ഏഷ്യാകപ്പിൽ ഇന്ത്യയുമായുള്ള മത്സരത്തിലെ ഹസ്‌തദാന വിവാദം: മാച്ച് റഫറിയെ പുറത്താക്കിയില്ലെങ്കിൽ അടുത്ത മത്സരം ബഹിഷ്‌കരിക്കുമെന്ന് പാകിസ്‌ഥാൻ

ദുബൈ: (KVARTHA) ഏഷ്യാ കപ്പിൽ ഇന്ത്യ-പാകിസ്‌ഥാൻ മത്സരത്തിനു ശേഷം ഉടലെടുത്ത ഹസ്‌തദാന വിവാദത്തിൽ നിലപാട് കടുപ്പിച്ച് പാകിസ്‌ഥാൻ ക്രിക്കറ്റ് ബോർഡ് (പിസിബി). മാച്ച് റഫറിയായ ആൻഡി പൈക്രോഫ്റ്റിനെ ടൂർണമെന്റിൽ നിന്ന് പുറത്താക്കിയില്ലെങ്കിൽ അടുത്ത മത്സരം ബഹിഷ്‌കരിക്കുമെന്ന് പിസിബി മുന്നറിയിപ്പ് നൽകി. സെപ്റ്റംബർ 17ന് യുഎഇക്ക് എതിരായ മത്സരമാണ് പാകിസ്‌ഥാൻ ബഹിഷ്‌കരിക്കുമെന്ന് ഭീഷണി മുഴക്കിയിരിക്കുന്നത്. ഈ മത്സരത്തിനുള്ള മാച്ച് റഫറിയും പൈക്രോഫ്റ്റാണ്.

വിവാദത്തിന് പിന്നാലെ ആദ്യം മാച്ച് റഫറിക്ക് പരാതി നൽകിയ പാകിസ്‌ഥാൻ, പിന്നീട് ഇദ്ദേഹത്തിനെതിരെ അന്താരാഷ്ട്ര ക്രിക്കറ്റ് കൗൺസിലിന് (ഐസിസി) ഔദ്യോഗികമായി പരാതി നൽകി. മാച്ച് റഫറി ഏകപക്ഷീയമായി പെരുമാറിയെന്നാണ് പിസിബിയുടെ ആരോപണം. ടോസ് സമയത്ത് മാച്ച് റഫറി ആൻഡി പൈക്രോഫ്റ്റ് പാകിസ്‌ഥാൻ ക്യാപ്റ്റൻ സൽമാൻ ആഗയോട് ഇന്ത്യൻ ക്യാപ്റ്റൻ സൂര്യകുമാർ യാദവിന് ഹസ്‌തദാനം നൽകരുതെന്ന് നിർദേശിച്ചതായി പിസിബി പറയുന്നു. ഈ നീക്കം കായിക മനോഭാവത്തിന് എതിരാണെന്ന് ആരോപിച്ച് പാകിസ്‌ഥാൻ ടീം മാനേജ്‌മന്റ് പ്രതിഷേധം രേഖപ്പെടുത്തി.

അതേസമയം, ഹസ്‌തദാനം ഒഴിവാക്കാനുള്ള തീരുമാനം ഇന്ത്യൻ ക്യാപ്റ്റൻ സൂര്യകുമാർ യാദവ് എടുത്തത് പഹൽഗാം ഭീകരാക്രമണത്തിലെ ഇരകളോടുള്ള ഐക്യദാർഢ്യം പ്രഖ്യാപിച്ചാണെന്ന് റിപ്പോർട്ടുണ്ട്. മത്സരത്തിന് മുൻപ് ടീം മാനേജ്‌മെന്റും ബിസിസിഐയും തമ്മിൽ ചർച്ച നടത്തിയ ശേഷമാണ് ഈ തീരുമാനമെടുത്തത്. കളിയുടെ തുടക്കത്തിലും അവസാന സമയത്തും ഹസ്‌തദാനം ഒഴിവാക്കണമെന്ന നിർദേശം മുഖ്യപരിശീലകൻ ഗൗതം ഗംഭീറാണ് ടീമിന് നൽകിയത്. ടീമിലെ മുതിർന്ന താരങ്ങളും ഈ തീരുമാനത്തെ അംഗീകരിച്ചിരുന്നു. സമൂഹ മാധ്യമങ്ങളിലെ പ്രതിഷേധം ഇന്ത്യൻ താരങ്ങളെ ബാധിച്ചിരുന്നു.

ഇന്ത്യൻ ടീമിന്റെ ഈ സമീപനത്തിൽ പ്രതിഷേധിച്ചാണ് പാക് ക്യാപ്റ്റൻ സൽമാൻ മത്സരശേഷമുള്ള ചടങ്ങുകളിൽ നിന്ന് മാറിനിന്നതെന്ന് പാകിസ്‌ഥാൻ ക്രിക്കറ്റ് ബോർഡ് വ്യക്തമാക്കി. വിഷയത്തിൽ ആൻഡി പൈക്രോഫ്റ്റ് ഐസിസി പെരുമാറ്റച്ചട്ടവും ക്രിക്കറ്റ് സ്പിരിറ്റുമായി ബന്ധപ്പെട്ട എംസിസി നിയമങ്ങളും ലംഘിച്ചുവെന്ന് ആരോപിച്ച് അദ്ദേഹത്തെ ഏഷ്യാ കപ്പിൽ നിന്ന് ഉടൻ നീക്കം ചെയ്യണമെന്ന് പിസിബി ഐസിസിയോട് ആവശ്യപ്പെട്ടു. പിസിബി അന്താരാഷ്ട്ര ക്രിക്കറ്റ് ഡയറക്ടർ ഉസ്മാൻ വഹയെ പരാതി നൽകുന്നതിൽ വീഴ്ച വരുത്തിയതിന് സസ്‌പെൻഡ് ചെയ്തതായും റിപ്പോർട്ടുണ്ട്.

വിഷയത്തിൽ കാര്യമായി പങ്കില്ലാത്ത ഐസിസിക്ക് പരാതി നൽകിയത് എന്തിനാണെന്ന ചോദ്യവും ഉയരുന്നുണ്ട്. ഏഷ്യൻ ക്രിക്കറ്റ് കൗൺസിൽ (എസിസി) ആണ് ഏഷ്യാ കപ്പ് ടൂർണമെന്റ് സംഘടിപ്പിക്കുന്നത്. എസിസി പ്രസിഡന്റ് പാകിസ്‌ഥാൻ ക്രിക്കറ്റ് ബോർഡ് ചെയർമാനായ മൊഹ്സിൻ നഖ്‌വി തന്നെയാണ്. ഇരുവരും ഒരേ ആളായതിനാൽ ഐസിസിക്ക് പരാതി നൽകിയതിലെ ദുരൂഹതയും ഏറുന്നുണ്ട്.

ഇന്ത്യ-പാക് മത്സരത്തിലെ വിവാദത്തിൽ നിങ്ങളുടെ അഭിപ്രായമെന്താണ്? 

Article Summary: Pakistan threatens to boycott Asia Cup after a handshake controversy with India.

#AsiaCup #IndvsPak #CricketControversy #PakistanCricket #PCB #ICC