പ്രദേശത്താണ് സ്ഥിതി ചെയ്യുന്നത്. 

2024 ൽ നടക്കുന്ന ഗെയിംസിനായി ഏകദേശം 100 മില്യൺ യൂറോയുടെ പുനരുദ്ധാരണം നടത്തിയിട്ടുണ്ട്.
പുനരുദ്ധാരണത്തിലൂടെ കളിക്കാർക്കും കാണികൾക്കും മികച്ച സൗകര്യങ്ങൾ ഒരുക്കിയിട്ടുണ്ട്. പുതിയ ടർഫ്, 1000 സീറ്റുകളുള്ള സ്റ്റാൻഡ്, പരിശീലന കളിസ്ഥലം എന്നിവ ഇതിൽ ഉൾപ്പെടുന്നു. കൂടാതെ, പരിസ്ഥിതി സൗഹൃദ നിർമ്മാണ രീതികളും സ്റ്റേഡിയത്തിന്റെ പുനരുദ്ധാരണത്തിൽ ഉപയോഗിച്ചിട്ടുണ്ട്.

ഒളിമ്പിക് അക്വാട്ടിക് സെന്റർ

നീന്തൽ മത്സരങ്ങൾക്ക് വേദിയൊരുക്കുന്നത് പാരീസ് ഒളിമ്പിക് അക്വാട്ടിക് സെന്റർ (Olympic Aquatic Center) ആണ്. ഈ അത്യാധുനിക നീന്തൽ കേന്ദ്രം 2024 ഏപ്രിലിൽ ഔദ്യോഗികമായി ഉദ്ഘാടനം ചെയ്തു. സെന്റർ ആക്വറ്റിക് (Centre Aquatique) എന്നും ഇത് അറിയപ്പെടുന്നു. സെന്റ്-ഡെനിസ് പ്രദേശത്താണ് ഇത് സ്ഥിതി ചെയ്യുന്നത്. 

ഗ്രാൻഡ് പാലൈസ് എഫെമീർ

രണ്ട് പേരുകളിൽ അറിയപ്പെടുന്ന ഒരു വേദിയാണ്  ഗ്രാൻഡ് പാലൈസ് എഫെമീർ (Grand Palais Ephemere) അഥവാ ഷാംപ് ഡി മാർസ് അരീന (Champ de Mars Arena). ഈ താൽക്കാലിക സ്റ്റേഡിയം 2021 ൽ നിർമ്മിച്ചതാണ്. പുനരുദ്ധാരണ പ്രവർത്തനങ്ങൾക്കായി അടച്ചിട്ടിരുന്ന ഗ്രാൻഡ് പാലൈസിന് പകരമായാണ് ഇത് നിർമ്മിച്ചത്. 2024 ഒളിമ്പിക്സിന് ശേഷം ഈ സ്റ്റേഡിയം പൊളിക്കുകയും മറ്റൊരു സ്ഥലത്ത് വീണ്ടും നിർമ്മിക്കുകയും ചെയ്യും. ആതിഥേയത്വം വഹിക്കുന്ന ഇനങ്ങൾ: ജൂഡോ (Judo), ഗുസ്തി (Wrestling). കായിക ഇനങ്ങൾക്കു പുറമെ വലിയ ഫാഷൻ ഷോകൾ, കച്ചേരികൾ എന്നിവയ്ക്കും വേദിയാകാറുണ്ട്.

ഷാംപ് ഡി മാർസ്

ബീച്ച് വോളിബോൾ മത്സരങ്ങൾക്ക് വേദിയാകുന്നത്  ഷാംപ് ഡി മാർസ് (Champ-de-Mars) എന്ന പാർക്കിനുള്ളിലെ താൽക്കാലിക സ്റ്റേഡിയമാണ്. ഈ സ്റ്റേഡിയം ഷാംപ് ഡി മാർസ് അരീന (Champ de Mars Arena) എന്നും അറിയപ്പെടുന്നു. പാരീസിന്റെ പ്രശസ്തമായ ലാന്റ്‌മാർക്കുകളിലൊന്നായ ഈഫൽ  ടവറിന് സമീപമാണ് ഷാംപ് ഡി മാർസ് പാർക്ക് സ്ഥിതി ചെയ്യുന്നത്. 

തേഹുപൂ'ഒ

പസഫിക് മഹാസമുദ്രത്തിലെ ഫ്രഞ്ച് പോളിനേഷ്യയുടെ ഭാഗമായ ടാഹിറ്റി ദ്വീപിലെ ഒരു ചെറിയ ഗ്രാമമാണ് തേഹുപൂ'ഒ (Teahupo'o). ഇവിടത്തെ ഭീമാകാരമായ തിരമാലകൾ ലോകപ്രസിദ്ധമാണ്. ഒളിംപിക്സിൽ സർഫിംഗ് (Surfing) മത്സരങ്ങൾ നടക്കുന്നത് തേഹുപൂ'ഒയിലാണ്. ഇവിടുത്തെ തിരമാലകൾ വളരെ ശക്തവും അപകടകരവുമാണ്. പരിചയസമ്പന്നരായ സർഫർമാർക്കു പോലും വെല്ലുവിളി ഉയർത്തുന്നവയാണ്.

തിരമാലകൾ പവിഴപ്പുറ്റുകളിൽ നിന്ന് ഉയർന്നു വരുന്നതാണ്, അതിനാൽ വീഴുമ്പോൾ ഗുരുതരമായ പരിക്കുകൾ സംഭവിക്കാനുള്ള സാധ്യത കൂടുതലാണ്. ഈ തിരമാലകൾ കൈകാര്യം ചെയ്യാൻ പ്രത്യേക പരിശീലനം ആവശ്യമാണ്. എന്നിരുന്നാലും, തേഹുപൂ'ഒ ലോകത്തിലെ ഏറ്റവും മികച്ച സർഫിംഗ് സ്ഥലങ്ങളിലൊന്നായി കണക്കാക്കപ്പെടുന്നു. അതിശക്തമായ തിരമാലകളും മനോഹരമായ പ്രകൃതിയും ഇവിടം പ്രശസ്തമാക്കുന്നു.

ഗ്രാൻഡ് പാലൈസ്

പാരീസിലെ ചരിത്രപ്രധാനമായ ഒരു ലാന്റ്‌മാർക്കും മനോഹരമായ കെട്ടിടവുമാണ് ഗ്രാൻഡ് പാലൈസ് (Grand Palais). ഒളിമ്പിക്സിൽ ഇവിടെ രണ്ട് കായിക ഇനങ്ങൾ നടക്കും. ഫെൻസിംഗ് (Fencing): വാളുകൾ ഉപയോഗിച്ചുള്ള കായിക മത്സരമാണ് ഫെൻസിംഗ്. വേഗതയും തന്ത്രവും ആവശ്യമായ ഈ മത്സരങ്ങൾ ഗ്രാൻഡ് പാലൈസിന്റെ വിശാലമായ ഹാളിൽ നടക്കും.

തായ്‌ക്വാണ്ടോ (Taekwondo): കാലുകളും കൈകളും ഉപയോഗിച്ചുള്ള ഈ മത്സരങ്ങൾ ഗ്രാൻഡ് പാലൈസിനോട് ചേർന്നുള്ള അലക്സാണ്ടർ മൂന്നാമൻ പാലത്തിന് സമീപം ഒരു പ്രത്യേക വേദിയിൽ നടക്കും. ഗ്രാൻഡ് പാലൈസ് 2010 ലെ ലോക ഫെൻസിംഗ് ചാമ്പ്യൻഷിപ്പിന് ആതിഥേയത്വം വഹിച്ചിട്ടുണ്ട്. അതിന്റെ മനോഹരമായ വാസ്തുവിദ്യയും ചരിത്രവും കായിക മത്സരങ്ങൾക്ക് അനുയോജ്യമായ അന്തരീക്ഷം ഒരുക്കും.